Lài hơ̆ dùl ngai bal, Mpồl rơndăp broă Dà lơgar yal Jơnau lơh nền bơh Ƀan Ƀí thư dê ntrờn ồng Trần Phong, Phó Ƀí thư Tỉñ ủy, Củ tịc Anih duh broă Làng bol càr Quảng Trị, at gơnoar broă Phó Ƀí thư Tỉñ ủy càr Khánh Hoà tơngai lơh broă bơh nam 2025–2030.

  Đơs dờp at gơnoar broă, ồng Trần Phong tơngŏ bơta chờ hờp tŭ geh Ƀộ Cíñ trị mờ Ƀan Ƀí thư pin dờn jàu kơnòl broă, mơkung gơ yờ tơnguh uă nùs nhơm geh kơnòl, jơh nùs jơh tồr tài bơta bơtàu tơnguh bơh càr mờ rài kis làng bol dê. Ồng đơs nền rơ̆p bal mờ mpồl cau bal đơng lam càr lam lơh geh cồng nha Jơnau lơh nền tàm pơrjum bơh Pơrjum dờng Đảng ƀộ càr dê, ală broă lơh, broă dong kờl krơi is bơh Dà lơgar lời ai Khánh Hoà in; pơn jat bơt bơtàu Đảng ƀộ sàng goh, kơnhăp pràn, tam gơl pa broă lơh đơng lam, yờ tơnguh uă bơta pràn jak đơng lam; lơh kah wơl nùs nhơm khin cha kơlôi, khin cha lơh nàng kờñ lơh ngan ngồn jơnau kờñ ai càr Khánh Hoà gơ gơs ƀòn dờng gơwèt Dà lơgar tàm nam 2030.