Mho òr (08/09), Anih duh broă Làng bol càr Gia Lai bơyai lơh pơrjum sền sơ wì broă lơh sa mpồl bơtiàn nhai 8. Broă lơh sa bơh càr Gia Lai dê geh uă bơta niam, mơya kờñ pal lơh pràn broă ai priă bơcri Dà lơgar den hơ̆ sồng gơtùi lơh geh jơnau kờñ gơguh lơh sa 8% gùt nam. 

Jat jơnau yal, khà sồ sơñio bơh gah lơh sa mờ măi mok nhai 8 càr Gia Lai dê gơguh 6,8% pơndrờm dùl tŭ bal mờ nam lài; lòt nhơl bơtàu tơnguh wơl pràn mờ 9 tơlak 800 rbô dơ̆ nac, gơguh 16%; priă lơh geh bơh tac phan hờ lơgar ndai geh rlau 2 tơmàn 180 tơlak dolar Mỹ, ndrờm 3/4 broă rơndap lơh gùt nam. Lùp dồs priă dia 8 nhai geh rlau 18 rbô 395 tơmàn đong. Bulah bè hơ̆, khà ai priă bơcri Dà lơgar tàm càr Gia Lai rơp pa geh rlau 60% broă rơndap lơh. Uă rơndap broă lơh kuơmàng kung gam gơ kòl bè sră pơ àr, ai ù lơh rơndap broă mờ tơngai lam lơh rơndap broă. Tềng đap bơta geh ngan do, ồng Phạm Anh Tuấn, Củ tịc Anih duh broă Làng bol càr Gia Lai sồr tơrgùm lơh ngan ai ală broă lơh phan bơna kuơmàng in. Đơng lam ală sờh, gah broă lơh, ală tiah kờñ pal sồr lơh tơn, lòt sền, kờp sền tơn tơl rơndap broă lơh; lơh broă rơndap lơh ai priă mùl màl jat tơl tŭ tơngai nàng di tŭ tă bơsong kal ke.