Tus tŭ do, rơndap broă lơh niam wơl Gùng dà lơgar 28B neh lam lơh tuh lŭ rơđeh geh 44 tàm 62 kơi sồ, tuh bê tông cài kơ̆ mờr 37 tàm 62 kơi sồ. Broă lơh ai ù lơh rơndap broă neh lơh gơs 95%. Tơngai hơ pơrgon lam lơh do lơyài rlau pơndrờm mờ jơnau sồr. Jơnau tờm ngan là tài bơh bàr pe nă cau tờm lơh rơndap broă ờ hềt ai tơl măi mok, phan bơna, cau lơh broă, tàm tŭ cau tờm bơcri priă lơh den ờ hềt geh bơta kràñ cê tàm broă sồr lơh.

Bơh lòt sền ngan ngồn, Củ tịc Anih duh broă Làng bol càr ồng Hồ Văn Mười đơs sùm, Gùng dà lơgar 28B là gơl gùng gơn kơnờm, “bơta lơh nền tus cồng nha halà ờ jai bơh càr Lâm Đồng dê tàm nam 2025” den tàng ờ gơtùi ai jơnau tài lơyài jàu ù lơh rơndap broă nàng kờñ ràs bơr ai tơngai hơ pơrgon lơyài ngan in. Ồng đơs nền, dilah cau tờm lơh rơndap broă lơh ờ pràn, ờ lơh jat jơnau sồr den pal ala, dilah cau tờm bơcri priă ờ tơl pràn jak nàng đơng lam den kung rơp sồr ala tơn.

Ồng Hồ Văn Mười sồr ală mpồl lơh broă geh gơ rềng lơh sir sră nggal, ring bal broă rơndap lơh tơm wơl gam wơl lài mờ ngai 30/10 do. Mờ kung tàm poh do pal bơt bơtàu jơnau rơcang tŭ tơngai hơ pơrgon mùl màl, gàr lơh gơs jơh gùt gơl gùng lài mờ ngai 31/12/2025 jat broă rơndap lơh.