Bàr nă Ƀộ trưởng ring bal đơs, tơngai lài, lơh broă bal sền gàr dà lơgar đah bàr lơgar geh lam lơh tơl làm, ngan ngồn, jăt di pơlam gùng mờ đơng lam kâp dờng bàr lơgar dê neh ring bal. Bàr đah lơh geh cồng nha sùm broă lơh cribơyai, tă pơgồp jơnau đơs mờ đơng lam kâp dờng; sơlơ lơh broă bal tai đah ală mpồl ătbồ, sền gàr tiah nhàr lơgar, ling dà lềng, kảñ sát dà lềng; pơgồp bal lòt sền bal, tam dră rơcăng dră wơl cau lơh tìs gan dà lơgar, tăc blơi phan kơñau mờ lơgar ndai, blơ̆ blăc kă bro phan. Uă broă lơh tơrlòng lài lơh broă bal geh kwơ ngan ngồn geh lam lơh, bè: lơh oh mi pôs đồng mờ hìu sơnơm, lơh oh mi mpồl làng bol ơm kis bàr đah nhàr lơgar, ală broă lơh sền gàr lơngăp lơngai rài kis mpồl bơtiàn dong kờl làng bol kơnhoàl ù tiah nhàr lơgar.

Bàr nă Ƀộ trưởng ring bal pơn jăt tai lơh kơ̆ kơl jăp gĭt gơ̆p tam klăc, lơh bơyô bal; sơlơ tìp măt, cribơyai kâp dờng;  lơh jăt geh cồng nha ală mpồl lơh broă bal 2 gah gam geh tŭ do; rề ơnàng tìp măt lơh kwèng ling geh griăt kơnòm să, đơng lam kơnòm să; lơh geh bơta tam gơl pràn tàm bơto mpồl cau lơh broă, pơgồp bal kơ̆ kơl jăp, tàm dong kờl bal tàm ală mpồl, anih cribơyai sền gàr dà lơgar kơnhoàl ù tiah do mờ ală lơgar. Bàr đah kung ring bal lơh pràn lơh broă bal pe lơgar: Việt Nam – Lào mờ Campuchia, tàm hơ̆ geh ală dơ̆ tìp pah nam đah pe nă Ƀộ trưởng Ƀộ Ling klàng mờ tàp lơh bal bè drơng wơl mờ ală bơta lòng lơngăp lơngai ờ hềt geh bơh lài, bè dong kờl cau dong kờl rềs àr, rơcăng pleh trồ tiah lơh aniai, kòp bơtờp.