Tàm dơ̆ pơrjum bơyai, 2 nă kwang đơng lam ring bal sơlơ tơnguh rlau tai tìp mat mờ cribơyai mpồl kwang bàng kâp dờng mờ ală kâp, lơh pràn tìp mat lơh kwèng đah ală anih lơh broă, mpồl lơh broă bơh 2 gah dê. Bàr nă kwang đơng lam ring bal pơn jat tai pơgồp bal jơh nùs, tàm dong kờl gơp tàm ală anih cribơyai lơgar rềp bal mờ ală lơgar, ngan là tàm Liên hợp quôk mờ Srơh ờ lơh bal. 

Việt Nam jờng rơ mờ tŭ lơi kung kờñ lơh rbàng tơrbŏ nàng Nepal sơlơ tơnguh tai lơh broă bal mờ ASEAN mờ sồr Nepal lơh rbàng tơrbŏ dong Việt Nam tơnguh pràn rlau tai bơta git gơp mờ ală lơgar tiah đah jum câu Á. Bàr nă kwang đơng lam ring bal pơgồp bal jơh nùs, tus bal tàm ală broă lơh ngan bal gùt plai ù tàm broă drơng wơl mờ tam gơl nhơm trồ tiah, lơh jat jơnau hơ pơrgon jơnau kờñ tuh tơlik nhơm ƀơ̆ rê hờ 0 tàm nam 2050 kung bè tus bal tàm ală broă lơh sền gàr ring lơngai bơh Liên hợp quôk dê.