Ù tiah ràng tơlik mờr 500 thơk vuông bơh VOV dê tàm Ràng tơlik “80 nam gùng lòt Lơngăp lơngai is – Khăt gơboh – Gơboh gơbài” lơh tơnggŏ wơl gùng lòt 80 nam lòt bal mờ bơtàu tơngguh dà lơgar. VOV neh hòi tơrgùm bồ tơngoh jak, bơta jơh nùs jơh tồr bơh jơh ală cau cih jơnau, cau sền swì jơnau, cau drơng măy, cau chài đơs crih tam ya mờ cau lơh broă dê nàng rơndăp lơh ù tiah ràng tơlik lơh tơnggŏ wơl ală tŭ tơngai kah yau kwơmàng bơh Anih Jơnau đơs Việt Nam dê, bè pờ tơlik tàm rơdio Jơnau yal bơr lơngăp lơngai is ngai 02/09/1945, jơnau yal tam lơh jai pha Điện Biên Phủ, Tam lơh pha lin dờng kàl prang nam 1975…ală tŭ tơngai pơnrơ ngan tàm gùng lòt kah yau khin cha jak chài ngan bơh dà lơgar dê.

Ồng Phạm Mạnh Hùng, Phó Kwang Lam bồ dờng Anih Jơnau đơs Việt Nam (VOV), pà gĭt:

 “Ală tŭ tơngai kwơmàng kung bè là ală tŭ tam gơl pa bơh Đảng dê, ală tŭ bơtàu tơngguh bè bơta tơngume, jak chài – măy mŏk- ătbồ broă bơh Anih Jơnau đơs Việt Nam dê tam klăc bal, lòt bal mờ ală tŭ tơngai kah yau kwơmàng bơh dà lơgar dê bè lơi ndrờm geh tơlik tàm ù tiah ràng tơlik bơh Anih Jơnau đơs Việt Nam dê. Tŭ làng bol lòt còp ù tiah hơ̆ gơtùi gĭt geh jơnau kah yau bơtàu tơngguh 80 nam bơh Anih Jơnau đơs Việt Nam dê, bơh dơ̆ pờ tơlik jơnau đơs bơh sơnrờp ngai 07/09/1945 tus tŭ tơngai tam gơl pa tŭ do. Tơl dùl tŭ tơngai kah yau bơtàu tơngguh dà lơgar ndrờm geh bơta tus bal tơn bơh Anih Jơnau đơs Việt Nam dê tàm broă lơh kăc màng bơh jơi bơtiàn dê”.

Ồng Phạm Mạnh Hùng kung đơs nền: Tàm jơh gùt tŭ tơngai geh lơh ràng tơlik, VOV rơ̆p ai kwang bàng, cau cih ƀăo, cau chài đơs crih tam ya tìp măt lơh kwèng mờ bơto pơlam lòt sền gŏ bơta chài broă mờng lơh, sền nàng gĭt bè jơnau kah yau bềng bơta hừh nùs bơh Anih Jơnau đơs Việt Nam dê.

Bơh ală broă lơh krơi is mờ is ồn là tŭ cau sền lòt còp anih ràng tơlik gơtùi sền gŏ ù tiah ngan ngồn lơh pơnyơu gời VR bè ngai 02 nhai 09 tàm Ƀlàng dờng Ba Đình, tŭ Wa Hồ sền jơnau yal bơr lơngăp lơngai is, halà ală tŭ tơngai kwơmàng den ndrờm geh ală sền gŏ mờ săp ntas. Bol hi rơ̆p yal tơnggĭt ală phan ngui yal tơnggĭt jơnau pa bơh Anih Jơnau đơs Việt Nam dê, bè: Ƀăo điện tử Jơnau đơs Việt Nam, Ƀăo điện tử VTCNews, gah pờ tơlik jơnau đơs Gùng lòt rê mờ geh jơnau pa tơlik măt là jơnau gùng lòt rê kềng gah dà lềng; gơtùi sền gŏ lơh ală tơngume mờ tŭ do geh uă ngan tàm anih sồ.

Broă lơh bơ̆t bơtàu Ràng tơlik “Broă lơh geh dà lơgar dê – gùng lòt 80 nam tài Lơngăp lơngai is – Khăt gơboh – Gơboh gơbài” tàm Anih tờm Ràng tơlik Dà lơgar tàm Đông Anh, Hà Nội pờ mpồng wă rò làng bol lòt còp, lòt sền gŏ bơh ngai 28/08 tus 05/09, hơ pơrgon rơ̆p là anih tus cèng wơl bơta chờ hờp mờ hừh nùs ai tơl nă làng bol Việt Nam in.