Tŭ bơsram Dà Anh tàm ơdŭ 11A4 bơh pơgru Phan Mạnh Tiến dê sùm geh uă bơta chờ. Jơnau bơsram geh pơgồp bal mờ jơnau nhơl, jơnau geh ai nàng boh bơr, cri bơyai, pơnhồr mùl màl chờ hờp ngan… Oh Trần Tú Tài, bơsram ơdŭ 11A4 pà git, tŭ bơsram Dà Anh niam bơnĕ bè do, dong kờl wă jơnau bơto ƀuơn mờ kah sùm. “Bơnah bơsram den pơgru tam pà loh ngan tơl gơl mờ lơh jăt tơngu me nàng dong kờl bol oh in wă loh rơlao tơl bơnah. Tơnơ̆ mờ hơ̆ den pơgru rơ̆p geh jơnau bơsram tơnguh uă, dong kờl oh geh ală jơnau bơsram tơnguh uă bơta pràn mờ pơgru sùm geh bơto bal, sền mờ lơh niam wơl oh in nàng oh gơtùi bơsram jăk pah ngai”.

Tàm tŭ ală kơnòm bơsram kấp 3 chờ hờp mờ broă bơsram Dà Anh bơh pơgru kơnòm să Phan Mạnh Tiến dê tài dong kờl lơh gơmù bơta kal ke, tơnguh bơta git wă, den ală cau bơsram dờng tàm Hìu bơsram Đại họk Tây Nguyên bơsram bơto tàm do neh gŏ geh dùl bơta pa ngan tàm broă lơh bơh să tờm dê. Bơyô Phạm Thị Thu Hà, cau bơsram dờng đah Dà lơgar bơdìh, Hìu bơsram Đại họk Tây Nguyên pà git: “Oh bơsram geh tai ală broă lơh mờng chài bơh pơgru dê nàng tơnơ̆ do gơtùi ngui tàm broă mblàng jơnau bơto”.

Mờ kơnòm bơsram tàm hìu bơsram kấp pe Thực hành Cao Nguyên, pơgru Tiến ờ mìng là cau bơto jơnau git wă mờ gam là cau git iăt, tam pà bal. Uă kơnòm bơsram jòi tus pơgru bè dùl nă cau bi dờng nàng boh bơr, geh ai gùng dà broă lơh tàm tơngai bơta pràn kơl dang să jan bal mờ nùs nhơm geh uă tam gơl. Oh Lê Sỹ Trọng, bơsram ơdŭ 11A5 kal wơl broă tus bal dơ̆ pơrlòng mŭt lơh broă bơceh lơh bè do: “Pơgru Tiến là cau lơh broă bal mờ bol oh, dong kờl bol oh jơh nùs ngan tàm rơndăp broă Ròng iar tàm suơn mờ ñhơ̆t sơnơm. Pơgru tus bal lơh tàm ală broă, pơgru bơto sồr bol oh lòt jòi sền nàng git, ai geh bơta pràn ală cau in. Tơnơ̆ mờ dùl tơngai lơh jăt jơnau pơgru bơto sồr mờ neh lơh geh cồng nha, dơ̆ sơnrờp mờ he lơh geh bơta do den chờ hờp ngan, lơh geh jơnau kờñ den oh gơlơh chờ hờp ngan”.

Bal mờ broă mblàng jơnau bơto, pơgru Phan Mạnh Tiến gam là Ƀí thư Đoàn hìu bơsram ñhăp ñhar ngan. Rơlao 10 nam bơto tàm hìu bơsram, pơgru neh lơh uă ngan broă lơh nùs nhơm dong kờl is tàm hìu bơsram mờ bơdìh hìu bơsram. Bè tàm tŭ kòp COVID-19 lơh broă bơsram pờ tơlik tàm internet gơtìp kal ke ngan, pơgru neh dan bơyai lơh dơ̆ pơrlòng ƀăo tường điện tử mờ dà Anh “Ngai chờ gai cùr rơmit”, hòi jà ală cau pơgru tàm lơgar bal mờ lơgar bơdìh tus bal. Uă broă lơh nùs nhơm dong kờl is geh pơgru lam lơh bè “Satềp kờñ gơboh”, “Dong kờl kàl pơrlòng”, “Chu jrềng ưn ngài”, “Gùng lòt tus anih pơrhê”, broă dong kờl tiah nhàr lơgar… neh jào git nđờ rơhiang khà priă bơsram, dong kờl uă kơnòm bơsram kal ke mờ yal uă đoàn viên jăk nàng mŭt Đảng. Ồng Nguyễn Tiến Chương, Phó Kwang lam bồ Hìu bơsram kấp pe Thực hành Cao Nguyên đơs: “Pơgru Tiến là dùl nă cau pơgru kơnòm să ñhăp ñhar bè jơh bàr đah lơh broă tàm mpồl bal mờ broă bơto, ai broă lơh đoàn đơs is mờ broă ơruh pơnu kơnòm bơsram, cau bơsram dờng lơh broă pràn ngan. Pơgru kung tơnguh broă ngui AI tàm broă bơto bơsram; geh sùm mpồl đơs dà Anh, bơyai lơh dơ̆ pơrlòng Rơngô bơrlềm rơmit tàm hìu bơsram, ai wơl broă bơsram dà Anh pa, bơsram lòt bal mờ broă lơh, ai geh nùs nhơm nàng ală kơnòm bơsram in kờñ gơboh mờ bơsram dà Anh”.

Ală broă lơh ngan sùm bơh pơgru kơnòm să Phan Mạnh Tiến dê neh geh dờp di pal. Nam 2023, pơgru geh khà Bàr cau pơgru jăk kấp càr. Nam 2024, pơgru geh Đoàn ơruh pơnu Dà lơgar jờng rơ là cau pơgru kơnòm să pơnrơ jăk gùt lơgar mờ là dùl tàm ală cau lơh geh nùs nhơm gơboh kờñ tàm Pơrjum dờng “Ơruh pơnu gơguh jăk lơh jăt jơnau Wa Hồ” dơ̆ VIII nam 2025. Bơceh lơh “Tơnguh uă jơnau dà Anh mờ broă ngui AI” bơh pơgru dê geh khà A kấp hìu bơsram mờ khà C kấp Sờh, geh sền là broă bơto bơsram gơdờp ngan mờ rài tam gơl sồ tàm broă bơto. Yal bè gùng dà broă lơh tus do, pơgru Phan Mạnh Tiến pà git: “Añ pal tam gơl pa broă bơto, lơh bè lơi nàng geh ală broă lơh mờ ală kơnòm bơsram tus bal uă mờ geh cồng nha. Bơsram bal ală broă lơh nàng geh ală broă lơh mờ ală kơnòm bơsram sền gròi, gơboh kờñ den añ kung lơh geh uă. Lơh ngan nàng lơh geh ală mpồl tàm gùt hìu bơsram, bơtàu tơnguh tai mpồl đơs dà Anh, cri bơyai, mpồl git wă tàm rài kis mờ mpồl kơnòm bơsram 3 niam”.

Mờ ală broă lơh gơlơh bè ờs, mơya geh sùm, pơgru kơnòm să Phan Mạnh Tiến gam pơgồp bal tàm broă lơh geh dùl rơnàng kơnòm bơsram git tàm gơboh bal, geh kơnòl mờ kơ̆p kờñ bơtàu tơnguh să tờm. Bơh ală dơ̆ bơsram niam bơnĕ mờ chờ hờp, pơgru neh ai geh nùs nhơm chờ hờp nàng kơnòm bơsram gơboh kờñ bơsram dà lơgar bơdìh niam rơlao.