Anih yal tơngĭt lài trồ tiah dà ia càr Lâm Đồng pà gĭt, 90% bă ù tàm ù tiah do dê neh gơbăm dà jơh, pơhìn uă ngan gơlik geh dà kŏ dà cò tàm ală dà croh dềt mờ tơrlah ù tàm tiah kơh. Ală tiah bè: Dam Rong, D’Ran, Lạc Dương, Nam Ban, Hiệp Thạnh… bal mờ ală gơl gùng koèl kơh Gùng dờng 20, 27, 27C, 28B, Đại Ninh, Prenn mờ Mimosa ơm tàm bơta tơngkah lài is ồn.

Ai tàm càr Dăk Lăk, jat Anih yal tơngĭt lài trồ tiah dà ia càr dê, uă tiah làng bol ơm kis tiah lơyah, tiah thòng tàm Dăk Lăk neh sơnđờm ngơr bam dà; bàr pe gơl gùng lòt rê tàm ală sàh, ală thôn sơnđờm gơtìp tam cah is. Tơrlah ù kung neh gơlik geh tàm uă tiah koèl kơh tàm Khánh Hoà mờ Lâm Đồng. Bơdìh mờ dơ̆ tơrlah ù lơh 5 nă cau chơ̆t pa gơlik geh tàm koèl kơh Khánh Lê, ù tiah càr Khánh Hoà, gĭt nđờ jơ̆t tiah tơrlah ù ndai neh geh cih dờp tàm koèl kơh Ngoạn Mục mờ koèl kơh Khánh Sơn – tàm tơrbŏ Khánh Hoà mờ Lâm Đồng. Mpồl lơh broă geh gơnoar neh wàng se ing koèl kơh Ngoạn Mục nàng gàr niam bơta lơngăp lơngai.