Tŭ jiơ lik nhơl, Hìu sền sră Hìu bơsram kấp 2 Y Ngông Niê Kđăm, sàh Quảng Phú, càr Dăk Lăk gơ gơs hô hơng rlau tai. Tàm tiah pơn yơu hìu jòng kòn cau Rơđê, ơn prap bơhiàn niam chài, mơkung là hìu sră pa ngan mờ uă bơta sră ƀăo, măi tíñ tàm tơrŏ bal mờ internet, uă kơnòm bơsam ndrờm sền sră, jòi gĭt sră pơ àr, bơsram mpồl halà ƀuơn ngan mìng là lơh rài bồ tơngoh tơnơ̆ tŭ bơsram lơm. Oh H’ Julia Knul, kơnòm bơsram ơdŭ 8A, pà gĭt:“Oh kờñ ngan hìu sền sră do tài bơh gơ lơh ndrờm bè hìu oh dê sơl, geh uă sră nàng sền mờ geh uă sră sền gĭt, nàng bơsram sră. Tàm ală tŭ lik nhơl  mờ ală tŭ ờ geh tiết bơsram den oh lòt guh tàm do. He gơtùi sền gĭt uă bơta geh kwơ ngan ai broă bơsram sră kung bè lơh rài bồ tơngoh mờ lơh niam wơl nùs nhơm”.

Hìu sră pơgồp bal mờ hìu jòng ờs mờng do geh sơnđờm mut ngui bơh nam 2020, bơh ală mpồl lơh sa kă bro Dà lơgar dê dong kờl priă lơh. Bal mờ hơ̆, ală phan bơna bơt bơtàu geh 4 gah hìu bơsram mờ 30 ơdŭ bơsram, 1 nơm hìu tàp pràn să jan, 1 nơm hìu lơh broă bơh ală cau pơgru dê, ƀlàng nhơl, ƀlàng tàp pràn să jan... neh gàr tơl ală bơta bơto mờ bơsram ai rlau 1 rơbô 100 nă kơnòm bơsram in.

Ông Nguyễn Long Điện, Lam bồ Hìu bơsram pà gĭt, tàm ală nam pa do Hìu bơsram kấp 2 Y Ngông Niê Kđăm neh dờp geh uă priă jền dong kờl lơh sir phan bơna bơt bơtàu. Mờ 70% kơnòm bơsram là kòn cau Rơđê, tơl bơta dong kờl lời ai hìu bơsram in ờ mìng dong tơnguh uă bơta niam bơto bơtê lơm mờ gam pơgồp bơnah tơn rềp rlau tai đah tiah ƀuơn ƀoài mờ tiah kal ke:“Anih priă jền Agribank neh geh bơnah dong kờl dờng ngan pơndrờm mờ ală dơ̆ ai càn priă dong kờl neh dong kờl ai hìu bơsram in. Bơnah dong kờl do neh lơh 2 bơta phan bơna bơt bơtàu cèng wơl bơta geh kwơ uă ngan ai hìu bơsram in nàng drơng broă bơto mờ bơsram”.

Ờ mìng lòt bal tàm gah bơto bơtê lơm, ală mpồl lơh sa kă bro gam tàm sơm bat tê bal mờ ală tiah tơn jơh hìu lơh ing, dong làng bol tiah kal ke geh hìu ơm ram mhŭ bè kơ̆ kơnhăp.

Mò H’Bliắk Niê ơm tàm ƀòn Ea Dhô, sàh Cư Pơng, ngoh rơngăc tŭ rcang mut ơm tàm hìu pa dờng niam mờr  100 thơk vuông. Jơh rài kis kis tàm hìu yau lơngơh, mò ờ hềt kơlôi tus dùl ngai ne gơtùi geh ơm kis tàm hìu ơm kơnhăp bè do:“Añ chờ hờp, brơn brài ngan tŭ geh hìu ơm pa, chờ hờp ngan, sùm jùt rào, pơs hìu sàng goh. Tŭ do den tiah ơm neh geh rao, phan puh geh sơl rao, tivi kung neh geh pà rao, brơn brài uă ngan”.

Mò H’Bliắk là dùl tàm 66 hìu bơnhă làng bol tàm sàh Cư Pơng geh dong kờl lơh hìu ơm kơ̆ kơnhăp tàm broă lơh tơn jơh hìu lơh ing, hìu ồm sèt nhăt dà mìu. Ồng Y Blưn Mlô, lài do là Phó Củ tịc Anih duh broă Làng bol sàh Cư Pơng yau, Ƀí thư Ci ƀộ ƀòn Ea Dhô pà gĭt, bal mờ priă jền bơh Dà lơgar, ală mpồl lơh sa kă bro neh tàm sơm bat tê bal tă pơgồp dà kơl hề, dong tiah do in lơh sir gờñ jơnau sồr geh ai, lơh geh tiah kơnờm nàng làng bol ơm kis lơngăp lơngai: “Tŭ geh dong kờl hìu ơm bơh priă bơh Anih priă jền Broă lơh sa suơn sre dê den làng bol ờ gam kơlôi sơnơng tai. Tŭ do khi uă ngan tơrgùm bơtàu tơnguh lơh sa, dồ nùs bal, ring bal uă ngan”.

Lơh jat broă lơh tơrmù rƀah mờ gàr tơl niam rài kis mpồl bơtiàn, tàm 5 nam do, càr Dăk Lăk neh dong kờl bơt bơtàu mờ lơh niam wơl hìu ơm ai gĭt nđờ rơbô hìu bơnhă rƀah mờ hìu bơnhă pa lik klàs rƀah in; dong kờl priă jền, priă bơsram, phe, priă sa sào, hìu ơm ai rlau 72 rơbô nă kơnòm bơsram, cau bơsram dờng gơwèt hìu bơnhă kal ke in. Càr kung neh pà mờr 3 tơlak 300 rơbô dơ̆ pà sră kham sơm kòp ờ sa priă mờ bơsong ai rlau 148 rơbô hìu bơnhă rƀah in càn priă mờ priă lơh geh rlau 5 rơbô 900 tơmàn đong.

Bơdìh mờ priă jền Dà lơgar, ală mpồl cau, mpồl lơh sa kă bro mờ cau dồ nă să tă pơgồp gĭt nđờ jơ̆t tơmàn đong ai ală broă lơh gàr tơl niam rài kis mpồl bơtiàn, dong kờl hìu ơm, priă bơsram, sền gàr cau ờ pràn, tus lơh rbàng drơng broă lơh sa ai làng bol in, hìu bơsram tàm tiah kal ke in. Ală broă lơh do neh pơgồp bơnah lơh gơrề uă nùs nhơm tam pà bal, dong kờl di tŭ ală rài kis ờ bơtoah, pơndờm pơnđiang khi in lơh ngan brồ guh. Ồng Lê Văn Thịnh, Kwang lam bồ Agribank anih lơh broă càr Dăk Lăk pà gĭt:“Tàm ală nam do den anih lơh broă kung neh lam lơh ală broă lơh gàr tơl niam rài kis mpồl bơtiàn li la uă, bơh dong kờl ai ală kơnòm bơsram, ală hìu bơsram, ală mpồl lơh broă bơto bơtê; dong kờl tơn jơh hìu lơh ing jat gùng dà broă lơh bơh Cíñ Phủ dê. Mờr tus mpồl lơh broă neh geh broă rơndăp lơh lam lơh dong kờl ală hìu bơsram geh phan bơna ờ diơng mờ tơn jơh 50 nơm hìu lơh ing tàm càr”.

Ờ mìng là bơta tam pà bal phan bơna, ală broă lơh lòt bal, dong kờl gàr tơl niam rài kis mpồl bơtiàn bơh ală mpồl cau, mpồl lơh sa kă bro gam pơgồp bơnah lơh gơrề uă kơnòl tài mpồl bơtiàn, tơngŏ nùs nhơm tàm dong tàm kờl bal, bơhiàn niam dong kờl kòn bơnus bơh jơi bơtiàn he dê, nàng mpồl bơtiàn bơtàu tơnguh bal, nàng ờ gŏ di lời dồ nă cau lơi gơtìp lời wơl bơh ngkời.