Tàm sơnam 76, sŏ neh kò jơh lơm, mơya ồng Ksor Chuel, ơm tàm ƀòn Rưng Ama Nhiu, sàh Ia Rbol kung gam ngăc ngar, pràn kơl dang, nùs nhơm cau dờng sơnam bơh brê bơnơm dờng ơning ơnàng tàm Gia Lai dê. Pah ngai, ồng kung gàr sùm bơta mờng kwèng sền sră, kơlôi sơnơng broă lơh pa bơh Đảng mờ Dà lơgar dê nàng mblàng yal, dong kờl làng bol; bơdìh hơ̆, ồng kung sùm dong bơto bơtê mpồl kơnòm dềt tàm ƀòn jơnau đơs dà Mỹ, bơta gĭt wă niam chài- mpồl bơtiàn... Ồng Ksor Chuel, pà gĭt: “Añ jơh nùs hòi jà làng bol tàm ƀòn pal lơh geh ală bơta ai oh kòn he in lòt bơsram, gĭt sền akhar den hơ̆ sồng gơtùi lòt bơsram broă lơh, bơsram guh uă rlau tai nàng gah broă halà broă lơh kơl jap mờ geh Dà lơgar tơm priă nhai. Mờ lơngăp lơngai rài kis, mờ tă pơgồp dà kơl hề ai mpồl bơtiàn in”.

  Là dùl tàm ală ơruh pơnu kòn cau Jrai sơn rờp geh bơto bơtê tàm hìu bơsram Sư phạm tơnơ̆ tơngai tơngklàs, tàm sùm rlau 30 nam lơh broă bơh he dê, ồng Ksor Chuel neh bơto bơtê gĭt nđờ rơbô nă kơnòm bơsram tàm ală ƀòn lơgar. Uă cau tàm khà hơ̆ tŭ do là ƀák sìh, kỹ sư, kwang bàng kông cứk. Cau lơi kung kah bè cau pơgru bơh he dê mờ nùs nhơm kờñ gơboh, ki ngàm mờ gĭt ưn ngài. Bi Nay H’bloanh (kòn cau Jrai) kông cứk Cơldŭ lơh broă Niam chài- mpồl bơtiàn sàh Ia Rbol, kơnòm bơsram lài do bơh ồng pơgru Ksor Chuel dê, pà gĭt: “Pơgru Ksor Chuel là cau lơh bơto bơtê bơta gĭt wă ai añ mờ uă cau ndai dùl rơnàng bal mờ añ bơh rài bơsram kấp 2. Bơh bơta gĭt wă bơh pơgru dê, bơta pơnđơl pràn lơh ngan bơh să tờm, añ ting jat gùng lòt bơsram sră mờ tŭ do neh là kông cứk sàh Ia Rbol. Añ ki ngàm pơgru uă ngan. Kơnờm geh pơgru lơh gơ kờñ den tàng añ bơsram gơ gơs cau, geh bơta gĭt wă drơng broă mpồl bơtiàn”.

Tơnơ̆ tŭ jơh tơngai bơto bơtê, ồng Ksor Chuel pơn jat tai geh cau kra, cau kơnòm să tàm ƀòn sàh Ia Rbol gĭt tus tàm gơnoar broă Củ tịc Mpồl dong kờl bơsram sră sàh dê. Oh Nay Lê Quốc Duy (14 sơnam, kòn cau Jrai), ơm bal tàm ƀòn Rưng Ama Nhiu pà gĭt, mè bèp oh ndrờm ai ồng Chuel lơh krơh niam nàng oh mi tàm hìu bơnhă in lơh jat bal.

Ală oh kung sùm geh tìp mat ồng pơgru mờ geh lơh gơ kờñ tàm broă bơsram sră:“Tàm ală broă lơh niam chài halà ngai chờ bơh ƀòn dê, ồng Ksor Chuel sùm bơto bơtê ai rơnàng kơnòm să bol oh in pal geh bơta kơ̆p kờñ uă ngan; mờ kờñ geh bơta kơ̆p kờñ uă ngan gơ gơs bơta ngan ngồn den pal jơh nùs bơsram sră, bơsram tàp. Să tờm oh geh bơta kơ̆p kờñ gơ gơs dùl nă cau pơgru bơto môn Toán, oh gam lơh ngan bơsram tai tàm hìu bơsram cuyên càr dê mờ tơnơ̆ do là Hìu bơsram Đại họk Gah Sư phạm. Tŭ gơ gơs cau pơgru, oh rơ̆p lơh gơnoar broă mblàng bơto bơtê jơnau gĭt wă ai rơnàng tơnơ̆ oh dê”.

Sàh Ia Rbol geh 2 rơbô 236 hìu bơnhă mờ 10 rơbô 220 nă cau, tàm hơ̆ mờr 93% là làng bol kòn cau Jrai. Ală nam do, làng bol sùm tam klăc bal, jơh nùs bơtàu tơnguh lơh sa, hời rơ hời tơn jơh jơgloh tơrmù rbah; mơkung lơh jat niam gùng dà broă lơh bơh Đảng, adat boh lam bơh Dà lơgar dê mờ ờ gŏ lời cau ờ niam sơmờm, hoài jà, ờ geh cau lơi gơtìp cau ờ niam pơn jồ. Khà kơnòm dềt lòt bơsram tàm hìu bơsram lơh geh mờr 100%.

Jat ồng Nguyễn Chí Cường, Củ tịc Anih duh broă Làng bol sàh Ia Rbol, cồng nha do là bơta hòi jà, pơlam gùng dà bơh ală cau kra ƀòn, lam bồ ƀòn mờ cau geh bơngă pin dờn, tàm hơ̆ geh Cau pơgru jak Ksor Chuel:“Pơgru Ksor Chuel sùm lòt lài lơh krơh niam tàm broă lơh jat gùng dà broă lơh bơh Đảng, adat boh lam bơh Dà lơgar dê. Jơh nùs mblàng yal, hòi jà cau tàm hìu bơnhă, làng bol mpồl bơtiàn ơm kis tàm ală ƀòn tàm sàh Ia Rbol lơh jat geh cồng nha ală broă lơh bơh Anih duh broă Làng bol sàh dê lam lơh. Mơkung lơh jat niam broă bơtàu tơnguh lơh sa, gàr niam lơngăp lơngai rơndăp tăp sèng, lơngăp lơngai ƀòn lơgar tàm tiah do dê”.

Bulah neh ơm tàm sơnam “Cau kis tus 70 sơnam bơh lài tus tŭ do ờ hoan geh”, pràn kơl dang să jan ờ gam bè lài do tai, mơya ồng Ksor Chuel kung sùm jơh nùs jơh tồr mờ ngềt ngơ̆t tă pơgồp dà kơl hề ai ƀòn lơgar in. Tàm ồng, tơl nă cau gŏ dùl nùs nhơm kis niam - sơnam dờng bồ tơngoh sơlơ gĭt wă, tơryang tơrtồng pơgồp dà kơl hề bơt bơtàu mpồl bơtiàn kòn cau Jrai tàm ƀòn lơgar cau ling khin cha jak chài ngai sơlơ pas pràn.