Jăt Tiến sìh Lương Bạch Vân, Kong kơnòl Mpồl duh broă Bơto pơlam Lơh broă mờ lơgar ndai – Làng bol ơm kis tàm lơgar ndai gơ wèt Anih duh broă Mặt trận Dà lơgar Việt Nam ƀòn dờng Hồ Chí Minh dê, jơh ală gùng dà broă lơh tam gơl pa dờng ndrờm gơlòt jăt bal bơta ƀươn mờ bơta lòng mờ kwơmàng là pal lơh geh tiah nàng pơn jờng kwang bàng duh hồl, bơceh lơh, khin kơlôi, khin lơh.

Mò đơs là, ală tŭ rơndăp tăp sèng, tơrmù dipal mpồl lơh broă tŭ do rơ̆p pa ơm wơl tàm khà lơm- tơrmù anih lơh broă, tơrmù khà cau, tàm tŭ bơta tờm ngan là tam gơl bồ tơngoh kơlôi sơnơng, broă lơh broă, nàng tơl nă kwang bàng gơtùi rơcăng lam tam gơl bơta kơ̆p kờñ tam gơl pa gơgơs ngan ngồn.

 “Tŭ do gam kal ke ngan, kwang bàng pal lơh broă tus bàr dơ̆, tàm tŭ bơta lòt rê, gùng lòt…gam kal ke, kờñ pal sơrlèt gan. Jơh ală kơ̆p gơn gam ơn tàm mpồl cau lơh broă pa, gơ sồr kwang bàng pal gĭt wă jrô, jak broă mờng lơh. Bol he kơ̆p gơn, kơ̆p kờñ, kờñ ngan mơya nàng tam gơl bơta kờñ ngan gơgơs ngan ngồn den gơ sồr tơl nă cau pal brồ guh, pal pơnđơl uă ngan. Pal sơrlèt ală bơta kal ke bè hơ̆ den hơ̆ sồng gơtùi tam gơl pràn. Añ dòn là bol he rơ̆p lơh gơtùi”.

Cau chài cah rña mò Trương Thị Hoà, Phó Củ tịc Anih tờm lơh kòn gùng kă bro phan ƀòn dờng Hồ Chí Minh đơs là nàng kwang bàng khin kơlôi, khin lơh den gơnoar broă cau lam bồ là jơnau tờm ngan.

 “Gùng dà broă lơh do tŭ do bulah geh uă jơnau đơs, uă cau ờ khin mơya añ kơlôi là cau lơi neh khin lơh là lơh, gĭt wă loh là khin. Lơh di den là di, geh gơtìp bơta lơi ờ. Loh làng ngan mơya kwơmàng là kơrnoăt boh lam pal loh làng song dơ pă. Den tàng ală jơnau lơh nền tàm pơrjum Đảng dê pal di tŭ, lơh gơs adăt boh lam. Đảng den gùng dà broă lơh bơceh lơh, lòt gờñ…jơh ală ndrờm pràn kơldang mờ adăt ờ hềt jăt thàn den sơnđàc cau kwang bàng kông cưk”.

Sền gàr kwang bàng khin lơh ờ gŏ di là tò dong tàm mpồn ai tìs in ờ mờ là sền gàr bơta bơceh lơh tài bơta kwơ bal. Tàm dùl bơta sền kơlôi ndai, mò Phạm Thị Quyên, Phó Củ tịc Ală mpồl Lơh broă càr Tây Ninh đơs sùm là, gơ wèt mờ kwang bàng ala măt cau lơh broă, nùs nhơm khin kơlôi, khin lơh, khin kong kơnòl pal gơ jăt bal mờ gơnoar broă sền gàr gơnoar mờ bơta kwơ dipal mờ kơrnoăt boh lam, dipal ngan bơh cau lơh broă dê.

“ Ală gùng dà, broă lơh hơ̆ pal geh lơh gơs adăt boh lam. Tŭ do, bol he neh geh Adăt Ala măt cau lơh broă (kông đoàn), tàm hơ̆ cih loh bè ală gơnoar, kơnòl bơh kwang bàng ala măt cau lơh broă dê. Bơdìh hơ̆ tai kung geh ală bơta adăt sền gàr cau kwang bàng ala măt cau lơh broă tŭ lơh jăt gơnoar broă, kơnòl broă he dê, is ồn là tàm broă ala măt, sền gàr gơnoar mờ bơta kwơ dipal mờ kơrnoăt boh lam, dipal ngan bơh cau lơh broă dê. Den tàng, hơ̆ là dùl bơta kwơmàng ngan gĭt lơh mờ cau kwang bàng ala măt cau lơh broă tŭ do geh đau”.

Bơta đah sền bơh cau neh geh tŭ lơh broă uă nam mờ Mặt trận, ồng Nguyễn Hoàng Năng, lài do Củ tịc Anih duh broă Mặt trận dà lơgar Việt Nam ƀòn dờng Hồ Chí Minh đơs là gùng dà broă lơh do di mờ kờñ mơya nàng lòt mŭt ngan ngồn tàm rài kis den kung gam kờñ gùng dà loh làng, ndrờm bal bơh hơđăng tus hơđơm.

 “Añ kơlôi là Pơrjum dờng Đảng gùt lơgar rơ̆p sồr geh dùl gùng dà broă lơh lơh bè lơi sir niam rlau nàng dong ai cau kwang bàng in tàm lơh lòt bơsong broă pin dờn rlau. Is ồn tŭ do mìng gam gơnoar ătbồ ƀòn lơgar bàr kâp den lơh gơrềng bè lơi rềp mơya bơta ờ ndrờm pal kung ờ gŏ di là ƀươn rềp ờ. Pơnyơu lài do, sơnah ƀòn tus kwận mơya tŭ do sơnah ƀòn tus ƀòn dờng den gam geh dùl bơta yah lơyah ngan mơya bơta kung ờ gŏ di ƀươn. Gơn kơnờm tơngai tus, ală cau ala măt rơ̆p tă pơgồp jơnau đơs mờ Đảng nàng geh gùng dà broă lơh sir niam rlau”.

Mùl màl pà gŏ, bulah neh geh Jơnau lơh nền cíñ phủ dê sồ 73 nam 2023 bè sền gàr kwang bàng duh hồl, bơceh lơh, kung gam sơl jơnau pleh dô, tuh jàu kơnòl tài kwang bàng “ngòt tìs”, “ngòt gơtìp sồr kong kơnòl”. Jơnau rơcăng cih Jơnau lơh nền cíñ phủ pa bơh Ƀộ Broă dơlam is dê bè lơh glài kwang bàng, kông cưk, viên cưk bơtơl jơnau sồr ờ lơh glài ai kwang bàng lơh di broă pơlam lơh in, ờ jòi sa kwơ is mơya tìp rềs àr ờ gơtùi gĭt lài là broă bơtàu tơngguh kwơmàng, lơh gơs adăt boh lam nùs nhơm sền gàr cau khin kơlôi, khin lơh, lơh geh “bơta pin dờn tàm bơta dipal adăt boh lam dê” nàng kwang bàng iang nùs lơh broă tài bơta kwơ bal.