Tàm bơnah broă XL02, Rơndăp broă lơh bơnah 3, tơl gùng lòt gan sàh Tân Tiến mờ Vụ Bổn, càr Dăk Lăk, git nđờ jơ̆t nơm rơndeh lơh sơntăp ù, rơndeh pơn diang ù, măi dă cài bal mờ rơlao 30 nă cau lơh broă, cau chài gơwèt Kông ty CP bơ̆t bơtàu Tân Nam ur ar lik dă cài dơ̆ 2 tàm gùng. Bi Cao Văn Hoành, cau lơh broă tàm Mpồl dă cài kông ty pà git, nggùl nam do bi mìng rê còp hìu 1 dơ̆, tơngai gam tai ndrờm ơm lơh broă tàm tiah lơh gơl gùng do. Bi Cao Văn Hoành pà git: “Añ ơm lơh broă tàm tiah lơh gùng neh 6 nhai do bloh, oh mi tàm mpồl dă cài tŭ do gam tơrgùm dă cài gùng tăp 1 mờ tăp 2. Bol añ mìng ơm ală tŭ trồ mìu càl pràn, gam tai là lơh broă sùm ngai kung bè mang”.

Ồng Phan Xuân Phú, Cau lam bồ mpồl lơh 02 (Rơndăp broă lơh bơnah broă 3, Kông ty CP bơ̆t bơtàu Tân Nam) pà git, khà broă lơh geh di pơgăp 1 tơmàn 200 tơlăk đong, jòng 15 kơi sồ, lòt gan ală sàh Tân Tiến, Vụ Bổn mờ Ea Knuêc, càr Dăk Lăk. Tŭ do broă lơh gam gơtìp lơyài pơn drờm mờ broă rơndăp lơh geh ai, den tàng kông ty neh hòi jà rơlao 120 nơm phan lơh broă, bal mờ 200 nă cau lơh broă, cau chài lơh ngai kung bè mang tam pà bal uă dơ̆ lik lơh, lơh sùm tàm ală ngai mờ ờ geh ơm nàng bơtơl tàm tơngai gơtìp lơyài.

Ală khà broă tờm lơh, tàm hơ̆ geh dă cài tăp 1, tăp 2, lơh gùng làng bol lòt lơh broă, pơngàr gùng lòt; mờ kông ty kung geh ală broă pơlam, dong kờl cau lơh broă. “Oh mi tàm kông ty gam lơh sùm tàm ală ngai, ờ geh ngai ơm, mờ broă dong kờl priă nhai kung geh kông ty tơm di mờ jơnau geh ai”.

Tàm Rơndăp broă bơnah broă 2 geh Ƀộ Bơ̆t bơtàu lơh tờm bơcri priă lòt gan ală sàh Krông Á, Yang Mao mờ Cư̆ Pui, nùs nhơm lơh broă kung gơguh ngan sơl. Bi Nguyễn Đình Cường, cau chài lơh gơwèt Kông ty CP Tập đoàn Đạt Phương, do là mpồl lơh bơnah broă XL03 mờ 3 nơm rơbàng ù gờl mờ 1 gùng trồm mŭt jòng 2 kơi sồ lòt gan sàh Cư̆ Pui, càr Dăk Lăk pà git, do là bơnah broă lòt gan ù tiah kơh uă mờ kal ke ngan tàm gơl gùng dê. Jơh ală bă ù lơh ndrờm geh tàm brê dờng, tiah lơh dòr bơnơm kơh uă.

Pah ngai kông ty kung gam ai git nđờ rơhiang nă cau lơh broă bal mờ uă rơndeh, măi mok lơh rơbàng mờ lơh gùng trồm. “Tŭ do 100 nă cau gam bơyai lơh tuh bê tông tàm rơbàng tềng Kơi sồ 64 lòt gan sàh Cư̆ Pui; di pơgăp 200 nă cau ndai den tam pà lơh bàr mpồl lơh nàng ƀă pơrgan ală bê tông tơrbŏ rơbàng. Bol añ lơh ngan lơh sùm tàm ală ngai, geh bal ngai ơm rơlô nàng lơh bè lơi tus ngai 30 nhai 6 nam 2026 rơ̆p lơh gơs jơh ală rơbàng mờ gùng trồm”.

Ồng Phạm Văn Hoà, Phó Kwang lam bồ Mpồl Lơh rơndăp broă bơcri priă lơh Broă lơh sa suơn sre mờ Gùng lòt càr Khánh Hoà yal, tŭ do tiah gơkòl bè tơm ntrờn ù tiah tàm Rơndăp broă lơh bơnah 1 lòt gan càr Khánh Hoà geh mpồl do lơh tờm bơcri priă neh geh bơsong. Mpồl lơh broă do gam sồr ală cau tờm bơcri priă lơh ngan ai jơh bơta pràn rơndeh, măi mok bal mờ cau lơh broă nàng lơh bơtơl tơngai neh gơtìp lơyài, geh bal tàm bơta trồ tiah ờ niam. “Kal ke uă ngan là tơm ntrờn ù tiah den neh lơh gơs, mơya lơh tàm kàl mìu den rơ̆p kal ke mờ pal gơdờp bal. ală cau tờm bơcri priă ngui broă lơh koh dà mờ broă lơh rơbòng tơlik dà nàng tŭ dà soăt mhar den pơn jăt tai lơh broă. Nùs nhơm “ờ ngòt trồ tơngai, trồ mìu” den oh mi ndrờm lơh ngan nàng lơh geh di jăt jơnau neh geh ai”.

Ồng Trương Công Thái, Phó Củ tịc Anih duh broă Làng bol càr Dăk Lăk đơs nền bŭ lah broă lơh tàm Rơndăp broă bơnah broă 3 mìng rơ̆p geh di pơgăp 80%, hơ̆ là lơyài di pơgăp 20%, mơya mờ nùs nhơm lơh broă jal mhar, ờ geh ngai ơm, jơnau kờñ geh ai rơndeh lòt jơh gùt gơl gùng tàm lồi nam 2025 là geh ngan. Ồng Trương Công Thái đơs: “Càr Dăk Lăk gam mŭt tàm kàl mìu, bol añ sồr ală cau tờm bơcri priă lơh broă rơndăp lơh dă cài tàm gùng tŭ trồ ờ mìu, di lah mìu den lơh pơngàr, tuh bê tông tềng tiah tam cah gùng mờ jăt gah gùng lòt. Mờ nùs nhơm lơh ngan uă, bol añ hơ rơ̆p geh ai rơndeh lòt tàm lồi nam 2025 do”.

Mờ broă lơh ngan uă bơh cau tờm bơcri priă bal mờ ală cau tờm lơh, gơl gùng rơndeh lòt mhar sơnrờp ngan tơrbŏ brê bơnơm mờ dà lềng tàm tiah Đah jum tàm gùl lơgar rơ̆p lơh gơs tàm nam 2027, pờ geh dơ̆ niam bơtàu tơnguh lơh sa mpồl bơtiàn, pơgồp bal mờ broă gàr niam dà lơgar lơngăp lơngai tàm bơta pa tơnơ̆ mờ tŭ tơrgùm bal.