Ồng Đặng Gia Duẩn, Ƀí thư Đảng ủy sơnah ƀòn Ea Kao, đơs là bal mờ broă gĭt nền ală tiah lòt nhơl tờm kwơmàng, Jơnau lơh nền tàm pơrjum pal jòi gĭt tai bàr pe ƀòn lơgar gơgơs anih tus lòt nhơl tờm ngan càr dê. Bơdìh hơ̆ tai, cau ala măt do sồr rơndăp ù tiah ală rơndăp broă lơh gơcèng bơta lơh jăt ngan ngồn, gơ jăt bal mờ kòn bơnus mờ muh măt tiah drà, tàm hơ̆ geh broă lơh ndơ̆p jơh ală gùng che đèng tàm 14 tiah drà, kung bè lơh rơndăp ù tiah ai Ƀlàng rơndeh par Buôn Ma Thuột gơgơs ƀlàng rơndeh par ală lơgar.

“Bè phan bơna den bol hi geh 2 bơta kơlôi sơnơng dùl là bè muh măt tiah drà halà he geh rơndăp broă lơh ndơ̆p ală gùng che đèng ală tiah drà càr dê. Dơ̆ bàr là ƀlàng rơndeh par, mờ să bồ càr pa dê tŭ do mờ bol he geh 2 nơm ƀlàng rơndeh par den añ dan pal rơndăp ù tiah nàng ai ƀlàng rơndeh par Buôn Ma Thuột gơgơs ƀlàng rơndeh par ală lơgar den bol he hơ̆ sồng bơtàu tơngguh gơtùi tam gơl pràn”.

Bơh bơta sền tàm tơrbŏ bal tiah, ồng Lữ Ngọc Tân, Lam bồ Mpồl Ătbồ Tiah lơh sa Phú Yên, đơs sùm jơnau kờñ bơcri phan bơna jun đèng nàng ngui geh cồng nha bơta năng lượng lơh geh wơl bềng lìu bơh đah măt tơngai mŭt, drơng bơtàu tơngguh lơh sa mờ măy mŏk kềng gah dà lềng. Ồng Tân kung sồr kơlôi sơnơng gơl gùng ding jun xăng zờu bơh anih ơhò ơm Bãi Gốc lòt tus Tây Nguyên jăt gùng kềng rơndeh lòt mhar đah măt tơngai Lik – Mŭt, nàng kờñ tơrmù uă ngan priă tă logistics năng lượng mờ lơh gơlik gơn kơnờm tàm tơrbŏ tiah.

“Anih lơh đèng năng lượng lơh geh wơl tàm tiah đah măt tơngai Mŭt bềng lìu ngan, đah măt tơngai Lik mờ ală kơnhoàl ù tiah kềng gah dà lềng kờñ ngan đèng den tàng phan bơna năng lượng nàng jun đèng nàng drơng ai bơtàu tơngguh lơh sa mờ măy mŏk in kwơmàng ngan. Bơdìh mờ phan bơna đèng den phan bơna xăng zờu. Dilah bol he pơgồp bal nàng bơcri crăp ding jun năng lượng bơh đah măt tơngai Lik tus đah măt tơngai Mŭt lòt jăt gah kềng gơl gùng rơndeh lòt mhar do den priă tă bơcri gơ rơ̆p êt ngan rlau jơh. Bol he tàm tơrbŏ gùng ding mờ bơta jòng ờ hềt tus 150 kơi sồ. Priă tă ờ hềt uă mơya cồng nha dờng ngan”.

Tàm đah sền phan bơna, ồng Hùng Ngọc Oánh, Phó Ƀí thư Duh broă sùm Đảng ủy sơnah ƀòn Tuy Hoà, đơs sùm jơnau kờñ gơguh tus bàr dơ̆ priă lơh geh kờp bal dùl nă cau càr dê tàm tơngai lơh broă pa. Nàng lơh geh, jăt ồng pal bơcri pràn kơldang tàm rơndăp tăp sèng phan bơna, ngan là gùng lòt, mơkung lơh niam bơta pràn niam chài – lòt nhơl; dà lềng đah măt tơngai Lik tàm tơrbŏ mờ brê bơnơm đah măt tơngai Mŭt, lơh geh bơta pràn bơtàu tơngguh ndrờm bal bè lơh sa mờ mpồl bơtiàn.

“Nàng lơh niam bơta pràn bơta ƀươn càr dê gơ sồr broă bơcri bè tàm tơrbŏ phan bơna đah bơtàu tơngguh kơnhoàl ù tiah ƀòn lơgar là tiah dà lềng mờ bơnơm; Ờ gŏ di mìng bơtàu tơngguh bè lơh sa mờ măy mŏk lơm mờ đah niam chài jăt Jơnau lơh nền tàm pơrjum den añ sơnơng là bơta pràn đah măt tơngai Lik là dà lềng, pơgồp bal ală niam chài prăp gàr mờ tàm tơrbŏ đah măt tơngai Mŭt là brê bơnơm dờng ơning ơnàng ngan, mờ bơta gơkòl gơ kơryan bơh bol he dê tŭ do là bơnah bơcri phan bơna, is ồn là gùng lòt”.

Ală jơnau đơs tă pơgồp do pơn jăt tai pà gŏ nùs nhơm geh kơnòl, bơta kơ̆p gơn mờ jơh nùs lơh ngan tam gơl pa, wèt tus bơtàu tơngguh Dăk Lăk gơgơs tiah tờm duh hồl bơh tiah Tây Nguyên dê mờ Kềng gah dà lềng đah Jum tàm gùl lơgar tàm tŭ tơngai pa.