Gơnoar atbồ ală tiah bal mờ mpồl lơh broă geh gơnoar bơh càr Lâm Đồng dê tŭ do gam jal mhar bơsong jơnau gơ lời wơl, ờ mìng pơn jat tai rơcang lài drơng wơl mờ mìu dà tih. Bal mờ bơta ngơr bam tàm ală sàh, sơnah ƀòn tàm tiah đah mat tơngai lik, dà cò pơr dô, tơrlah ù kung gơlik geh tàm tiah đah mat tơngai mut càr Lâm Đồng lơh dùl nă cau chơt mờ lơh gơ kòl uă gơl gùng lòt.

Nàng pơn jat tai crăp rơcang drơng wơl, tơrmù tus khà lơyah ngan rlau jơh hoàc huơr tài mìu dà tih, tơrlah ù lơh gơbàn, Mpồl đơng lam rơcang gàr làng bol càr Lâm Đồng sồr 124 sàh, sơnah ƀòn, tiah is ồn bal mờ mpồl lơh broă geh gơnoar bơyai lơh ai mpồl lơh broă ơm gak ngai mang; lòt sền, kờp sền ală ƀòn làng bol ơm kis kềng gah dà dờng, dà croh, tiah thòng pơhìn gơlik geh ngơr bam. Gơ wèt mờ ală tiah sùm gơlik geh tơrlah ù, ngơr bam bè kuèl Đại Ninh – Gùng dà lơgar 28B, kuèl Sông Pha- Gùng dà lơgar 27, kuèl Gia Bắc- Gùng dà lơgar 28… ală sàh tiah đah mat tơngai lik thiah thòng pal sùm rơcang lài mpồl lơh broă, phan bơna nàng dong kờl rềs àr tŭ geh jơnau sồr.