Tơngai lơh broă bơh nam 2020 tus 2025, Đảng ƀộ Anih duh broă Làng bol càr Dăk Lăk neh đơng lam, lam lơh tơl ală bơta jăt gùng dà broă lơh “loh cau, loh broă, loh cồng nha”, ai geh tam gơl loh làng tàm ală gah broă lơh sa, niam chài, mpồl bơtiàn, sền gàr dà lơgar – lơngăp lơngai. Khà gơguh GRDP tơl nă cau geh 6,24% tàm dùl nam; broă lơh sa mờ măi mok lơh gơs phan, bơceh lơh mờ năng lượng lơh geh wơl neh gơs tiah àng niam; lòt nhơl brồ guh pràn kơl dang; khà priă tăc phan mờ lơgar bơdìh gơguh 11,2% tàm dùl nam. Phan bơna tiah, mpồl lơh sa mờ măi mok geh lơh gơs, gơhòi gơjà uă rơndăp broă lơh dờng, pờ geh bơta dờng ơnàng bơtàu tơnguh pa.

Mŭt tàm tơngai lơh broă bơh nam 2025 tus 2030, Đảng ƀộ Anih duh broă Làng bol càr Dăk Lăk ai jơnau kờñ gơguh GRDP bơh 11,5% tàm dùl nam rơlao hờ đang; priă geh tơl nă cau geh 160 tơlăk đong tàm dùl nam; kờp jơh priă tăc phan mờ lơgar bơdìh geh rơlao 13 tơmàn dolar Mỹ; hòi jà geh 43 tơlăk nă cau lòt nhơl mờ priă geh di pơgăp 97 tơmàn 150 tơlăk đong; gơmù khà hìu rơƀah 2% tàm dùl nam, mìng is tiah làng bol jơi bơtiàn ờ gal cau gơmù 3% tàm dùl nam. Bơta tờm bơtàu tơnguh geh lơh sa mờ măi mok, lơh sa suơn sre ngui măi mok pa, tam gơl bơceh lơh, tam gơl sồ mờ bơtàu tơnguh cau lơh broă geh bơta jăk uă.

Ồng Nguyễn Đình Trung, Ƀí thư Tỉñ ủy càr Dăk Lăk đơs sùm, Pơrjum dờng dơ̆ do rơ̆p ai geh bơnàng jă tơngai bơtàu tơnguh pa in, ai tơngŏ gơnoar tề lam bơh Đảng ƀộ Anih duh broă Làng bol càr dê tàm gùng dà lơh geh mùl màl jơnau kơ̆p kờñ pas gơs càr Dăk Lăk dê: “Đảng ủy Anih duh broă Làng bol càr pal bơyai lơh jăt mùl màl nền nòn ală gùng dà broă lơh bơh Dà lơgar mờ lơh jăt di ală khà broă, kơnòl broă bal mờ gùng dà broă lơh jăt Jơnau lơh nền tàm Pơrjum bơh Tỉñ ủy dê nàng pơn jăt tai lơh ndrờm bal, tơl ală bơta mờ geh cồng nha uă, tàm hơ̆ uă ngan là gàr geh jơnau kờñ gơguh lơh sa 8% rơlao hờ đang tàm nam 2025, ai geh bơnàng jă nàng lơh geh jơnau kờñ gơguh lơh sa 2 sồ tàm tơngai lơh broă tus do. Lơh pràn ală broă hòi jà bơcri priă, pơn jăt tai lơh ală gùng dà broă lơh pràn nàng lơh mhar broă bơcri priă dà lơgar, tàm hơ̆ uă ngan là ală broă lơh kwơ màng. Di tŭ bơsong kal ke ai geh bơta pràn lơh pràn broă bơtàu tơnguh lơh sa mpồl bơtiàn tàm tơngai tus”.

Đảng ƀộ Anih duh broă Làng bol càr Dăk Lăk ai geh jơnau kờñ tơrgùm bal tàm tơngai lơh broă pa bơh nam 2025 tus 2030 là: Tơnguh uă bơta pràn đơng lam, bơta pràn tam dră Đảng ƀộ dê, tam klăc bal, dùl nùs, dùl pràn bal lơh geh cồng nha jơnau kờñ kơnòl broă tus nam 2030. Lơh pràn broă lơh niam sră nggal, tơnguh pràn kơl dang tiah bơcri priă kă bro, lơh pràn lơh sa cau dùl nă să bơtàu tơnguh, tơnguh uă bơta pràn jăk cau lơh broă; tơnguh uă broă atbồ phan kwơ geh is mờ sền gàr tiah kis; bơtàu tơnguh pràn kơl dang bơta chài măi mok, tam gơl bơceh lơh, tam gơl sồ; tơrgùm bơtàu tơnguh lơh sa pơgồp bal mờ tam gơl sồ, tam gơl tơlir, pơgồp bal bơ̆t bơtàu càr Dăk Lăk kơ̆ kơl jăp, bơtàu tơnguh, pas gơs, gơguh jăk, niam chài krơi is, kơ̆ nùs pin dờn bal mờ dà lơgar mŭt tàm rài pa – rài brồ să jơi bơtiàn lơgar Việt Nam dê.