Jăt jơnau yal sền tàm Pơrjum dờng, 5 nam do, Đảng ƀộ càr Quảng Ngãi mờ càr Kon Tum lài do neh đơng lam lài ai jơh pràn lơh ngan pơnđơl, lơh geh uă broă kwơmàng mờ tơl làm jơh bal bè cíñ trị, lơh sa, niam chài, mpồl bơtiàn, sền gàr dà lơgar mờ lơngăp lơngai. Gơ wèt mờ kơnòl broă bơ̆t bơtàu Đảng mờ ală anih lơh broă cíñ trị, Đảng ƀộ càr neh tơrgùm sồr lơh jăt geh cồng nha ală Jơnau lơh nền tàm pơrjum Dà lơgar mờ bơh Tỉñ ủy càr dê, lơh jăt sir niam kơnòl broă rơndăp tăp sèng kwang bàng, mpồl lơh broă, bơ̆t bơtàu mpồl kwang bàng, bơ̆t bơtàu mpồl lơh broă đảng kâp hơđơm kơnhăp pràn, geh broă lơh tơrlòng lài pa, broă lơh jak, geh cồng nha tàm broă lơh bơ̆t bơtàu Đảng.

Tàm broă lơh sa- mpồl bơtiàn, càr Quảng Ngãi lơh sir mờ lơh gơs sơrlèt khà ală broă jàu tờm, khà gơguh lơh sa kờp bal geh 7,3% dùl nam, ơm dơ̆ 10 tàm 34 càr, ƀòn dờng. Rề dia dà lơgar sùm sơrlèt jơnau kờp dŭ lài, tàm 05 nam geh rlau 165 rbô tơmàn đong. Càr neh jơh lơh sir Broă lơh tơn jơh hìu ing hìu ồm sèt ñhăt dà mìu bal mờ kờp jơh rlau 9 rbô nơm hìu. Broă lơh tơrmù rƀah geh lam lơh jăt ndrờm bal, gơmù kờp bal 2,17% tàm dùl nam; tàm hơ̆ tiah bơnơm gơmù 4,64% tàm dùl nam.

Pơrjum dờng gĭt nền loh, pơnđơl tus nam 2030, Quảng Ngãi là càr bơtàu tơngguh đau, gơgơs dùl tiah gơguh lơh sa kwơmàng tàm kơnhoàl ù tiah tàm gùl lơgar mờ Tây Nguyên. Tàm hơ̆, pơnđơl khà gơguh kờp jơh phan bơna lơh geh tàm ù tiah càr dê (GRDP) kờp bal tơngai bơh nam 2026- 2030 geh bơh 10% tàm dùl nam rlau hơđăng. Tus nam 2030, GRDP kờp bal dùl nă cau pơgăp 6 rbô 900 tus 7 rbô dolar Mỹ. Tus nam 2030 pơnđơl sền bal ờ gam hìu rƀah tai. Jơnau yal cíñ trị sền Pơrjum dờng cau ala măt Đảng ƀộ càr dơ̆ I, tơngai lơh broă bơh nam 2025- 2030 gĭt nền loh 5 kơnhoàl broă tờm mờ 3 kơnòl broă tam gơl pràn.

Mò Bùi Thị Quỳnh Vân, Ƀí thư Tỉñ ủy càr Quảng Ngãi đơs nền: Pơrjum dờng Đảng ƀộ càr là Pơrjum dờng bơh bơta pin dờn, bơh bơta wèt sền mờ lơh broă dê: “Ờ gŏ di pơñhừ să gơ wèt mờ ală cồng nha lơh geh, Đảng ƀộ càr pal sùm kơlôi sơnơng bè jơnau lùp: Quảng Ngãi gam ơm tềng lơi pơndrờm mờ ală ƀòn lơgar ndai tàm jơh gùt lơgar taih? Khin sền swì is, sền swì dùl bă song khà bơtàu tơngguh tŭ do bơh càr Quảng Ngãi dê neh ndrờm pal mờ bơta pràn, neh lơh geh cồng nha ngan rlau jơh ală bơta pràn halà ờ hềt? Bơta niam kis geh priă lơh geh, bơta chờ hờp geh tàm bơrlŭ bal tàm tơl nă làng bol halà ờ hềt taih? Bơh hơ̆ ai geh ală jơnau bơsram geh kwơ, ngan ngồn; gĭt nền loh jơnau kờñ, kơnòl broă, broă lơh, ală jơnau lơh nền tàm pơrjum gùng dà broă lơh kwơmàng dong Quảng Ngãi bơtàu tơngguh”. 

Đơs sồr lơh Pơrjum dờng, Kwang bàng Ƀộ Cíñ trị, Phó Thủ tướng Duh broă sùm Cíñ phủ ồng Nguyễn Hoà Bình cih dờp, đơs niam ngan ală lơh ngan bơh Đảng ƀộ, gơnoar ătbồ mờ Làng bol càr Quảng Ngãi dê tơngai lơh broă pa do, ai gĭt ală jơnau gam gơkòl, ờ hềt dipal ờ hềt pràn jak kờñ pal bơsong.

Bè broă lơh bơ̆t bơtàu Đảng, Phó Thủ tướng đơs loh, pal sền bơ̆t bơtàu Đảng ƀộ mờ ală anih lơh broă cíñ trị sàng goh, kơnhăp pràn là kơnòl broă tờm bơh tờm dê; is ồn sền gròi bơ̆t bơtàu mpồl kwang bàng ndrờm pal mờ kơnòl broă.

Bè kơnòl broă bơtàu tơngguh lơh sa mpồl bơtiàn tơngai lơh broă tus càr Quảng Ngãi dê, Phó Thủ tướng ồng Nguyễn Hoà Bình sồr càr pơlam gùng bơtàu tơngguh lơh sa mờ măy mŏk jăt broă lơh ngan ngồn, măy mŏk pa, ai Tiah lơh sa Dung Quất lơh bơta tờm; sơlơ lơh bal tai mờ Tiah lơh sa pờ Chu Lai nàng gơgơs dùl tiah tờm lơh sa mờ măy mŏk tờm kwơmàng dà lơgar dê. Bè lòt nhơl, càr pal lơh gơlik geh ală phan bơna niam is, tàm tơrbŏ geh “brê” mờ “dà lềng”, lơh jăt ngan ngồn broă rơndăp lơh “dùl anih tus, pe dà lơgar”, ai măt tiơng pơnrơ bồt Lý Sơn, bơta pràn ù tiah ƀòn lơgar, nhơm trồ tiah Măng Đen mờ bơta ƀươn sơnĕ pe Đông Dương gơgơs dùl phan bơna lòt nhơl lơh bal niam is ngan.

Phó Thủ tướng ồng Nguyễn Hoà Bình đơs wih đơs wơl: “Quảng Ngãi geh dùl ù tiah ƀươn lơh sa- cíñ trị is ồn, ơm tàm sơnĕ pe Đông Dương, là gùng mŭt tàm tơrbŏ bal Tây Nguyên tus dà lềng. Añ jờng rơ nùs nhơm càr dê gĭt nền jơnau kờñ gơguh lơh sa 10% rlau hơđăng. Bulah bè hơ̆, do là dùl bơta lòng dờng, dùl bơta tơrlòng gơ wèt mờ khin cha mờ pràn jak ăt gơnoar bơh Tỉñ ủy càr dê. Đơng lam pal kơlôi jrô, lơh dờng, tài làng bol. Pal sơrbì bồ tơnggoh kơlôi yau mìng ơm kơ̆p tàm bơcri priă dà lơgar, broă lơh yau kơ̆p dờn Dà lơgar sền swì ring bal rơndăp ù tiah mờ tròc priă kes priă dà lơgar dê. Geh gùng dà, broă lơh ƀươn ƀoài nàng hòi tơrgùm mờ ngui niam bơta pràn gam rơ̆ ru ngan tàm Làng bol, tàm mpồl lơh sa kă bro hơ̆ sồng là gùng lòt ngăc ngar jak chài tŭ do. Bal mờ bơta pràn dờng ngan tơnơ̆ tơrgùm bal dùl mờ kơ̆p gơn ngan bơh rài pa dê, añ sồr Pơrjum dờng pal cribơyai, cih Jơnau lơh nền tàm pơrjum loh làng, geh bơta lơh broă uă, rơndăp nền geh ală broă lơh tam gơl pràn, ndrờm bal mờ geh bơta jơh nùs lơh ngan cíñ trị uă rlau tai, pơnđơl geh, mờ geh tŭ là sơrlèt rlau broă jàu gơguh lơh sa neh sồr”.