Bulah bè hơ̆, tus jơh nhai 10, jơh gùt càr rơ̆p pa ai geh mờr 30% broă rơndăp lơh. Bàr pe rơndăp broă lơh dờng mơya khà ai priă dồ êt ngan, is ồn là bàr rơndăp broă lơh gùng rơndeh lòt mhar Bảo Lộc – Liang Khàng mờ Tân Phú – Bảo Lộc, mờ kờp jơh broă rơndăp lơh priă rlau 5 rbô tơmàn đong mơya ờ hềt ai priă. Jơnau bơh tài gơbàn tờm ngan tài bơh gơkòl tàm broă lơh sờr ntrờn ù tiah, bal mờ trồ tiah mìu uă mờ pràn jak lơh broă bàr pe cau tờm lơh dê gam ờ hềt pràn jak. Tềng đăp bơta ai priă lơyài, Anih duh broă Làng bol càr Lâm Đồng neh sồr ală cau tờm bơcri priă tơnguh uă kơnòl, jăt rềp tiah lơh broă, sơlơ lòt sền, jăt sền mờ kràñ cê kơ̆ nùs bơsong cau tờm lơh lơyài tơngai lơh.

Mờ Anih duh broă Làng bol ală sàh, sơnah ƀòn, tiah is ồn tiah geh rơndăp broă lơh kung kờñ pal tơrgùm lơh mhar sờr ntrờn ù tiah, lơh broă kờp bal ngai rlô, lơh bè lơi jàu măt ù kloh ai ală broă bơ̆t bơtàu tờm kwơmàng in. Ală sờh, gah geh gơrềng kung geh jàu pơgồp bal kơ̆ kơl jăp, bơsong jơh ală gơkòl bè giă ù, sră nggal bơcri priă, mờ ờs mờng pah dơ̆ yal cồng nha lơh ai Anih duh broă Làng bol càr in.