Phó Thủ tướng ồng Nguyễn Hòa Bình neh lòt sền ù tiah 2 rơndăp broă lơh “rơbô tơmàn” là Rơndăp broă lơh Tiah làng bol ơm kis Cồn Tân Lập (sơnah ƀòn Nha Trang) mờ Tiah drà pa Mỹ Gia (sơnah ƀòn Tây Nha Trang). Rơndăp broă lơh Tiah làng bol ơm kis Cồn Tân Lập geh lơh tìs tàm tŭ tàm pơrlòng giă, uă bơta neh ơm bơh jŏ ngan rao. Làng bol tiah do kung kơ̆p kờñ rơndăp broă lơh gờñ lơh sir nàng tam gơl niam muh mat tiah drà dê. Rơndăp broă lơh Tiah drà pa Mỹ Gia kung gơtìp uă kòl yan bè kơnòl priă jền, gam geh ală mpồl lơh broă pơn jat tai lùp sền.

Jơh gùt càr Khánh Hoà neh sền is tìs di kơnòl, dan mờ ală kấp geh gơnoar bơsong lơh glài, ai wơl priă hoàc huơr geh 1 rơbô 100 tơmàn đong. Bulah bè hơ̆, broă lơh bơsong lơh niam wơl gam gơtìp ală kòl yan tài bơh bàr pe rơndăp broă lơh tàm pơrlòng giă rơ wah cau bơcri priă lơh, tàm pơrlòng giă rơndăp broă lơh. Phó Thủ tướng ồng Nguyễn Hoà Bình đơs sùm gùng dà broă lơh bơh Cíñ phủ dê là tơrgùm tă bơsong ai ală rơndăp broă lơh gam gơ kòl nàng kờñ pleh pơhì pơhà priă jền mpồl bơtiàn mờ lơh geh tai bơta gơn kơnờm ai bơtàu tơnguh in:“Bơh mờng chài rơ̆ ru bơh broă tă bơsong kal ke jat Jơnau lơh nền tàm pơrjum sồ 170 dê, uă tiah, tàm hơ̆ geh bal Khánh Hoà geh  Khánh Hoà yau, Ninh Thuận yau, bol he gam pơn jat tai geh ală rơndăp broă lơh ndai kung là kòl yan ngan sơl, kờñ pal tơrgùm tă bơsong. Dilah lời gơ kòl den ală bơta pràn mpồl bơtiàn tềng đăp mat là pơhì pơhà bè priă jền. Bàr là pơhì pơhà tŭ tơngai mờ gơ kòl, làng bol den ờ sŭk ơm”.

Lơh sa mờ măi mok mờ Năng lượng là 2 tàm 4 broă tờm gơguh lơh sa, geh đơs tàm Jơnau lơh nền tàm pơrjum sồ 01 bơh Tỉñ ủy càr Khánh Hoà dê. Tŭ do, jơh gùt càr neh geh 33 mpồl lơh sa mờ măi mok geh rơndăp ù tiah, kờp jơh bă ù ơnàng rlau 1 rơbô 400 lồ. Tàm gah năng lượng, càr neh rơndăp ù tiah 60 rơndăp broă lơh mờ kờp jơh bơta pràn rlau 8 rơbô 525 MW. Ồng Hồ Xuân Ninh, Kwang Lam bồ Sờh Lơh sa mờ măi mok – kă bro phan càr Khánh Hoà pà gĭt,  mờ broă lơh kờp sền jài, hòi jà bơcri priă jài, càr gam lơh geh bơnàng jă nàng lơh sa mờ măi mok mờ năng lượng gơ gơs 2 bơta tờm gơguh lơh sa, pơgồp bơnah lam lơh sa tiah do dê tam gơl pràn tàm tơngai pa.

Ồng Hồ Xuân Ninh, đơs: “Càr Khánh Hòa gam tơrgùm bơsong, tă bơsong ală rơndăp broă lơh gơtìp kòl yan, is ồn là tàm gah lơh sa mờ măi mok mờ năng lượng, gơ lơh bè neh bơsong jơh lơm. Mìng gam bàr pe rơndăp broă lơh, Sờh Lơh sa mờ măi mok mờ Kă bro phan rơ̆p pơn jat tai tă pơgồp jơnau đơs mờ Anih duh broă Làng bol càr dê tă bơsong, nàng kờñ ngui niam priă jền mờ ai ală rơndăp broă lơh do tă pơgồp tàm gơguh lơh sa. Tŭ tơmŭt bal 2 càr Ninh Thuận mờ Khánh Hoà, ală rơndăp broă lơh kờñ pal kờp sền, tam gơl niam mờ sền gĭt adat boh lam nàng lam lơh ƀuơn ngan”.

Cribơyai broă lơh tă bơsong ală bơta gơ kòl, ai lơh sa mờ măi mok mờ năng lượng in ngan ngồn gơ gơs 2 broă tờm bơtàu tơnguh, Anih duh broă Làng bol càr Khánh Hoà sồr ală Sờh, gah broă kờp sền jơh ală broă geh gơrềng, bè sră pơ àr, phan bơna bơt bơtàu, mpồl lơh broă, ai mat ù; mơkung sền gĭt kơnòl broă geh ngan, ai lơh lài ală bơnah broă jal mhar mờ ală rơndăp broă lơh geh bơta pràn lơh geh priă jền uă nàng tơrgùm lam lơh. Ală mpồl lơh broă pal kràñ cê jơh nùs lơh niam wơl tiah bơcri priă, rcang jơnau đơs broă lơh geh ngan, mơkung kong kơnòl bơsong ală kal ke, kòl yan bơh mpồl lơh sa kă bro mờ cau bơcri priă dê.