Mpồl lòt sền tam cah gơs 2 jơnum, lòt sền tơn tàm 8 sàh, sơnah ƀòn, geh: Xuân Lãnh, Sông Cầu, Phú Yên, Tuy An Nam, Krông Năng, Krông Pắc, Ea Kar sơnah ƀòn Buôn Ma Thuột. Tàm ală sàh, sơnah ƀòn, mpồl rơp iat jơnau yal, cribơyai mờ đơng lam kâp ủy, gơnoar atbồ, mặt trận, ală mpồl, gah lơh broă geh gơrềng bè broă lam lơh kơnòl broă bơtàu tơnguh lơh sa – mpồl bơtiàn, broă lơh tam gơl wơl sră pơ àr gơnoar atbồ, tam gơl sồ mờ broă lơh bơh mpồl lơh broă sră pơ àr gơnoar atbồ dê tơnơ̆ tŭ rơndap tap sèng jat broă lơh 2 kâp.

Mùl màl tàm bàr pe sàh, sơnah ƀòn ai gŏ, bơdìh mờ ală tam gơl niam, broă lơh gơnoar atbồ 2 kâp kung gơtìp uă ngan sơl kal ke. Khà broă gơguh uă tơnơ̆ tŭ tơmut bal tàm tŭ cau lơh broă sa priă nhai dà lơgar ờ hềt geh ai di tŭ, uă broă bè măi mok yal jơnau tơnggit, priă jền – sền sơ wì tă dơ̆ ngui priă jền gam ờ tơl kwang bàng lơh broă ờs mờng, lơh gơbàn bơta uă ir broă. Bal mờ hơ̆, phan bơna, hìu lơh broă ờ hềt drơng wơl jat jơnau kờñ, phan bơna măi mok yal jơnau tơnggit ờ hềt kơ̆, broă bơsong sră nggal ù tiah mờ bàr pe sră pơ àr tàm internet gam gơtìp gơ kòl.. Mpồl lòt sền rơp tơrgùm jơh, yal Anih duh broă Lơh kơnòl broă sùm Quôk hội in nàng geh ală jơnau dan broă lơh bơsong gơ in di tŭ.