Thủ tướng ồng Phạm Minh Chính đơs loh, tơngai lơh broă bơh nam 2020- 2025 là tơngai lơh broă kal ke ngan tàm ală broă, bulah bè hơ̆, bơh bơta đơng lam Đảng dê, sùm sùm tơn là Ƀộ Cíñ trị, Mpồl Đơng lam Đảng Dà lơgar, lam bồ là ồng Tổng Ƀí thư, jơh ală anih lơh broă cíñ trị neh mŭt lơh bal, lơh geh uă cồng nha tàm ală broă. 05 nam do, uă srơh tàm pơrlòng geh mblàng yal, lam lơh geh cồng nha, geh bơta gơrề uă, bè Srơh tàm pơrlòng is ồn “Jơh gùt lơgar tam klăc, tơrgùm bal pràn, dùl nùs bal tàm pơrlòng rơcăng, drơng mờ jai pha kòp bơtờp dờng Kovid-19”; Srơh tơn jơh hìu ing, hìu ồm sèt ñhăt dà mìu lơh sir gờñ lài 5 nam 4 nhai; srơh tàm pơrlòng lơh Gùng che 500 kV dang 3 Quảng Trạch – Phố Nối, Gùng che 500 kV Lào Cai- Vĩnh Yên…

Thủ tướng đơs sùm pal rề ơnàng lơh uă ală pơnrơ gơguh jak, broă lơh niam, broă lơh jak nàng lơh gơlik pràn kis, lơh gơrề nùs nhơm rơcăng, lơh gơlik srơh; is ồn pal rơcăng lam lơh niam Pơrjum dờng Tàm pơrlòng gơboh lơgar gùt lơgar dơ̆ XI tàm nhai 12 tus ndrờm pal cồng nha lơh geh bơtàu tơngguh lơh sa- mpồl bơtiàn 05 nam do bơh dà lơgar dê.