Lồi ƀùi mho 16/10, tàm Đà Nẵng, Thủ tướng Cíñ phủ ồng Phạm Minh Chính tus bal Dơ̆ bơyai lơh tơngkah kir sơnrai 80 nam Ngai bơhiàn mpồl phàu crong Ling tiah 5 (16/10/1945- 16/10/2025) mờ dờp rò Huân cương Hồ Chí Minh. Tiah 5 là bă ù “drim drơng mờ mìu càl rbŭt dờng mho kìng tơngai duh bè ồs”; geh ù tiah broă lơh is ồn kwơmàng bè ling klàng, sền gàr dà lơgar. Tàm ală nam do, mpồl phàu crong Ling tiah 5 neh lơh sir jak ngan tơl kơnòl broă, bơ̆t bơtàu kơnhoàl ù tiah rơcăng lài tàm tơrbŏ bal, kơ̆ kơnhăp; mơkung là mpồl cau tờm tàm rơcăng drơng mờ tơrmù ƀà trồ tiah lơh aniai, kòp bơtờp; dong Làng bol bơtàu tơngguh lơh sa, tơn jơh jơgloh tơrmù rƀah…Ala măt đơng lam Đảng mờ Dà lơgar, Thủ tướng ồng Phạm Minh Chính neh jàu pà Huân cương Hồ Chí Minh ai Mpồl phàu crong Ling tiah 5 in- Phan ƀàn dờng màng ngan cih dờp dà kơlhề, ơn pơdơng phi să mờ bơhiàn pơnrơ ngan bơh mpồl dê tàm 80 nam bơ̆t bơtàu, tam lơh mờ dờng kràñ. Thủ tướng dòn nền mpồl phàu crong Ling tiah 5 pơn jăt tai đòm jăt bơhiàn pơnrơ ngan, lơh ngan, pơnđơl lơh geh uă cồng nha bơh broă tam lơh, cồng nha lơh geh uă, tă pơgồp dờng rlau ai broă lơh bơ̆t bơtàu mờ sền gàr Dà lơgar tờm in.

Di dơ̆ do, Thủ tướng Cíñ phủ ồng Phạm Minh Chính tus mờ sồr lơh tàm dơ̆ bơyai lơh sơnđờm lơh rơndăp broă lơh Hìu bơsram pe kâp ơm sa bĭc tơn, ơm sa ngai Kâp dùl mờ Kâp bàr sàh Tây Giang, ƀòn dờng Đà Nẵng. Hìu bơsram do geh lơh kờp jơh priă bơcri rlau 260 tơmàn đong, digơlan lơh sir tàm gùl nam tơnơ̆.