Mìu sơr tàm tiah bồ tô dà lơh dà dờng Lũy nisơna gơguh tih, lơh gơbàn ngơr bam mờr 800 nơm hìu tàm sàh Lương Sơn, càr Lâm Đồng mờ lơh gùng rơndeh lòt mhar Phan Thiết – Dầu Giây lòt gan sàh Tân Lập gơtìp ngơr bam jơh. Is ồn bơta tơrlah tàm kuèl Mimosa (Gùng dà lơgar 20), mpồl lơh broă geh gơnoar neh mhar ai phan bơna, măi mok, tus klo ngai ngai 04/12 neh gơtùi lơh niam wơl mờ ai rơndeh lòt rê bơh jơh 2 gah. Càr Lâm Đồng gam pơn jat tai jat sền bơta gơlik geh bơh trồ tiah dê, kờp sền tiah geh jơnau pơhìn uă nàng kờñ gàr niam ờdo ờdă ai làng bol in mờ gàr niam bơta lòt rê tàm ală gơl gùng kuơmàng.

Drim òr, dà tih tàm dà dờng Cái Nha Trang pơn jăt tai gơguh tih tơnơ̆ mờ dùl mang mìu sơr, lơh uă ƀòn jăt gah dà dờng gơtìp gơbam. Dà tàm dà dờng hòr bơh đah tô bơhơm Khánh Hoà lik tus tiah pòt dà lềng Nha Trang, tàm uă gơl dà sơkal, hòr jơntang mờ lơh lìu mŭt tàm hìu làng bol. Làng bol kis bàr đah dà dờng pà git, khà dà gơguh tih mhar rơlao loh làng pơn drờm mờ ală ngai lài, den tàng geh uă hìu pal rơcang ntrờn cau kram kơnòm dềt mờ phan bơna, rơndeh ơtô tus tàm tiah ñhoa. Tàm sơnah ƀòn Tây Nha Trang, mpồl Kwang àng, Ling gàr ƀòn, Ơruh pơnu lam lài sùm pờ loa yal lài, bơto sồr làng bol sền gròi dà nàng di tŭ rơcang pleh. Geh ờ uă gơl gùng tàm tiah thòng neh gơtìp dà bam jrô, lơh broă lòt rê gơtìp kal ke.