Mùl màl, tàm sàh Ia Hiao, mìu dờng jŏ jòng neh lơh 120 hìu bơnhă làng bol gơtìp ngơr bam hìu; 109 lồ sre lơh kòi kàl mìu, 86 lồ tơngời, khoah rbài mờ 43 lồ bùm blàng gơtìp gơ pừ, ngơr bam, kờp dŭ hoac huơr rlau 2 tơmàn 400 tơlak đong.

Bal mờ broă lam lơh ală broă lơh jal mhar gàr niam lơngăp lơngai làng bol in, gơnoar atbồ sàh gam kờp sền, dan càr mhar ring bal rơndap broă lơh lơh ƀòn ơm kis pa ai ală hìu bơnhă sùm gơtìp ngơr bam pah nam in, mờ kung dan dong kờl priă jền lơh sa wơl, gàr niam rài kis làng bol in. Tàm sàh Ea Bung, càr Dăk Lăk bàr pe hìu bơnhă ơm tàm thôn 4 mờ thôn 12 gơtìp ngơr bam dà, gơl gùng lòt ală sàh Ea Bung mờ Ia Rvê gơtìp tam cah ung.

Tàm sàh Ia Lốp, thôn 10 lòt gan thôn 11 gơtìp tam cah is, uă gơl gùng lòt tus ală thôn 6,8,9 gơtìp ngơr dà jrô, gùng lòt gơtìp ơm ing tàm bàr pe jiơ. Tàm sàh Tây Sơn, mìu dờng lơh tơrlah uă gơl gùng càr DT646 mờ bàr pe gơl gùng lòt tàm ală thôn, tàm blàng sre. Bal mờ hơ̆. geh  29 nơm kơn rồ gơtìp dà cò pơrdô; kơlik hìu, pơng gàr hìu bơsram Mầm non dà lơgar Phước Tân gơtìp tơrlah jòng pơgăp 40 thơk. Tŭ do, gơnoar atbồ ƀòn lơgar neh hòi jà mpồl cau bơsong, dong kờl làng bol mờ gàr niam lơngăp lơngai gùng lòt rê.

Mìu dờng lơh gơbàn ngơr bam rlau 300 hìu làng bol tàm 4 thôn bơh sàh Hiệp Thạnh, càr Lâm Đồng dê. Nàng dong làng bol mhar gàr kơ̆ wơl rài kis, gơnoar atbồ sàh pơn jat tai sồr kwang bàng, cau ling kwang àng, ling klàng dong kờl làng bol ntrờn phan bơna bơh tiah ntrờn rê tàm hìu. Tàm sàh kềng gah dà lềng Hòa Thắng, mìu dờng lơh ù bràs gơ mut tàm 2, 3 hìu làng bol. Pôs ling sền gàr tiah nhàr lơgar Hòa Thắng sồr kwang bàng, cau ling tus dong kờl làng bol pơs wàs hìu đam, gàr niam wơl rài kis.