Tàm ù tiah pơrhê bazan Cư Mgar, àng mat tơngai sòl àng drim gờñ dê gơ glòm tàm ală suơn kơphe gơs tơlir, ồng Nguyễn Văn Bình nền nòn rơ wah tơl plai dum gờñ nàng pik. Ồng pà git, bàr pe nam do, ồng sền gròi ngan tus broă rơ wah plai bơh tŭ pik, ơn is tàm tơl ƀàu nàng tac mpồl lơh broă bal blơi kơphe geh bơta niam in:“Tŭ do añ ờ tac kơphe lir halà kơphe ờ hềt lơh gơlik phan tai, mờ lơh bal mờ mpồl lơh broă bal, mpồl lơh sa kă bro nàng lơh gơlik kơphe geh bơta niam uă. Khi geh jơnau sồr nền nòn rlau, mơya bơ tơl wơl den giă blơi jơnhua mờ kơnhăp jŏ”.

Bơh ală bă suơn bơh cau lơh broă sa bè ồng Bình dê, gùng lòt bơta kuơ kơphe dê tàm pơn jat tai tàm ală hìu măi lơh gơlik phan. Tàm Buôn Ma Thuột, Kông ty pơgồp bal priă kơphe An Thái neh crơng gơs dùl mpồl lơh kơphe tàm pơdar. Bơh broă chàng, măi tus lơh gơlik kơphe klài lề, lơh ală hìu tac kơphe, lơh kơmhồ kơphe gơ gơs phơng siñ họk kas màng, tac wơl ală cau tờm suơn in. Ồng Nguyễn Xuân Lợi, kwang lam bồ dờng Kông ty pà git:“Bol hi sền gròi ngan tus ală broă lơh lơh gơlik uă, tàm hơ̆ kung đơs sùm gơnoar broă kuơmàng ngan bơh broă tơrbŏ bal ală mpồl dê, tài geh bơta tơrbŏ bal mpồl dồ bă kơ̆ kơnhăp den rơp gơtùi ngui bơta niam nàng lơh gơs dùl bơta kuơ bơh phan bơna bal dê”.

Kông ty Kơnòl nă să is Minudo Farm – Care tàm sơnah ƀòn Ea Kao, càr Dăk Lăk, bơh dùl farm dềt lơm kal ke jòi gùng lòt den tŭ do neh gơ gơs dùl mat sơnđan tiơng pơn rơ tàm gah lơh kơphe bơkah, phan kơphe neh geh tac tàm drà lơgar Ñờk – dùl tàm ală drà kal ke ngan rlau jơh. Ồng Lê Đình Tư, Kwang lam bồ Kông ty yal:“Tŭ do, bol hi yal tơnggit kơphe niam bơh Buôn Ma Thuột dê đơs is mờ Việt Nam đơs bal. Hơ̆ là dùl tàm ală bơta tờm nàng ală cau geh jơnau git wă jrô, ală mpồl chàng, cau hùc dà kơphe kờñ kơphe niam in git, bơh hơ̆ bol he rơp yal tơnggit ală phan niam bơh kơphe Việt Nam dê tus mờ dunia”.

Tàm 7 nam jòi gùng dà lơh gơguh bơta niam, tơnguh priă lơh geh, jơh bal cau lơh broă sa, mpồl lơh sa kă bro mờ ală mpồl gah lơh phan kơphe tàm Dăk Lăk neh lơh geh bơta bơtàu tơnguh jòng. Neh geh uă mpồl lơh sa kă bro bơh sơn đờm mut lơh broă dềt, ờ pràn neh gơtùi tac hờ lơgar ndai kơphe lơh gơlik uă tus ală drà kal ke. Ồng Hoàng Danh Hữu, Kwang lam bồ đơng lam lơh Kông ty pơgồp bal wàng dỜng lơh sa suơn sre Miss Êđê yal:“Tŭ bơta niam neh kơnhăp, tiah tam kơphe neh kơnhăp den neh gơtùi git nền mờ bơta kuơ mat kă bro neh gơtùi gơ hòi gơ jà cau ngui. Den nac tŭ lơi kung rơcang tong lài priă nàng blơi phan, ala mờ pal ơn tàm bơta aniai pal blơi phan lài mờ kơp cau blơi tong priă tơnơ̆. Tơnơ̆ tŭ bol he geh bơta ƀuơn hơ̆ den rơp ờ huan gơ wèt tàm priă bơcri”.

Kờp jơh khà kơphe lơh geh nam 2024 bơh càr Dăk Lăk dê geh rlau 535 rbô tấn, priă lơh geh bơh tac hờ lơgar ndai rlau 915 tơlak dolar Mỹ, geh rlau nggùl kờp jơh priă lơh geh bơh tac phan hờ lơgar ndai càr dê. Jơh gùt càr tŭ do geh rlau 240 anih lơh gơlik kơphe, tàm hơ̆ 25% neh bơcri priă lơh măi mok pa ngan. Gùng dà ai tơlik lài tàm jơnau lơh nền tàm pơrjum dờng Đảng ƀộ càr dơ̆ 1, tơngai lơh broă bơh nam 2025 tus nam 2030 đơs sùm “Bơt bơtàu mat kă bro kơphe Buôn Ma Thuột, bơtàu tơnguh măi mok lơh gơlik uă, lam Dăk Lăk gơ gơs là anih tus bơh kơphe dunia dê”. Broă bơtàu tơnguh gah lơh kơphe jat gùng dà kơ̆ kơnhăp sùm, priă lơh geh uă neh geh càr ai tơlik lơh broă lam lơh tờm ngan. Ồng Nguyễn Thiên Văn, Phó Củ tịc Anih duh broă Làng bol càr Dăk Lăk pà git:“Ală gah broă lơh, ală kâp tus bal tàm broă bơt bơtàu ală tiah tam kơphe jat jơnau sồr di mờ bơta ờs mờng bơh ală lơgar dê. Dơ̆ 2 là tàm ală mpồl lơh phan gơ dê den pal gơ jat bal mờ lơh gơlik uă. Gah lơh phan gơ wèt mờ kơphe pal pơgồp bal li la ngan mờ geh ală bơta pa, jơh nùs nàng gơ dờp bal mờ jơnau kờñ cau ngui dê. Mơya tàm hơ̆ pal gơtùi gàr bơta geh ngan kơphe tiah tam dê tài gơ geh bơta ƀô thồm, bơta is ồn”.

Bơh tiah tam tus anih chàng, măi, bơh cau lơh broă sa tus mpồl lơh sa kă bro tàm Dăk Lăk ndrờm gam pơgồp bal bơta pràn tàm gùng tam gơl kơphe bơh khà lơh geh uă gơ gơs priă lơh geh uă. Tơl gar kơphe ngai do là cơng tàng ai bồ tơngoh tam gơl pa, jơh ală gam pơgồp bơnah đal git mat ai mat kă bro kơphe Việt Nam in – pràn bè bơta niam, kơ̆ kơnhăp mờ priă lơh geh.