Mìu dờng dà tih dà lìu lơh ờ diơng rlau 5 gơl gùng dờng, koèl kơh Prenn, 3 gơl gùng càr mờ uă gơl gùng tàm ù tiah càr Lâm Đồng, mờ priă tă lơh bơsong wơl kờp dŭ 361 tơmàn đong. Tàm koèl kơh Mimosa, Mpồl atbồ rơndăp broă lơh 85 gam pờ gùng ing, kờp dŭ lơh sir ngai 29/11/2025; broă lơh lơh rƀàng tềng hơđang ù gờl ơnàng 9 thơk neh geh kĭ ring bal mờ rơ̆p sơnđờm mut lơh mơ tàm ngai 10/12 do, kờp dŭ mut lơh tàm tơngai bơh 3 tus 4 nhai. Tàm koèl kơh D’ran, tiah tơrlah ù gam khòm tơrgùm ù, pơnđơl pràn lơh ngan lơh sir lài mờ ngai 10/12 do; koèl kơh Gia Bắc neh bơsong gơl gùng lòt rê.

Tàm dơ̆ pơrjum, ồng Nguyễn Hồng Hải, Phó Củ tịc Anih duh broă Làng bol càr Lâm Đồng đơs lah broă lơh atbồ, sền gàr lơh niam ală gơl gùng lòt rê tờm tàm tơngai pa do, is ồn là gơl gùng koèl kơh Prenn- mpồng tờm lik mut tàm Dà Làc. Ồng sồr Sờh Bơt bơtàu mơ Mpồl sền gàr lơh niam gùl ù gờl càr dê dờp atbồ, lơh niam wơl jơh lài mờ tơngai sa tềp nhai he dê, gàr niam lơngăp lơngai lòt rê tàm gùng tàm tơngai lồi nam.