Tàm dar pơrjum, ală kwang geh jơng ndrờm ring bal mờ ală tơngume neh ai tơlik, mờ kung pờ tê ring bal Jơnau lơh nền tàm pơrjum tam gơl, jàu kơnòl broă bàr pe nă kwang geh jơng tàm Mpồl duh broă tĕ khà dà lơgar mờ Mpồl dềt dong broă Mpồl duh broă tĕ khà dà lơgar. Đơs pơn dut pơrjum, Củ tịc Quôk hội sồr ờ gŏ di lời gơlik geh tìs sră pơ àr lơh gơ rềng tus gơnoar tĕ khà, tơlik mat tĕ khà; bơyai lơh bơnĕ bơnài, mờng chài, “lơh bơh gờñ, bơh ngài”, loh cau, loh broă, loh tŭ tơngai, loh cồng nha, loh kơnòl; sơlơ tơnguh tai sền sơ wì, jat sền krơi is; ai cau tĕ khà lơh tờm.

Mpồl duh broă tĕ khà dà lơgar pơgồp bal bơnĕ bơnài, gơ lòt sùm đah dà lơgar mờ ƀòn lơgar; tơnguh kơnòl broă cau lam bồ dê; bơsong di tŭ bơta gơ kòl, broă gơlik geh, ngan là ù tiah kâp hơ đơm. Is ồn, tàm tŭ tơngai gam lam lơh broă lơh gơnoar atbồ 2 kâp, uă sàh gam pa, den tàng, ală ƀộ, gah broă lơh geh gơ rềng kờñ pal sền gròi, sồr lơh nền nòn. Sơlơ tơnguh tai broă lơh mblàng yal jơnau, măi mok, lơngăp lơngai, gơnoar cau tĕ khà, ngan là cau tĕ khà tàm tiah sar lơgar ngài, tiah nhàr lơgar, bồt dà lềng, cau lơh phan tàm tiah lơh sa mờ măi mok, ơruh pơnu, cau bơsram dờng. Ală anih lơh broă kờp sền ală broă rơcang lài wil tơl, nền nòn Pơrjum gùt lơgar lam lơh broă lơh tĕ khà tàm ngai 15 nhai 11 do; tơrgùm jơh khà kờp mpồl tĕ khà, mat ală mpồl tĕ khà mờ khà cau ala mat Quôk hội geh pồ tàm tơl mpồl nàng yal Mpồl duh broă tĕ khà dà lơgar in lơh nền mờ yal lài mờ ngai 25/12/2025.