Tàm ală gơl gùng bè gùng rơndeh lòt mhar Vĩnh Hảo – Phan Thiết; gùng 27, 28B, gùng kuèl Prenn… neh geh uă anih pơhìn gơlik geh tơrlah ù, lŭ lơh gơ kòl gùng lòt mờ lơh gơ rềng tus lơngăp lơngai bơh cau mờ rơndeh rơndồ lòt tàm gùng dê. Bal mờ hơ̆, bơta tơrlah, gơ kòl kung neh gơlik geh tàm uă gơl gùng bơh càr dê, tàm hơ̆ geh gùng Đạo Nghĩa – Quảng Khê; gùng DT715 lòt gan sàh Hàm Thuận…

Gơnoar atbồ ală tiah mờ gah lơh broă geh gơnoar càr Lâm Đồng neh sồr mpồl lơh broă, ai măi mok, phan bơna nàng lơh niam ală anih tơrlah, tuah wàs wơl gùng dà hòr… tồt ƀàng tơngkah lài gàr lơngăp lơngai làng bol in. Tềng đap bơta trồ tiah gơlik geh kal ke, Anih duh broă Làng bol càr Lâm Đồng neh geh sră nggal sồr Mpồl đơng lam rơcang gàr làng bol càr, Anih duh broă Làng bol ală sàh, sơnah ƀòn mờ tiah is ồn Phú Quý rơcang lài drơng wơl mờ mìu dờng, ngơr bam, dà kŏ dà cò, tơrlah ù. Càr Lâm Đồng tŭ do geh 8 gùng dà lơgar jòng mờr 1 rbô 400 kơi sồ mờ mờr 1 rbô 300 kơi sồ gùng càr. Tài uă gơl gùng ờ hềt geh bơcri priă lơh niam ndrờm bal, bal mờ hơ̆ gam lòt gam ù tiah dòr bơnơm sơbơng roh ngan den tàng pơhìn gơlik geh tơrlah, gơ kòl, lơh roh bơta lơngăp lơngai lòt rê tàm gùng tàm kàl mìu càl rbut là uă ngan.