9 nhai bồ nam 2025, kờp jơh phan lơh gơs gơguh kờp bal bơh càr Khánh Hòa dê gơguh 7%, ơm dơ̆ 26 tàm 34 càr, ƀòn dờng gùt lơgar mờ ơm dơ̆ 4 tàm 6 càr tiah kềng gah dà lềng đah jum tàm gùl lơgar mờ Tây Nguyên; kờp jơh rề dia geh rlau 28 rbô 800 tơmàn đong, sơrlèt rlau 3% khà kờp dŭ mờ dà lơgar jàu; gơguh mờr 50% pơndrờm bal dùl tŭ mờ nam lài. Lòt nhơl mờ broă drơng ala pơn jat tai là bơta niam pơn rơ ngan, wă rlau 14 tơlak 100 rbô dơ̆ nac, tàm hơ̆ geh 4 tơlak 300 rbô dơ̆ nac ală lơgar, priă lơh geh rlau 56 rbô 500 tơmàn đong, gơguh mờr 20% pơndrờm dùl tŭ bal mờ nam lài.

Tàm pơrjum, Ƀí thư Tỉñ ủy càr Khánh Hòa ồng Nghiêm Xuân Thành đơs sùm: Khánh Hòa pal tơrgùm priă jền geh bơta tờm, tơngume tờm, wèt tàm ală rơndap broă lơh geh bơta pràn, phan bơna kuơmàng nàng lơh gơtùi mờ sơrlèt rlau jơnau kờñ lơh geh gơguh lơh sa rlau 8%, mờ kung tă bơsong 246 rơndap broă lơh gơ kòl, ai priă bơcri gam gơtìp ơm ing. Ồng Nghiêm Xuân Thành kung tơngkah broă yal rơndap ù tiah bơh càr Khánh Hòa pa dê kờñ pal geh lam lơh niam nàng lơh bơnàng jă ai ală broă rơndap lơh bơtàu tơnguh in.