Jăt tơrgùm kờp bơh sơnrờp, Dăk Lăk neh gĭt gŏ 1 nă cau chơ̆t; uă hìu đam gơtìp gơpồ rơkàng, bàr pe nơm hìu gơtìp tơrlơm jơh, phan bơna jơtài ờdiơng jơh tài bơh dà lìu mŭt tàm hìu; bàr pe gơl gùng gơtìp ngơr dà. Đại tá ồng Lê Văn Hùng, Phó đơng lam, Lam bồ Mpồl dong broă Gah đơng lam ling klàng càr Dăk Lăk pà gĭt, tàm mang tơn, gĭt nđờ rhiang nă kwang bàng, cau ling neh geh hòi tus, ntrờn mờ ca nô mờ rơndeh mờng ngui tus ală tiah ngơr jrô, kơnhoàl ù tiah gơtìp koh gơl nàng ntrờn làng bol, jun cau kra, kơnòm dềt tus tiah niam lơngăp lơngai.

Tơnơ̆ mìu càl rbŭt dờng, tàm mang tơn, ồng Đào Mỹ, Phó Củ tịc Anih duh broă Làng bol càr Dăk Lăk, Lam bồ Mpồl đơng lam tiah tờm gơbàn tàm sơnah ƀòn Sông Cầu neh să tờm tơn lòt sền tiah gơbàn, sồr lơh bơsong, ngan là yal tơngkah lài niam lơngăp lơngai tŭ làng bol rê wơl dăp wàs hìu đam, pleh rềs àr tài bơh đèng, chi gơ pừ mờ ală phan sòñ har tơnơ̆ mìu càl rbŭt dờng. Tŭ do, ală mpồl lơh broă geh gơnoar tàm Dăk Lăk pơn jăt tai drơng gak sùm ngai mang, kờp sền nền wơl ală tiah gam ngơr, dong kờl làng bol rê wơl hờ hìu, kơ̆ kơl jăp rài kis, dăp wàs chi che, sền swì lơngăp lơngai gùng che đèng, nàng kờñ lơh wơl rài kis ơm kis mờ lơh sa gờñ ngan rlau jơh dilah gơtùi.

Cih dờp bơh sơn rờp, jơh gùt càr Gia Lai geh 2 nă cau chơ̆t. Bơdìh hơ̆, 2 nă cau tàm sơnah ƀòn Quy Nhơn mờ sơnah ƀòn An Nhơn gơtìp sồt să. Tơrgùm bơh sơn rờp, tàm Gia Lai geh 45 nơm hìu gơtìp tơrlah jơh, rlau 2 rơbô 400 nơm hìu gơ pồ rơkàng hìu. Mìu càl rơbŭt dờng sồ 13 kung lơh 1 nơm plung gơ krăm, 3 tiah gùng lòt rê tàm sàh An Vinh gơtìp tơrlah.

Tàm tiah Hoài Nhơn Bắc, dà lềng gơguh tuh lơh ngơr băm rlau 3 rơbô hìu bơnhă làng bol jat kềng gah dà lềng, bơta jrô ngơr băm kờp bal bơh 10 tus 40 phơng, geh tiah gơguh tus 80 phơng. Gĭt nđờ rơbô lồ kòi mờ phan tam lơyah ngai gơtìp ngơr jơh tàm dà, uă phan poan jơng, iar ada chơ̆t; tờm chi, jrong đèng, kƀàng, mpồng krơh gơtìp càl puh gơ pừ, bơcah kờn jơ̆. Jơh gùt càr ờ geh đèng tàm uă tiah, tàm yal tơngĭt mờ uă tiah gơtìp tam cah is, tus tŭ do ờ hềt bơsong jơh. Tŭ do, uă tiah kung gam pơn jat tai kờp sền, tơrgùm kờp hoàc huơr, tài bơh bàr pe tiah gam gơtìp tam cah is, ờ hềt tàm yal gĭt gơtùi.

Tàm càr Quảng Ngãi, jăt tơrgùm kờp ờ hềt wil tơl, 50 nơm hìu gơtìp gơpồ rơkàng, ờdiơng, is ồn sàh Long Phụng hoàc hươr kơn jơ̆ ngan rlau jơh mờ 45 nơm tài bơh càl gơpồt pràn. Bơta do pà gŏ kơnhoàl ù tiah kềng gah dà lềng mờ tiah lơyah kung gam sơl là tiah kong gơrềng pràn tŭ mìu càl rbŭt dờng lòt tus. Bè gùng lòt, uă gơl gùng tờm gơtìp gơrềng. Bơta gơbàn do pà gŏ pơhìn tơrlah ù tàm ală kơnhoàl ù tiah bơnơm kung gam uă ngan sơl, ngan là tŭ ù neh tram jŏ tàm dà. Tŭ do, ală ƀòn lơgar gam pơn jăt tai tơrgùm kờp hoàc hươr, bơsong ing, mơkung jăt sền nền ală tiah geh pơhìn uă nàng kờñ gàr niam lơngăp lơngai ai làng bol in.