Ùr bơklau bi Trương Thị Tuyết Vân, ơm Tổ zân phố ƀòn Từ Nham, sơnah Sông Cầu, neh đềt mềr mờ broă ròng ka ty dờng tơlir rlau 15 nam do tàm tiah dà lềng Hòn Mắm. Bi Vân pà gĭt, bơh ngai jat broă lơh do, ờ hềt tŭ lơi trồ tiah lơh aniai gơmŭt kơn jơ̆ kơn jŭt ngan bè mìu càl rơbŭt dờng sồ 13 (Kalmaegi) dơ̆ do dê. Jơh ală rlau 60 hìu gŭ ròng mờ 1 rơbô 500 ka ty dờng tơlir kă bro mờ 3 rơbô ka ty dờng sơntìl ndrờm gơtìp mìu càl rơbŭtt dờng lơh aniai jơh, uă hìu gŭ tus tŭ do kung ờ hềt jòi gŏ sơl. Priă dồs gĭt nđờ rơhiang tơlak đông càn mờ anih priă jền nàng bơcri priă, priă bơcri kơ̆p gơn tàm kàl kŭp katy dờng tơlir mờr geh tăc, tŭ do kung gơtìp cò pơr dô jơh jat mìu càl rơbŭt dờng. Bi Vân, pà gĭt:“Hoàc huơr dờng ngan, tài bơh hìu gŭ pơgồp bal mờ bàr pe hìu bơnhă, mơya gơtìp pơr dô jơh rao, tàm tŭ hìu gam dồs mờ anih priă jền 500 tơlak đong, mờr tus tơngai tơm. Ùr bơklau kơ̆p kờñ Dà lơgar dong kờl nàng pơn jat tai ròng katy dờng tơlir, ờ gŏ ròng den ờ gĭt lơh bơta lơi tai. Bol añ kung kơ̆p kờñ anih priă jền dong kờl lời ing dồs, tơrmù ƀà priă cồng mờ dilah gơtùi den ai càn tai priă jền nàng bơcri tai priă jền lơh sa, jòi priă jền nàng tơm dồs”.

Mò Nguyễn Thị Sáu, ơm tàm thôn Phú Mỹ, sơnah ƀòn Sông Cầu, kung gam ờ hềt jơh rơngòt tơnơ̆ mìu càl rơbŭt dờng ngan do. Rlau 120 nơm hìu gŭ mờ rlau 2 rơbô nơm ka ty dờng tơlir kă bro bơh hìu bơnhă dê, bơnah gơtìp dà pơr dô ƀà, bơnah sèt jơh hìu gŭ lơh ka ty lik bơdìh, gơ lơh bè roh jơh rao. Mò Sáu gơ dan ñìm pà gĭt, digơlan là tàm nggùl nhai 11 do rơ̆p tăc nàng tơm jơh bơnah dồs 1 tơmàn 500 tơlak đong ai anih priă jền in, mơya mìu càl rơbŭt dờng gơmŭt neh cò pơr dồ jơh ală bơta: “Hoàc huơr den ờ hềt gĭt nền, mơya hìu bơnhă añ kờp dŭ roh jơh ka ty dờng. Ka ty dờng tơlir do lah 5 tus 7 ngai tai tăc den hơ̆ sồng tơm dồs anih priă jền in den mìu càl rơbŭt dờng tus. Ka ty dờng roh jơh den cau kung roh jơh sơl. Hìu bơnhă kơ̆p kờñ anih priă jền lời ing dồs, ờ sa priă cồng nàng bơcri priă lơh sa wơl, tơm dồs hời rơ hời”.

Dà lềng sơnah ƀòn Sông Cầu là tiah ròng tam phan tàm dà tờm ngan bơh càr Phú Yên yau do, tŭ do gơwèt càr Dăk Lăk, mờ ală bơta phan bơkah pơn rơ bè ka ty dờng tơlir, ka cim trắng, ka mú. Mìng is tiah Hòn Mắm, Vũng Chao tŭ do geh rlau 92 rơbô 800 hìu gŭ ròng phan tàm dà, uă ngan là ka ty dờng tơlir bơh pơgap 720 hìu bơnhă làng bol. 

Ồng Huỳnh Đình Quang, Phó Củ tịc Anih duh broă Làng bol sơnah ƀòn Sông Cầu, yal jơnau mìu càl rơbŭt dờng sồ 13 (Kalmaegi) lòt gan tiah do mờ bơta mìu càl pràn ngan, bulah ờ lơh hoàc huơr bè kòn bơnus mơya neh lời wơl bơta hoàc huơr kơn jơ̆ kơn jŭt ngan bè lơh sa, is ồn là mờ ală hìu bơnhă ròng tam phan tàm dà jat kềng gah dà lềng. Tŭ do, Anih duh broă Làng bol sơnah ƀòn do gam mhar kờp sền, tơrgùm kờp bơta hoàc huơr mờ dan mờ ală anih lơh broă geh gơnoar gờñ lam lơh broă lơh dong kờl làng bol. Ồng Huỳnh Đình Quang, đơs:“Ròng tam phan tàm dà đơs bal mờ ka ty dờng tơlir đơs is den hoàc huơr dờng ngan. Bol añ gam mhar kờp sền, tơrgùm kờp tơl jiơ, tơl ngai nàng geh ală bơta lơh broă mờ anih priă jền, dan mờ khi tơlik gùng dà broă lơh lời ing dồs, dong kờl tai priă bơcri ai làng bol in. Bơdìh hơ̆, bol añ kung cih mat ngan ngồn dan mờ Anih duh broă Làng bol càr Dăk Lăk ngui priă dong kờl bơh Kes priă rcang gàr lài, drơng mờ trồ tiah lơh aniai nàng dong kờl 1 bơnah hoàc huơr ai làng bol in”.

Nàng dong kờl ală hìu bơnhă in ròng tam phan tàm dà, ală mpồl ai càn priă tàm ù tiah sơnah ƀòn Sông Cầu neh lơh geh ală bơta ai rlau 600 nă năc in càn priă bơcri lơh sa, kă bro. Mìng is Agribank sơnĕ Sông Cầu - Phú Yên geh rlau 300 nă năc mờ kờp jơh priă dồs 150 tơmàn đong. Ồng Hoàng Vũ Phi Phong, Kwang lam bồ Agribank sơnĕ Sông Cầu - Phú Yên pà gĭt, mpồl lơh broă gam pơgồp bal mờ ală anih lơh broă geh gơnoar lam lơh uă broă lơh dong kờl năc bơtàu tơnguh wơl lơh sa. Ồng Phong sơñio loh làng bàr pe broă lơh rơ̆p geh ngui nàng dong kờl năc gơtìp hoàc huơr tàm dơ̆ mìu càl rơbŭt dờng sồ 13 pa do:“Gơwèt mờ ală hìu bơnhă ờ gam geh ală bơta nàng lơh sa, bol añ rơ̆p ngui broă lơh lời ing dồs jat jơnau sồr bơh Anih priă jền Dà lơgar dê. Ală năc ờ hềt tus khà lời ing dồs, bol añ rơ̆p kờp sền digơlan ai càn priă jền tai, halà rơndăp tăp sèng wơl dồs, tơn jŏ tơngai tơm dồs mờ priă cồng tơn, nàng năc in geh tŭ tơngai bơtàu tơnguh wơl lơh sa, kă bro. Bơdìh hơ̆, bol añ kung ngui broă lơh tơrmù priă cồng nàng ai làng bol in tơrmù ƀà priă jền bơcri priă wơl ròng phan tàm dà”.

Broă lam lơh di tŭ ală broă lơh ai càn priă dong kờl jat jơnau sồr bè lời ing dồs, tơn jŏ tơngai tơm dồs, tơrmù ƀà priă cồng ai càn neh lơh geh tai bơta gơn kơnờm nàng làng bol tiah mìu càl rơbŭt dờng in brồ guh. Bơta lòt bal bơh gơnoar atbồ mờ mpồl ai càn priă ờ mìng dong làng bol ntào guh wơl tơnơ̆ ală bơta roh rui tài bơh trồ tiah lơh aniai lơm mờ gam lơh geh bơta gơn kơnờm nàng khi in bơcri priă wơl, bơtàu tơnguh wơl lơh sa. Tơl hìu gŭ ròng phan tàm dà hời rơ hời geh lơh wơl, cèng tai bơta kơ̆p kơnờm bè dùl kàl dà lềng pa lơngăp lơngai rlau, hờm ram rlau tai.