Tŭ do jơh gùt càr Dăk Lăk geh rlau 137 rbô nă đảng viên, 1 rbô 45 mpồl đảng kâp hơđơm mờ rlau 6 rbô ci ƀộ gơ wèt bal. Tơnơ̆ rơndăp tăp sèng mpồl lơh broă sră pơ àr gơnoar ătbồ, Dăk Lăk neh tơnggơs 102 đảng ƀộ sàh, sơnah ƀòn pa; jơh ală jơnau yal tơnggĭt đảng viên geh cih yal tàm ală anih ătbồ tơrgùm bal. Lơh jăt di nùs nhơm sră nggal là “lơh dipal broă lơh tơrlòng mpồl kâp hơđơm, tơngguh uă bơta niam pơrjum ci ƀộ”, càr neh ai lơh jăt uă bơto pơlam nàng lơh geh wơl bơta rơndăp tăp sèng pơrjum mờ bơtàu tơngguh đảng viên tàm tiah sar tiah ngài. Ồng Y Nhuân Byă, Phó Lam bồ Mpồl Rơndăp broă Tỉñ ủy càr Dăk Lăk pà gĭt: “Lài ngan, pơn jăt tai tơngguh tai broă lơh mblàng yal nàng lơh jăt kràñ Bơta boh lam Đảng dê; dơ̆ bàr, bơto pơlam nền cê rlau kâp hơđơm nàng tơngguh uă bơta niam pơrjum; dơ̆ pe, lơh pràn yal tơnggĭt làng bol jak ngan, bơtàu tơngguh đảng viên tiah sar, tiah ngài; mờ dơ̆ puan, pah nam pal geh sền swì jăt sền tơngume tơl anih duh broă đơng lam đảng, tơl ci ƀộ bè broă lơh jăt Bơta boh lam Đảng dê”.

Tơngume do kung dipal mờ pơlam gùng tàm Jơnau rơcăng cih Jơnau yal tơn jơh là “bơtơl jơnau sồr loh làng bè pơrjum ờs mờng pah dơ̆ bơh ci ƀộ dê, bơsong jơnau lơh đah bơdìh lơm, ki ngàm duh rơngòt tàm sền tìs di is mờ sền tìs di”. Tàm Dăk Lăk, bơh ală dơ̆ lòt sền nam 2024, 85% mpồl đảng kâp hơđơm geh đơs lơh sir niam kơnòl broă; bulah bè hơ̆ kung gam sơl rlau 30 ci ƀộ pơrjum ờ hềt ndrờm bal, tơnggume ờ hềt jrô. Tàm kâp hơđơm, broă lơh ătbồ đảng viên kung gam sơl là broă kal ke. Ồng Nguyễn Ngọc Thịnh- Ƀí thư Ci ƀộ jơnum làng bol tiah drà 6 Tân Lợi, sơnah ƀòn Buôn Ma Thuột yal: Tơnơ̆ tơmŭt bal ƀòn lơgar, uă sàh, sơnah ƀòn geh khà đảng viên gah, tàm hơ̆ pal sền ngăc là jơnau đảng viên kơnòm să lòt lơh broă ngài ngai sơlơ gơguh, lơh broă gàr sùm bơta rơndăp tăp sèng pơrjum ci ƀộ tìp uă kal ke.      

“Ci ƀộ bol hi geh 30% đảng viên kơnòm să lòt lơh broă ngài, broă ătbồ kal ke ngan. Añ sồr pal sền swì jrô rlau bè ătbồ đảng viên kâp hơđơm, ờ mìng sền gròi khà sồ lơm mờ pal lòt mŭt tàm cồng nha”.Mùl màl do kung ndrờm bal mờ tơngume mờ sră nggal cih: pal “kơlôi sơnơng bơtơl jơnau sồr bè ătbồ đảng viên tam gơl lòt rê, đảng viên bơdìh kơnhoàl ù tiah dà lơgar”. Jăt Mpồl Rơndăp broă Tỉñ ủy càr, Dăk Lăk tàm uă sàh tiah sar tiah ngài, khà đảng viên ờ geh mat tàm dơ̆ pơrjum sùm gơ pơgăp bơh 15 tus 20%. Bàr pe ci ƀộ mìng gam bàr pe nă đảng viên ơm kis sùm lơm den tàng pơrjum pal pơgồp bal. Tềng đăp bơta hơ̆, càr gam lơh tơrlòng lài phan ngui “Ătbồ đảng viên tam gơl lòt rê”, jàu anih duh broă đơng lam đảng kâp hơđơm in kong kơnòl cih yal jơnau yal tơnggĭt mờ gàr sùm pơrjum ai đảng viên lòt lơh broă ngài in.

Bơta đah sền kơlôi sơnơng, sră nggal tơn jơh bơh Dà lơgar dê đơs broă lơh sền swì, jăt sền “neh geh tơngguh tai mơya kung gam ờ hềt dipal tàm sền gŏ, lơh glài lơh tìs mờ jăt sền sùm”. Tàm Dăk Lăk, tơngai bơh nam 2021- 2025, jơh gùt càr neh lơh rlau 1 rbô 200 dơ̆ lòt sền, jăt sền; gŏ mờ đơs tơngkah rlau 300 dơ̆ broă geh tềl tơnggŏ lơh tìs, gơmù mờr 30% pơndrờm mờ tơngai lơh broă lài. 100% kwang bàng lòt sền geh pơlam tam gơl sồ, rơhời gơgơs broă lơh tơrlòng lài “jăt sền tàm jơnau yal tơnggĭt, sền swì tàm jơnau yal tơnggĭt”, dong gŏ gờñ lơh tìs, rơcăng lài bơh chờm tơn. Tiến sìh mò Phạm Thị Xuân Nga- Phó Kwang Lam bồ Anih kơlôi sơnơng Jak chài Mpồl bơtiàn tiah Tàm gùl lơgar mờ Tây Nguyên đơs là, nàng lơh jăt di nùs nhơm sră nggal sền Pơrjum dờng XIV, pal pơn jăt tai lơh sir mpồl jăt sền is mờ song dơ pă loh làng rlau: “Bơh mùl màl pơrjum ci ƀộ, bol hi gŏ pal tơngguh tai bơta song dơ pă loh làng, làng bol lơh tờm tàm jăt sền; bơsong jơnau ki ngàm duh rơngòt tàm đơs đảng viên, mơkung lơh pràn ngui măy mŏk tàm ătbồ mờ tơn jơh cồng nha lơh jăt Bơta boh lam Đảng dê”.

Bơdìh mờ sền swì dơlam is, sră nggal kung gĭt nền loh gơnoar broă jăt sền mpồl bơtiàn bơh Mặt trận Dà lơgar Việt Nam dê mờ ală mpồl cau cíñ trị - mpồl bơtiàn. Tàm càr Dăk Lăk, pah nam, Mặt trận pơgồp bơnah lơh jăt gĭt nđờ rơhiang dơ̆ jăt sền bè lơh jăt jơnau sồr pal jăt làng bol lơh tờm tàm kâp hơđơm, broă lơh kwang bàng, bơsong lòt lùp yal yă, yal loh làng ờ ndơ̆p mpồn kes priă dà lơgar, nùs nhơm lơh kơnòl broă dà lơgar mờ broă lơh krơh bơh cau lam bồ dê. Nam 2024, jơh ală anih lơh broă Mặt trận neh lơh rlau 250 dơ̆ jăt sền, đơs 420 tơngume geh anih lơh broă geh gơnăp gơnoar iăt kơno, mblàng yal lơh loh. Jăt đảng viên jŏ nam ồng Lê Hữu Chỉnh tàm sơnah ƀòn Buôn Ma Thuột den Mặt trận Dà lơgar jăt sền là dipal ngan rlau jơh.

 "Jăt sền bơh Mặt trận dê pràn ngan, tài bơta mặt trận là bơh jơh gùt làng bol dê. Bơta dipal ngan nàng cau dờng was kờp den hơ̆ ngan là Mặt trận, tài Mặt trận ờ geh gơnoar broă lơi tàm gơnoar ătbồ. Jăt añ bè hơ̆ là niam ngan mờ mìng là he lơh niam geh Mặt trận, bơta hơ̆ den kung di là jơnau kờñ Đảng dê nùs nhơm làng bol dê”.

Bơh mùl màl Dăk Lăk gơtùi gŏ, ală tơngume đơs tàm Jơnau rơcăng cih Jơnau yal Tơn jơh 15 nam lơh jăt Bơta boh lam Đảng dê gam geh ƀòn lơgar lơh loh làng bơh broă lơh mờ broă lơh tơrlòng lài mùl màl. Mơya nàng ală jơnau sồr gơlòt mŭt tàm rài kis, pal pơn jăt tai lơh sir mpồl lòt sền, jăt sền sùm sùm bơh ci ƀộ tus kâp càr, mơkung lơh gơs adăt boh lam gơnoar broă jăt sền mpồl bơtiàn bơh Làng bol mờ Mặt trận dê tàm Bơta boh lam tam gơl. Tŭ sền swì mờ jăt sền gơgơs mờng kwèng lơh tam gơl niam wơl is, Bơta boh lam Đảng hơ̆ sồng mùl màl là dipal jơnau sồr lơh broă tàm rài kis cíñ trị Đảng dê.