Tàm càr lơgar Bắc Kinh, Kwang bàng geh jơng tàm Ƀộ Cíñ trị Đảng Kộng sản lơgar Lo, Phó Kwang lam bồ Anih duh broă sùm Pơrjum dờng Cau ala măt làng bol gùt lơgar, lơgar Lo ồng Lý Hồng Trung neh wă Phó Củ tịc Anih duh broă Mặt trận Dà lơgar Việt Nam, Ƀí thư dơ̆ dùl Đoàn Ơruh pơnu Kộng sản Hồ Chí Minh, Kwang lam bồ bơsram ơruh pơnu lơgar Việt Nam Bùi Quang Huy gam còp, lơh broă tàm lơgar Lo.

Đơs tàm dơ̆ wă, ồng Lý Hồng Trung đơs nền, bàr gah pal lơh jăt nền nòn jơnau sồr bơh kwang đơng lam bồ kấp dờng bàr Đảng, bàr dà lơgar bè broă tơnguh broă tìp bal ơruh pơnu lơgar Lo mờ lơgar Việt Nam, lam ơruh pơnu kơnòm să bàr lơgar pơgồp bal bơta pràn tàm broă bơ̆t bơtàu mpồl bơtiàn tam pà bal tơnơ̆ do đah Việt Nam mờ Lo geh kwơ màng jŏ jòng. Ƀí thư dơ̆ dùl Đoàn Ơruh pơnu Kộng sản Hồ Chí Minh Bùi Quang Huy đơs nền, broă lơh “pơrhê, kơlôi sơnơng bơsram” ai tơngŏ broă lơh ngan, nùs nhơm geh kơnòl mờ gơnoar lam lài bơh ơruh pơnu dê tàm broă prăp gàr, tơnguh mờ bơtàu tơnguh sùm bơta git gơ̆p lơh broă bal jŏ jòng tơl ală bơta đah bàr lơgar Việt Nam mờ Lo, wèt tus bơ̆t bơtàu Mpồl bơtiàn tam pà bal tơnơ̆ do geh kwơ màng jŏ jòng. Ƀí thư dơ̆ dùl Bùi Quang Huy pin dờn là, bơh broă lơh do, ală cau ala măt kơnòm să rơ̆p geh dơ̆ tìp bal, tam gơl bal, bơsram bal, bơh tŭ hơ̆ tơnguh broă git wă bal, bơ̆t bơtàu nùs nhơm lơh bơyô bal mờ pờ ơnàng ală dơ̆ niam lơh broă bal tàm tơnơ̆ do đah ơruh pơnu bàr lơgar dê.