Tŭ do uă gơl gùng Gùng dờng 28 B lòt gan ală sàh Phan Sơn, Tà Hine mờ Ninh Gia (càr Lâm Đồng) sền bal neh lơh sir jơh broă pờ ơnàng bơnàng gùng, bàr pe gơl gùng sơnđờm geh lă cài. Jat kỹ sư Nguyễn Văn Thuận, jat sền broă mut lơh broă sồ 2, nàng lơh geh di tŭ tơngai, mpồl lơh broă pal hòi jà tơrgùm uă ngan măi mok mờ mpồl cau lơh broă, lơh ngan tàm tơngai ờ geh mìu:“Mpồl lơh broă mut lơh broă tŭ do gam lơh mhar 4 gah mut lơh broă bơnah bơnàng gùng mờ  2 mpồl mut lơh lă cài. Pal ngui jơh uă ngan pah ngai geh trồ tơngai niam nàng tơnguh mut lơh broă”.

Rơndăp broă lơh lơh niam wơl, lơh kơnhăp Gùng dờng 28B geh bơta jòng rlau 68 kơi sồ, kờp jơh priă bơcri lơh rlau 1 rơbô 400 tơmàn đong, bơh Kụk Gùng ù gờl Việt Nam dê lơh cau tờm bơcri priă lơh. Do là broă lơh tờm, nàng kờñ tàm tơrbŏ  2 tiah lơh sa Dà Làc mờ Phan Thiết (brê mờ dà lềng), sơlơ tơnguh tai lơh bal ală ù tiah mờ tơrmù lơyah bơta ngài đah gùng pleh đah mat tơngai lik –  mat tơngai mut. Sơnđờm mut lơh bơh nhai 4 nam 2024, tus tŭ do rơndăp broă lơh neh lơh sir rlau 40% mpồl broă: rlau 30 kơi sồ lă cài, bê tông, 40 kơi sồ bơnàng gùng lòt mờ mờr 58 kơi sồ tuh lŭ rơdeh.

Tàm koèl kơh Đại Ninh – tiah ù tiah ờ niam ngan rlau jơh, 6 nơm rbàng gam geh mhar ngan mut lơh. Ồng Trần Trung Hiếu, đơng lam bồ rơbàng sồ 3 (Kông ty kổ phần 134 Việt Nam) pà gĭt, ù tiah kal ke lơh broă tờ sơntơ̆p jrong roh ngan tŭ tơngai, mơya mpồl lơh broă gam tơnguh dơ̆ lơh broă ngai mang nàng gàr niam broă rơndăp lơh:“Bơnah tàm dơlam kềng đah đơm ù tiah kal ke, den tàng kal ke ngan gơ lam tus broă lơh tờ sơntơ̆p jrong, tờ bồr ù roh uă ngan tŭ tơngai. Tus lồi nhai pa do hơ̆ sồng pa jơh, lơh sir bơnah sơntơ̆p jrong tơ̆p bồr. Tơnguh bơnah rƀàng den he mìng tơnguh dơ̆ lơh broă, tơnguh mpồl lơh broă, tơnguh cau lơh phan den tàng rơ̆p chồl mhar mờ lơh sir di mờ tŭ tơngai geh jàu. Bol añ lơh jơh ngai mang tơn, hòi jà tai ală mpồl lơh broă, ai tai cau lơh phan nàng di tŭ tơngai tàm jàu tàm ngai 15/12 tus do”.

Jat broă rơndăp lơh, rơndăp broă lơh rơ̆p lơh sir tàm nhai 12 nam 2025. Mơya, bơta mìu uă mờ gơ kòl ai mat ù tàm bàr pe gơl gùng kung gam là kơryan dờng, digơlan gơrềng tus tŭ tơngai lơh sir bal dê.