Broă dong kờl phan tam in pràn gơs wơl tơnơ̆ dơ̆ ngơr bam dà geh sơnđờm lơh jat tàm ù tiah sàh Cát Tiên mờ Cát Tiên 2, tiah geh gĭt nđờ rơhiang lồ sầu riêng gơtìp ngơr bam dà. Kwang bàng Anih tờm Dong kờl bơto pơlam broă lơh sa suơn sre càr Lâm Đồng bơto pơlam tơn broă bơsong yuh dà dong kờl phan tam, mơkung lơh jat ală broă lơh bơsong ală bơsềt lơh gơbàn kòp, lơh pràn wơl rơyah chi dê, sơng ka sền gàr gơ lì tờm chi, sih phơng pràn ai tờm chi in mờ rcang lài kơryan kòp lơh aniai jŏ jòng.

Bal mờ bơto pơlam bơta chài, Anih tờm dong kờl bơto pơlam broă lơh sa suơn sre càr Lâm Đồng kung pơgồp bal mờ ală mpồl lơh broă, mpồl lơh sa kă bro dong kờl bàr pe sồ siă siñ họk, phan bơna broă lơh sa suơn sre nàng dong làng bol in mhar ngan lơh pràn wơl suơn chi. Jơh gùt càr Lâm Đồng tŭ do gam 42 rơbô 500 lồ sầu riêng, tàm hơ̆ uă bă ù geh tam tàm ală tiah thòng lơyah tiah đah jum càr dê.