Bè bơta tơrlah ù kơn jơ̆ ngan tàm koèl kơh D’ran mờ Gia Bắc, Anih duh broă Làng bol càr Lâm Đồng neh lơh nền yal bơta jal mhar bè trồ tiah lơh aniai gơwèt mờ gơl gùng dờng Dà lơgar 20 mờ 28. Gơnoar atbồ tiah do lam lơh dồ ròt bal uă broă lơh drơng, bè crăp kƀàng yal tơngĭt lài ngòt rơngơ̆t, kơryan ờ ai cau ờ geh gơnoar mut tàm tiah tơrlah, lam ntrờn làng bol tus tiah ơm lơngăp lơngai. Mpồl lơh broă geh gơnoar neh hòi jà lơh broă jơh bal ngai mang nàng jat sền, sền gròi, sền gĭt jơnau tờm mờ đơs gùng dà broă lơh bơsong jŏ jòng. Ală dơ̆ mìu dờng pa do lơh nhàr đah đơm, nhàr đah đăng tàm 2 koèl kơh D’ran mờ Gia Bắc dê gơtìp gơ hoài ù, lơh gơkòl gùng lòt. Anih duh broă Làng bol càr sồr ală mpồl lơh broă geh gơrềng mhar bơsong, gàr niam lơngăp lơngai ai cau mờ rơndeh rơndồ in, pleh nàng gơtìp tơrlah ù pơn jat tai gơlik geh tàm tơngai tus.

Tềng đăp mờ bơta kal ke bơh mìu càl rbŭt dờng Kalmaegi, yal lài tus tàm dà lềng đah măt tơngai lik tàm ngai 5 nhai 11, Anih duh broă Làng bol càr Gia Lai neh tơlik jơnau sồr jal mhar, sồr lơh jăt mơ ală broă lơh nàng rơcang lài pleh tàm khà uă rơlao 1 kấp. Ală sờh, gah lơh broă, ală sàh, sơnah ƀòn geh sồr lơh ală gùng dà broă lơh nàng rơcang lài, tam dră mờ mìu càl dờng, mìu sơr, dà cò, tơrlah ù bơh gờñ, lơh ngan ntrờn làng bol tàm tiah thòng, tiah jăt gah croh dà, dà dờng, dòr bơnơm ngòt rơngơ̆t, lơh gơs lài mờ ngai 4 nhai 11. Anih duh broă Làng bol càr sồr lơh jăt nền nòn gùng dà broă lơh “4 tàm tiah hơ̆ tơn”, bañ lời gơlik hoàc huơr bè kòn bơnus. Mpồl đơng lam ling klàng càr rơcang lài mpồl lơh broă, phan lơh broă, tàm hơ̆ uă ngan là phan lòt tàm dà mờ rơndeh par ờ geh cau măi nàng drơng tàm broă sền gròi, dong klàs cau gơtìp rềs àr. Sờh broă lơh sa suơn sre mờ Tiah ơm kis, Sờh Kă bro phan pơgồp bal tam pà dà bơh tàm bơtơ̆t dơng dà, hìu măi pờ tơlik ồs đèng dà, gàr niam lơngăp lơngai tiah đah jum in.