Tàm càr Khánh Hoà, uă tiah tàm tiah kơh bơnơm gam gơtìp koh gơl is. Gơnoar atbồ ală sàh neh hòi jà mpồl dong kờl bơh mpồl lơh broă nùs nhơm dong kờl is tàm broă ntrờn, tàm hơ̆ uă ngan là lòt gan ală tiah tơrlah ù, rơbàng lìu ngòt rơngơ̆t.

Tŭ rơndeh pơn diang phan tus tàm sàh, mpồl ling, đoàn viên bal mờ làng bol àñ phan dong kờl tus tàm ală thôn gơtìp koh gơl is. càr Khánh Hoà neh yal 48 anih dờp tam pà phan dong kờl tàm sàh. Ală mpồl lơh broă nùs nhơm dong kờl is geh sồr lùp lài nàng git jơnau yal, pơgồp bal tam pà khà phan tă pơgồp is. Ală anih lơh broă geh gơnoar kung sồr ală làng bol mờ ală mpồl lơh broă nùs nhơm dong kờl is pal rơcang ngăc tềng đăp mờ ală jơnau hòi jà ờ git loh làng, pleh ngòt cau ờ niam sơgràm nùs nhơm niam nàng lơh geh kwơ is.