Tàm anih ơhò ơm dà lềng Quy Nhơn, gĭt nđờ jơ̆t nă kwang bàng, cau ling Mpồl ling dà lềng Sền gàr tiah nhàr lơgar 2 mờ Pôs đồng ling sền gàr tiah nhàr lơgar Mpồng tiah nhàr lơgar anih ơhò ơm dà lềng Quy Nhơn ờ ru ngan tui 120 tấn phe bơh Kụk Ơn prăp phan Dà lơgar dê pà ai làng bol Gia Lai in. Dà kơl hề sùh jơh pơnì ào mơya cau lơi kung gam pơnđơl pràn lơh ngan uă ngan rlau jơh nàng di tŭ jun phan dong kờl tus mờ làng bol ală sàh Quy Nhơn Bắc, Quy Nhơn Đông mờ Tuy Phước, ală tiah kong hoàc huơr kơn jơ̆ kơn jŭt ngan rlau jơh bơh dà tih dà lìu dê. Trung tá Nguyễn Tùng Giang, Cíñ trị viên Pôs đồng Ling sền gàr tiah nhàr lơgar Mpồng tiah nhàr lơgar anih ơhò ơm dà lềng Quy Nhơn, pà gĭt:“Bol añ hòi jà tă pơgồp bal bơh ală cau geh nùs nhơm niam dong kờl rlau 3 rơbô bơnah phan pà, 300 nơm ồi tơ̆, 30 khối dà dong kờl ai làng bol tiah gơtìp dà wềl in. Tàm tơngai tus, bol añ pơn jat tai ai mpồl ling dong kờl làng bol rê wơl mờ rài kis bè ờs”.

Bơdìh mờ tơrgùm jơh bơta pràn ai broă lơh dờp mờ jun pơndiang phan dong kờl, ală mpồl ling sền gàr tiah nhàr lơgar gam tus tàm tơl tiah nàng dong kờl làng bol drơng rài kis. Tàm sàh Ngô Mây mờ Cát Khánh, 20 nă kwang bàng, cau ling Pôs đồng ling sền gàr tiah nhàr lơgar Cát Khánh pơgồp bal mờ mpồl ling tiah do dê tam pà 15 nơm rơndeh pơndiang phan dong kờl tus ală thôn Chánh Hữu, Chánh Định, Chánh Hội mờ Vân Trim. Dùl mpồl ling ndai lòt tus ală gơl gùng gơtìp tơrlah ù, khòm wàs ù tiah, dong kờl làng bol tùng, tui, àñ phan, pơs wàs sàng goh hìu đam. Thiếu tá Nguyễn Hữu Tự Thắng, Cíñ trị viên phó Pôs đồng Ling sền gàr tiah nhàr lơgar Cát Khánh, pà gĭt:“Tŭ do, uă gơl gùng tờm neh ai lòt rê. Pôs đồng ling sền gàr tiah nhàr lơgar Cát Khánh pơgồp bal mờ ală mpồl ơm tàm ù tiah do dê hòi jà ală cau geh nùs nhơm niam pơn jat tai dong kờl làng bol bè dà hùc, phan ngui pah ngai, phan sa, sơnơm tơm ba, jun tus tàm tiah do in nàng làng bol in ngui; pơs wàs jơh tiah ơm kis, toah wàs mbè ai kơnòm bơsram in gờñ lòt bơsram tàm hìu bơsram”.

Tàm Hìu bơsram kấp 2 Nguyễn Bá (sàh Tuy Phước), Lữ đoàn 573 (Ling tiah 5) toah wàs mbè, rơndăp wơl kƀàng, cơghĕ, pơs wàs cơldŭ bơsram, rcang ală bơta niam ngan rlau jơh ai broă wă kơnòm bơsram lòt bơsram wơl. Ùr pơgru Hồ Thị Minh Phụng ngoh rơngăc pà gĭt:“Mpồl ling neh dong hìu bơsram, dilah mìng kơnờm tàm cau pơgru lơm den hìu bơnhă khi dê gam uă ngan broă ờ gơtùi tus ờ. Den tàng ưn ngài ngan ală mpồl ling klàng neh dong kờl ală hìu bơsram nàng di tŭ ao ală kơnòm in tus hìu bơsram”.

Tàm dơ̆ mìu dờng dà tih dà lìu pa do, gĭt nđờ jơ̆t nă kwang bàng, cau Ling tiah 5, Ling mpồl 34 mờ Gah đơng lam Mpồl ling klàng càr Gia Lai neh dơ̆ lĕ bal lik lòt, pơgồp bal mờ kwang àng mờ gơnoar atbồ ală tiah bơyai lơh dong kờl rềs àr, ntrờn gĭt nđờ rơhiang rơbô nă làng bol lik bơh tiah sơbơng roh; lam lơh dong kờl gĭt nđờ jơ̆t rơbô dơ̆ làng bol tàm tơngai kal ke ngan rlau jơh bơh dơ̆ trồ tiah lơh aniai dê. Kơnờm tàm bơta mut lơh bal kràñ cê jơh nùs mờ di tŭ hơ̆, bulah hoàc huơr bè jơ tài phan bơna kờp dŭ rlau 1 rơbô tơmàn đong, Gia Lai kung gam pleh geh chơ̆t jê uă. Mờ tiah dà kŏ dà lìu Gia Lai, mpồl ling là tiah dong kờl màng kis, là tiah kơldìng kơ̆ ngan, lòt bal mờ làng bol sơr lèt gan bơta lòng.

Ai tàm sàh Đồng Xuân, càr Dăk Lăk, Đại tá Nguyễn Trường Sinh, Lam bồ Sư đoàn 2, Ling tiah 5, pà gĭt, dà tih dà lìu dờng neh lơh ờ diơng uă ngan broă lơh bơt bơtàu mpồl bơtiàn mờ hìu đam làng bol dê. Mpồl broă lơh bơh mpồl ling dê dong làng bol là dờng ngan tŭ pal pơs wàs sàng goh tiah ơm kis, mơkung pal bơsong ală broă tiah ơm kis, pleh gơtìp bơ̆ bơl tiah ơm kis, mơkung dong làng bol lơh niam wơl hìu đam, bơt wơl hìu. Mờ nùs nhơm jơh nùs lơh ngan uă ngan rlau jơh, mpồl ling lơh ngan lơh sir gờñ ngan rlau jơh kơnòl geh jàu tàm tiah dà kŏ dà lìu dê:“Kwang bàng, cau ling Sư đoàn 2 mờ nùs nhơm lơh ngan uă ngan rlau jơh, mờ tơngai mhar ngan rlau jơh, rơ̆p lơh ngan bal mờ gơnoar atbồ ală tiah, ală mpồl ling tàm dồ bă tiah rơ̆p bơsong ală tiah tờm, tiah kal ke uă, nàng mhar ngan ai lơh broă bơh gơnoar atbồ, is ồn là ală hìu bơsram, hìu sơnơm mờ broă lơh bơh gơnoar atbồ, làng bol tiah do dê wơl rê wơl mờ rài kis bè ờs”.

Đại tá Đinh Văn Hưng, Cíñ uỷ Gah đơng lam ling Mpồl ling klàng càr Dăk Lăk pà gĭt,  tơnơ̆ tŭ lơh sir kơnòl broă dong kờl, tŭ do mpồl ling tơrgùm dong làng bol khòm tơrgùm pơs wàs jơh tơl hìu bơnhă mờ jơh bal tiah làng bol ơm kis, bơsong wơl ală gùng lòt rê, lơh niam wơl ală hìu sơnơm, lơh kơnhăp wơl hìu đam ờ diơng, pà phan ngui sa, sơnơm tơm ba, phan bơna lơh sơnơm, kơmùng, ồi tơ̆, ào mpha, phan ngui trŭ gơm phan sa nàng làng bol in bè ờs wơl rài kis: “Jơh nùs lơh ngan dờng ngan rlau jơh bơh kwang bàng, cau ling bơh Ƀộ Ling klàng, ală mpồl ling Ling mpồl, mpồl ling phàu crong càr dê gam lơh broă tàm ù tiah càr dê là tŭ lơi bơsong jơh jơnau gơ lời wơl tài bơh mìu dờng dà tih dà lìu, is ồn là jơnau gơ lời wơl tài bơh dà kŏ dà lìu dơ̆ do ală mpồl ling pa lơh sir kơnòl broă mờ pa rê tàm mpồl ling nàng lơh jat kơnòl broă pơn jat tai bơh he dê”.

Tàm mìu dờng dà tih dà lìu, rùp hin cau ling dùl dơ̆ tai cih jrô tàm nùs nhơm làng bol dê, ờ mìng là mpồl ling tam lơh sền gàr Dà lơgar lơm, mờ gam là tiah kơldìng kơnhăp kơ̆ bơh làng bol dê tàm tŭ kal ke. Tŭ mbè ù gam ờ hềt thàn rañ, tŭ rài kis kung gam kal ke siơ̆u siar, ală mpàng tê ao ling kung gam tơryang tơryồng ơm wơl, bơt wơl tơl nơm rơkàng hìu, pơs wàs sàng goh tơl gùng lòt rê, gơm tơl dơ̆ sào piang duh hồl ai làng bol in. Mpồl ling dong làng bol tiah dà tih dà lìu ờ mìng mờ bơta pràn lơm mờ jơh bal mờ nùs nhơm. Hơ̆ ngan là gơnoar broă bơh plai nùs bơh cau ling Wa Hồ dê tàm rài lơngăp lơngai tŭ do dê.