Chờ hờp bal mờ làng bol tiah làng bol ơm kis Thắng Kiên, sàh Đề Gi, Thủ tướng ồng Phạm Minh Chính đơs sùm, ngai chờ tam klăc dờng jơh gùt jơi bơtiàn geh bơyai lơh tàm tơngai mìu càl rơbŭt dờng sồ 13 pa do lơh gơbàn jơnau  gơ lời wơl ờ hềt tŭ lơi geh tàm rài kah yau dê. Tàm bơta kal ke hơ̆ kung gam geh tiah kơl dìng là bơta đơng lam bồ di ngan, chài ngan bơh Đảng dê; bơta mut lơh bal bơh jơh ală anih lơh broă cíñ trị, bơh làng bol, bơta đơng lam bơh ală kấp gơnoar atbồ; nùs nhơm tam klăc dờng jơh gùt jơi bơtiàn.

Jờng rơ uă ngan ală cồng nha lơh geh mờ Đảng ƀộ, gơnoar atbồ mờ làng bol bol dê đơs bal, sàh Đề Ghi đơs is neh lơh geh tàm tơngai pa do, tă pơgồp tàm cồng nha lơh geh bal bơh Dà lơgar dê, Thủ tướng kung sồr kấp ủy, gơnoar atbồ ală tiah tơrgùm bơsong jơnau gơ lời wơl bơh mìu càl rơbŭt dờng sồ 13 dê: "Lài ngan pal lơh wơl hìu đam ai ală hìu bơnhă gơtìp tơrlah in bơh tŭ do tus ngai 15 nhai 12 nhai he dê; lơh niam wơl hìu ờ diơng; lơh niam wơl ală phan bơna bơt bơtàu gùng lòt rê, lơh sơnơm, bơto bơtê; gàr niam broă lơh geh wơl, pờ gùng che ồs đèng, viễn thông; mhar ngan pơs wàs sàng goh tiah ơm kis; bơtàu tơnguh wơl lơh sa, kă bro, lơh geh broă lơh ai làng bol in. Bal mờ mpồl ling klàng, kwang àng, ơruh pơnu mut lơh bal  tàm broă dong kờl làng bol bơsong jơnau gơ lời wơl tài bơh mìu càl rơbŭt dờng; lơh jat niam broă lơh gơnoar atbồ ƀòn lơgar 2 kấp; bơtàu tơnguh lơh sa- mpồl bơtiàn, lơh geh broă lơh ai làng bol in”.

Thủ tướng kung sồr càr Gia Lai rơndăp tăp sèng wơl ală tiah làng bol ơm kis, tiah lòt nhơl, lơh sa kă bro đah bơdìh; làng bol kờñ pal ơm kis tàm tiah tàm dơlam nàng gàr niam bơta lơngăp lơngai. Lam lơh tiah ơm kis pa ai làng bol in; sồr pal rcang niam sa Tềp ai làng bol in. Pơn jat tai sền gròi tơnguh uă bơta gĭt wă rcang ngăc lài ai làng bol in tềng đap tơl kai kơrmơ̆i tam dră, tam cah is, bơchồt bơh ală mpồl cau gơ jrañ kơ uềng dê sơmờm ală bơta. Gàr niam lơngăp lơngai, sền gàr “sàh ờ geh ma túy”, “sàh ờ geh cau lơh tìs”, “sàh ờ geh cau rƀah”.

Kung tàm poh lài, Phó Thủ tướng Cíñ phủ ồng Mai Văn Chính neh tus bal Ngai chờ Tam klăc dờng jơh gùt jơi bơtiàn tàm tiah làng bol ơm kis ală thôn Suối Cau - Suối Sâu - Bến Khế, sàh Bắc Khánh Vĩnh, càr Khánh Hòa. Do là tiah kơh bơnơm geh gal làng bol kòn cau Raglay, bal mờ 9 kòn cau ơm kis tam klăc bal, hời rơ hời tam gơl pa muh mat ƀòn lơgar tiah kơh bơnơm dê. Ală tiah làng bol ơm kis geh rlau 1 rơbô 100 hìu bơnhă, rlau 4 rơbô 600 nă cau geh ală cau Yoan, Raglay, Rơđê, Tày, Nùng, Dao, Mường, Lo, T’Rin… Ală nam do, làng bol khin cha tam gơl rơndăp tăp sèng phan tam, phan ròng; uă broă lơh lơh sa suơn chi bè tam sầu riêng, plai bung kơmhò tơlir, prìt pơgồp bal mờ ròng phan, lơh geh priă jền sùm.

Đơs tàm ngai chờ, Phó Thủ tướng ồng Mai Văn Chính đơs sùm, Ngai chờ Tam klăc dờng là dơ̆ jờng rơ ờs mờng tam klăc đềt mềr, là tiah lơh kah wơl nùs nhơm, bơta kơ̆p kờñ brồ guh; bơta bơta gơn kơnờm nàng “tam gơl pa bồ tơngoh kơlôi sơnơng, tam gơl pa broă lơh, khin cha kơlôi – khin cha lơh- khin cha kong kơnòl”, lơh geh bơta tam gơl pràn bơtàu tơnguh ai tiah kơh bơnơm in. Sàh kờñ pal rơwah broă lơh tơrlòng lài bè tơm bơh bơr mpồl bơtiàn, broă lơh tơrlòng lài bè gàr tơl niam rài kis mpồl bơtiàn, bơyai lơh “Nhai iăt làng bol đơs”, lơh broă sră wăc sềr rùp khà làng bol deh mờ sền gròi sền gàr hìu bơnhă rƀah, hìu bơnhă pa lik klàs rƀah.

Phó Thủ tướng ồng Ma Văn Chính đơs loh: “Pal lơh jat niam bơhiàn tơryang tơryồng, bơceh lơh bơh làng bol ală jơi bơtiàn dê, ngui niam bơta ƀuơn bơta pràn krơi is, bơta kwơ mpờl gŏ ngan bè ù tiah, nhơm trồ tiah, phan kwơ brê bơnơm mờ ù tiah dê nàng bơtàu tơnguh broă lơh sa suơn sre kơnhăp jŏ, broă lơh sa suơn sre ƀòn brê bơnơm, pơgồp bal mờ lòt nhơl mpồl bơtiàn, lòt nhơl sền gĭt. Sền gròi sền gàr brê, gàr niam bồ tô dà, sền gàr tiah ơm kis brê bơnơm- hơ̆ là broă lơh geh ngan rlau jơh nàng bơtàu tơnguh jŏ jòng. Gơnoar atbồ, Mặt trận Dà lơgar mờ ală mpồl cau pal kờñ rcang lài dong kờl làng bol gĭt mờ priă càn, bơta chài tam phan, jak chài măi mok, ngui tam gơl sồ tàm broă lơh sa, tăc bro phan bơna, nàng “cau lơh broă sa sồ, ƀòn lơgar sồ” gơs ngan ngồn tàm ù tiah Bắc Khánh Vĩnh dê”.

Di dơ̆ do, Phó Thủ tướng ồng Mai Văn Chính pà phan ai 2 hìu bơnhă geh bơngă pin dờn pơn rơ jak in, pơndờm pơnđiang làng bol pơn jat tai tam klăc bal, bơtàu tơnguh lơh sa, bơt bơtàu tiah làng bol ơm kis tơlir- sàng goh- niam, lơngăp lơngai, tàm kờñ gơ boh bal.