Ồng Lê Minh Hưng, Thủ tướng Chính phủ tus bal dơ̆ sơn đờm lam lơh. Jat ồng Lê Minh Hưng, hìu ơm ai ơpah pal geh git nền là bơnah broă kuơmàng, jŏ tơngai, drơng gal làng bol, ngan là cau lơh phan, cau lơh broă, cau bơsram dờng, kwang bàng, cau lơh broă sa priă nhai dà lơgar mờ mpồl phàu crong geh jơnau kờñ uă bè ơpah hìu mờ giă dipal.

Thủ tướng sồr Hà Nội ai lơh tơrlòng lài, pal lơh lài, jal mhar sền nền wơl jơh rơndap ù tiah, bă ù, khà hìu phan bơna dà lơgar gam ngui ờ huan geh cồng nha nàng geh broă rơndap broă lơh sap sèng, rề ơnàng broă lơh hìu ơm ai ơpah; yal Thủ tướng Chính phủ in cồng nha tàm nhai 6 do tơn. Thủ tướng đơs loh, ală gùng dà, broă lơh tơrlòng lài Hà Nội dê dilah lam lơh geh cồng nha den rơp geh lam lơh uă tàm gùt lơgar. Đơs tàm dơ̆ sơn đờm lam lơh, ồng Vũ Đại Thắng, Chủ tịch Anih duh broă Làng bol ƀòn dờng Hà Nội đơs nền, do là broă lơh ngan ngồn nàng kờñ ai Jơnau lơh nền tàm pơrjum bơh Bộ Chính trị dê bè bơt bơtàu mờ bơtàu tơnguh càr lơgar Hà Nội tàm rài pa, Adat Càr lơgar, Rơndap ù tiah tơrgùm ală bơta càr lơgar mờ ală gùng dà broă lơh krơi is bơh Dà lơgar dê geh lơh jat ngan ngồn; ai tơnggŏ bơta lơh ngan kờñ lơh geh bơh Hà Nội dê tàm broă ngui geh cồng nha ală gùng dà geh jàu nàng lơh gơlik bơta gơn kơnờm gơguh lơh sa pa, ù tiah bơtàu tơnguh pa mờ ală bơta kuơ ai làng bol càr lơgar in.