Tàm ƀòn Kniết, sàh Ea Ktur, càr Dăk Lăk, hìu bơnhă bi H’Lối Êban (kòn cau Rơđê) bơyai lơh dơ̆ chờ hờp mut ơm hìu pa tàm nùs nhơm ram mhŭ, hô hơng mờ bơta tus bal uă ngan làng bol ƀòn lơgar dê. Hìu ơm dờng niam, mờ priă tă lơh rlau 400 tơlak đong, geh lơh tàm gùl suơn kơphê tơlir tơ̆t plai uă ngan, sền tàm ƀlàng sre “trăp prong” tơlir niam, lơh geh ù tiah lơngăp lơngai, hờm ram. Bi H’Lối pà gĭt: Lài do là hìu bơnhă rƀah, geh Dà lơgar dong kờl pà kơnrồ dra, deh geh 2 nơm kòn bè; hìu bơnhă tăc kòn bè ai geh priă jền nàng ròng sur me, pa tăc geh 50 tơlak đong. Tŭ do, priă lơh geh tờm bơh hìu bơnhă dê là bơh 6 sào kơphê, tam tàm bơrlŭ bal mờ tiêu, sâu riêng.

Kòn klau tơnhoa pa lơh sir kơnòl broă ling klàng, kòn ùr dềt gam bơsram kấp pe. Geh rài kis lơngăp lơngai, chờ hờp bè tŭ do, bi H’ Lối pà gĭt: “Ưn ngài ală wa kwang àng neh atbồ mờ sền gàr làng bol, sền gàr lơngăp lơngai, rơndăp tăp sèng ƀòn lơgar. Kwang àng kung bơto pơlam ai làng bol in lơh jat di gùng dà broă lơh bơh Dà lơgar, lơh sa bơtàu tơnguh. Bè hìu bơnhă añ do, bơh hìu bơnhă rƀah neh sơr lèt gan kal ke. Kơphê, tiêu tăc geh giă mờ kung geh sầu riêng, ròng tai kơnrồ, ròng sur tềm pềr, den tàng hìu bơnhă añ neh bơt geh hìu ơm do”.

Bi H’Nhân Niê ơm tàm ƀòn K’ram sàh Ea Ktur pà gĭt, pah nam kwang àng drờm bơyai lơh lam lơh srơh Jơh gùt làng bol sền gàr lơngăp lơngai Dà lơgar. Bơh hơ̆, dong làng bol gĭt geh kai, broă lơh lơh broă bơh ală mpồl cau pơrlơ̆ dră, bơchồc, tam cah is mpồl tam klăc jơi bơtiàn. Kwang àng kung sơñio loh broă lơh bơh ală cau lơh tìs pơrlồm sơgràm phan bơna tàm internet, bơta ơruh pơnu lơh tìs lòt rê tàm gùng... Bi H’Nhân Niê đơs nền, cau ùr tàm sàh Ea Ktur sùm lòt bal mờ srơh “Jơh gùt làng bol sền gàr lơngăp lơngai Dà lơgar”. Bi H’Nhân Niê pà gĭt:“Oh mi cau ùr bol he ơm tàm hìu pal bơto oh kòn ờ gŏ di sền tàm internet kờñ mờ tam pà bal halà lơh jat jơnau bơchồc pơrlơ̆ dră mờ Dà lơgar, pơrlơ̆ dră mờ ƀòn lơgar. Bol añ sùm bơto tơngkah oh kòn, kòn sau, tŭ lòt rê tàm gùng, tơl sơnam hơ̆ sồng đì rơndeh. Tàm mpồl cau ùr kung bơto tơngkah oh kòn, kòn sau, oh mi tàm ƀòn rềp bal ờ gŏ di iăt jơnau đơs blăc bơh lơgar bơdìh dê”.

Là Mục sư atbồ Ci hội Tin lành sàh Ea Ktur, ồng Y Djan Êban ơm tàm ƀòn Kniết, sàh Ea Ktur – Ala mat Mpồl Duh broă Làng bol càr Dăk Lăk, pà gĭt: rài kis làng bol dê ram mhŭ, chờ hờp, khat gơboh gah pin dờn jat Yàng, pơrjum gah pin dờn jat Yàng kung kơnờm geh bơta sền gàr bơh mpồl kwang àng ală kấp dê:“Añ gŏ kwang àng bơh sàh tus càr tus bal sền gàr Dà lơgar mờ dong làng bol geh bơta lơngăp lơngai. Pơn yơu bè, ờ geh kwang àng den làng bol lòt rê tàm gùng ờ geh bơta duh rơngòt adat boh lam ờ tài bơh ờ gŏ gĭt wă; gơlik geh uă dơ̆ rềs àr, tam lah tam ring gơlik geh uă broă ndai tai. Kwang àng broă sơn rờp ngan là sền gàr Dà lơgar, dơ̆ 2 là sền gàr ƀòn lơgar. Bơta hơ̆, ngan ngồn kwơ màng mờ kwơ ngan”.

Mờ 23 nam rềp mềr mờ gah lơh broă Kwang àng, Trung tá Y Sila Êban, Atbồ Mpồl Sền gàr Lơngăp lơngai- Kwang àng sàh Ea Ktur, càr Dăk Lăk pơn yờ să tài bơh neh pơgồp bơnah tàm broă lơh sền gàr lơngăp lơngai Dà lơgar, gàr niam rơndăp tăp sèng, lơngăp lơngai mpồl bơtiàn tàm ƀòn lơgar:“Tŭ do, añ kung geh dùl nă kòn klau gam jat bơsram gah kwang àng, jat broă lơh añ dê. Kơ̆p kờñ là làng bol ờ gŏ di jat ală bơta lơi mờ cau ndai bơchồc lơh roh bơta lơngăp lơngai, mờ pal lơh ngan tĕ lơh broă tam kơphê, tam tiêu nàng bơtàu tơnguh lơh sa hìu bơnhă dê”.

Bồ nam do, tàm sàh Ea Ktur, Mpồl Ơruh pơnu Kwang àng Làng bol- Ƀộ Kwang àng pơgồp bal mờ ală mpồl lơh broă tàm càr Dăk Lăk bơyai lơh broă lơh “Rê mờ ƀòn lơgar”. Bal mờ broă kah ưn ngài, còp, pà phan dong kờl ai hìu bơnhă cau ling chơ̆t màng, broă lơh neh lơh niam wơl 3 nơm hìu niam chài mpồl bơtiàn, dong kờl lơh 1 nơm hìu 19/08, 1 nơm hìu Kờñ gơboh kòn bơnus; tàm jàu 1 broă lơh “Cơldŭ măi tíñ ai oh in” mờ jàu 100 bơnah priă bơsram dà Mỹ, 20 nơm rơndeh coh pà kơnòm bơsram in...

Trung tá Du Lê – Lam bồ Kwang àng sàh Ea Ktur, càr Dăk Lăk pà gĭt, lam lơh ală broă lơh dơ̆ lơh uă dơ̆ kŭp, kơryan cau lơh tìs gàr niam lơngăp lơngai rơndăp tăp sèng ală broă lơh Tơngkah kir sơnrai 80 nam Kăc màng Nhai 8, Sơntờm Dà lơgar ngai 02 nhai 09 mờ Pơrjum dờng Đảng ală kấp, ală mpồl lơh broă sơlơ tơnguh tai lòt sền, sền gàr phan tam, sền gàr cồng nha lơh broă ai làng bol in: “Dơ̆ do, den kwang àng sơlơ tơnguh tai broă lơh tam dră, rcang, kơryan cau lơh tìs tàm dơ̆ bơyai lơh uă, gàr niam lơngăp lơngai rơndăp tăp sèng tàm kàl sầu riêng, kàl plai bơnàng. Oh mi lòt sền gĭt ală bơta tàm ù tiah ƀòn lơgar, tìp mat mờ ală cau duh broă Yàng, cau geh bơngă pin dờn tàm tiah jơi bơtiàn dồ ết nă cau, tơngkah làng bol sền gàr phan bơna, drơng gàr kàl tam phan. Bơdìh mờ hơ̆ den pơgồp bal mờ kwang àng, dilah gĭt gŏ geh bơta pin pơrdah den di tŭ yal mờ kwang àng sàh mơ”.

Rê wơl tàm sàh Ea Ktur tàm ală ngai nhai 8 kah yau, dùl dà tơlir niam ngan bơh brê kơphê, tiêu tơ̆t plai uă ngan... yal tơngĭt lài dùl rài kis hờm ram. Nàng ƀòn lơgar Ea Ktur in bơtàu tơnguh, ală cau ling kwang àng neh mờ gam lòt bal mờ làng bol tàm tơl bơta kơlôi sơnơng, broă lơh; gàr kơ̆ lơngăp lơngai rơndăp tăp sèng, kơryan kai tam cah is mpồl tam klăc dờng jơi bơtiàn, sền gàr bơta lơngăp lơngai, chờ hờp ai tơl hìu bơnhă mờ ƀòn lơgar in.