Tàm dơ̆ cribơyai, ală mpồl lơh sa kă bro dan tơrgùm tàm 4 mpồl broă dờng. Bè broă lơh, mpồl lơh sa kă bro dan gờñ ai lơh jat mã gah broă ai phan bơna is ồn in, lơh ƀuơn sră pơ àr mờ rơndăp broă lơh ồs đèng mat tơngai, pà mã tiah tam, bơyai lơh tàm pơrlòng dờp sră lơh broă gah kă bro ù tiah hìu đam mờ tă bơsong kal ke tàm  ai mat ù.

Bè priă jền, dan lam lơh bơnah ai càn priă dong kờl ai startup (hơ̆ là sơnđờm mut lơh broă), ai càn priă krơi is ai lơh gơlik phan lơh geh bơh broă lơh sa suơn sre mờ broă dong kờl ờ sa priă dia uă ai mpồl lơh sa kă bro măi mok in. Bè phan bơna bơt bơtàu, uă jơnau đơs rơndăp ù tiah ală tiah sàk pil rơndeh đèng, bơcri priă lơh logistics, anih ơn prap mrềt mờ lơh niam ală gơl gùng lòt rê tàm ală tiah. Bơdìh hơ̆, ală mpồl lơh sa kă bro kung kơ̆p kờñ ală ƀộ, gah broă mờ ală tiah sền gròi lam lơh ală mpồl sơnđờm mut lơh broă măi mok, bơto bơtê mpồl lơh broă sồ mờ lơh pràn mblàng yal bơceh lơh nàng kờñ tơnguh mat kă bro gah lơh geh bơh broă lơh sa suơn sre.