Dơ̆ pơrlòng nam do cih dờp 3 rơbô 508 jơnau cih tus bal pơrlòng bơh 125 anih lơh broă sră ƀăo. Uă jơnau cih geh đơs là geh cih jrô ơnàng, ngui cồng nha uă gah, cih yal niam ngan gùng lòt 80 nam tơnggơs mờ bơtàu tơnguh bơh Quôk hội Việt Nam dê. Mpồl duh broă sền sơwì bơh chờm geh 6 mpồl dềt: Sră ƀăo pơ àr, Ƀăo điện tử, Pờ tơlik jơnau đơs, Sơñio rùp, Ƀăo rùp mờ Pang sră ƀăo neh lơh sir ai điềm bơh sơn rờp mờ rơwah geh 90 jơnau cih jak ngan mut tàm dar dŭt ndơl, geh: 15 jơnau cih ƀăo pơ àr, 20 jơnau cih ƀăo điện tử, 15 jơnau cih pang sră ƀăo, 15 jơnau cih pờ tơlik jơnau đơs, 15 jơnau cih sơñio rùp mờ 10 jơnau cih rùp sră ƀăo.

 Ală jơnau cih mut tàm dar dŭt ndơl gàr niam bơta niam, tơngŏ niam ngan tơngume, jơnau yal, cih yal tơl làm 3 bơta tờm lơh broă bơh Quôk hội dê: lơh adat, jat sền dờng ngan rlau jơh mờ lơh nền ală broă kwơ màng bơh Dà lơgar dê; mơkung lơh mpờl gŏ tơngume 80 nam crơnggơs, bơtàu tơnguh Quôk hội Việt Nam dê.