Mang òr (28/09) mờ àng drim gờñ ngai do, 29/9, càl rbut dờng sồ 10 geh mat sơnđan Bualoi mờ bơta pràn càl khồm dờng ngan mờ mìu sơr jŏ jòng neh lơh aniai uă càr tiah tàm gùl lơgar, lơh gơbàn hoàc huơr kơn jơ̆ ngan bè kòn bơnus mờ phan bơna. 

Bơh àng drim gờñ, tàm càr Quảng Trị yal geh 12 nă cau roh thit. Tŭ mut tàm càr Nghệ An – Hà Tĩnh, càl rbut neh gơmù bơta ndang, lơh gơbàn mìu sơr jŏ jòng, neh geh 13 nă cau chơt mờ roh thit, 2 nă cau gơtìp sồt să. Lài hơ̆, mho ngai 28/9, tàm càr Thanh Hóa, Phó Thủ tướng ồng Trần Hồng Hà đơng lam pơrjum tơn mờ pờ tơlik tàm internet mờ ală càr, ƀòn dờng bơh Thanh Hóa tus Đà Nẵng nàng kờñ lam lơh broă rơcang lài drơng wơl mờ càl rbut dờng sồ 10. Phó Thủ tướng sồr ală càr, ƀòn dờng tơrgùm mpồl lơh broă, lơh sir rơndap broă gàr lơngăp lơngai làng bol in, is ồn pal tơngkah ală tiah kong gơ rềng tơnơ̆ càl rbut dờng. Ală tiah kơh bơnơm pal rơcang lài ntrờn làng bol, rơcang lài phan bơna mờ cau lơh broă jat jơnau đơs 4 tơn tàm dùl anih nàng rơcang lài drơng wơl di tŭ, tơrmù ƀà hoàc huơr bè kòn bơnus mờ phan bơna.