Tàm sàh Khánh Sơn, tiah bơnơm đah măt tơngai mŭt càr Khánh Hoà dê, ngài mờ tiah tờm càr rlau 120 kơi sồ, ù tiah ƀòn lơgar ơnàng, brê bơnơm glòm gùt dar, thôn ƀòn ơm rah rài ơm ngài gơ̆p. Lài do, broă sok sền tơngai pơrgon lơh broă tàm kâp hơđơm tìp ờ dồ êt kal ke. Tŭ do, pah drim bơh kwang bàng dê sơđờm bơh broă lơh pờ măy tíñ, cih mŭt sền phan ngui Sơñio khà đo was cồng nha broă lơh- KPI. Tàm biài rùp măy tíñ mpờl gŏ ală kơnòl broă: Wă làng bol, lơh bơsong sră pơ àr, bơsong broă lơh nisơna. Lồi ngai, ờ càng geh cau lơi tơngkah, tơl nă cau lơh is lơh tềl broă lơh sir, cih tơngkah ală broă gơlik geh. Ngan phan ngui neh gơgơs “cau jăt sền ờ geh măt”, dong đơng lam gĭt bơnah broă lơh bulah ƀòn lơgar ngài ngan, mơkung lơh geh ai kwang bàng in mờng kwèng, rơcăng lài, gròi sền is he. Bi Nguyễn Thị Hà, cau mờng lơh broă Mpồl Bơ̆t bơtàu Đảng sàh Khánh Sơn, yal, do là mờng kwèng pa geh lơh gơs bơh nhai 04 nam 2025, tŭ càr ngui KPI ai tơl anih broă lơh in, mờ broă lơh pa dong bi rơcăng lài rlau: “Jăt ngui KPI bol hi gŏ gơlơh ring bal. Să tờm broă lơh rơ̆p ờ gơtìp lơyài tơngai pơrgon. Bol hi rơ̆p gĭt he lơh geh nđờ kơnòl broă broă mờng lơh, nđờ broă sră pơ àr, ătbồ broă…mơkung tàm pơndrờm khà ờ ƀươn soh uă halà dồ êt pơndrờm mờ kông cưh bal broă mờng lơh. Sền swì loh rlau cồng nha he dê bơh broă ai điềm bơh đơng lam dê”.

Ală KPI càr Khánh Hoà dê geh lơh kơrhia mờ ndrờm bal, jăt ngui bơh cau mờng lơh tus đơng lam. Ờ mìng kâp sàh lơm, uă anih lơh broă dong broă tă pơgồp jơnau đơs mờ mpồl lơh broă càr dê kung neh jăt ngui KPI sơl. Ồng Nguyễn Minh Tuấn, Phó Kwang Lam bồ drơng kơnòl Anih tờm Bơtàu tơngguh bă ù càr đơs ngan, KPI neh dong mpồl lơh broă kờp dŭ geh cồng nha lơh broă, lơh cơng tàng gàr niam lơngăp lơngai priă jền ai mpồl lơh lơh tờm is priă jền: “Dilah ờ gròi sền gơtùi den kwang bàng geh jơnau yal broă lơh uă mơya cồng nha tơngai lơh broă dồ êt. Tơngai lơh broă mờ priă nhai kal ke ătbồ, kơnòl broă gơ dŏ jòng, broă lơh tơm priă nhai ai cau lơh broă in sơlơ kal ke ai mpồl lơh broă in”.

Nàng kờñ ngui niam cồng nha bơh broă sền swì kwang bàng mờ cồng nha lơh broă bơh KPI, càr Khánh Hoà neh lơh Jơnum lơh broă KPI, tơrgùm sồr kwang bàng geh uă mờng chài, lơh broă ờs mờng jăt dơ̆ pah poh. Ƀí thư Tỉñ ủy càr Khánh Hoà ồng Nghiêm Xuân Thành să tờm đơng lam ală dar pơrjum sền swì, ai mờng chài. Mùl màl rlau 5 nhai jăt ngui pà gŏ KPI dong săc rwah broă lơh loh làng, geh pal jàu tơngai mờ khà sồ ờ ƀươn soh. Lơh mhar, di tơngai hơ ai tai điềm; lơyài tơngai hơ gơtìp tơrmù điềm. Mò Võ Thị Thu Hương, Phó Lam bồ Mpồl ătbồ Tiah lơh sa mờ Tiah lơh sa mờ măy mok, cau tàm Jơnum lơh broă KPI, pà gĭt: “Tơngai lơh broă lơh rơ̆p geh pơn jăt bal mờ broă jàu bơh tơl kơnòl broă dê, pơn jăt bal tơngai hơ lơh sir. Lơh sir gờñ tơngai hơ den geh ai tai điềm, sơlơ̆u wơl lơh sir lơyài tơngai hơ den gơtìp tơrmù điềm. Khà sồ ờ ƀươn soh bơh broă lơh dê geh kờp jăt khà bơh 1 rlau hơđang. Bơh hơ̆, điềm KPI bơh tơl nă kwang bàng dê rơ̆p geh tơrgùm jăt pah nhai, pe nhai, pah nam, gơ jăt tàm jơnau kờñ ngui bơh đơng lam dê”.

Bơh kơlôi rơcăng bơh chờm là pal “cih ală jơnau yal rơ̆ ru ir”, uă kwang bàng tàm Khánh Hoà rơhời sền KPI bè “gơnar sơnơm pràn pah ngai”, dong ătbồ să tờm niam rlau. Ồng Phạm Quốc Hoàn, Kwang Lam bồ Sờh Jak chài mờ Măy mok đơs là, geh KPI, đơng lam ƀươn ƀoài ai gĭt bơta pràn - ờ pràn bơh tơl nă să is dê tàm lơh jăt kơnòl broă dà lơgar.

“Ală e – Office tŭ do neh tàm tơrbŏ ătbồ KPI do, broă lơh geh cih pah ngai is, geh is sèng cih pah ngai ai tơl nă kwang bàng in jăt tềl broă lơh. Cồng nha pơn jăt bal ndrờm geh cih tềng phan ngui tàm măy tíñ. Ờ geh bơta lơi kal ke tŭ lam lơh”.

Bơta song dơ pă loh làng tàm sền swì mờ KPI dong kwang bàng, viên cưk geh kơnòl rlau, đơng lam ƀươn ƀoài rlau tŭ geh jơnau lơh nền tàm broă lơh ătbồ. Lài do, ală jơnau đơs mờng kwèng “lơh sir niam kơnòl broă” sùm mìng là jơnau mờng đơs tềng mbùng lơm. Tŭ do, tơl nă cau ndrờm geh sră điềm is, khà giơ lơh broă mờ khà sră nggal di tơngai hơ loh làng den tàng bơta “niam” geh lơh loh làng.

Bơh Khánh Hoà, nùs nhơm tam gơl pa neh tìp di gùng lòt jơnau sồr bơh Dà lơgar dê. Gùl nhai 07, Mpồl Gùng dà broă lơh – Broă rơndăp lơh Dà lơgar ai lơh jăt Tơngume KPI, pờ tơlik mpồl cau rề ơnàng lơh uă broă lơh tơrlòng lài ătbồ broă lơh cồng nha lơh broă tàm jơh ală anih lơh broă cíñ trị; jăt ngui bơh nhai 01/01/2026. Ồng Trần Lưu Quang, Ƀí thư Đảng Dà lơgar, lài do Lam bồ Mpồl Gùng dà broă lơh – Broă rơndăp lơh Dà lơgar, Ƀí thư Thàñ ủy ƀòn dờng Hồ Chí Minh tŭ lơh broă mờ càr Khánh Hoà, đơs: “Do là broă lơh ờ gŏ di là ƀòn lơgar lơi kung geh. Ală oh mi neh bơceh lơh den gĭt nền geh ală broă jàu loh làng. Lài do, bol he sùm sền swì jăt nùs nhơm, mờ ală jơnau đơs bal bal bè “tơngguh tai”, “lơh pràn”. Dơ̆ do, càr neh jơh nùs lơh ngan tam gơl pa, lơh gơ in loh làng nền cê tàm sền swì, đơs kwang bàng. Mpồl đơng lam càr neh ring bal uă ngan, mìng kơ̆p kờñ nùs nhơm ring bal do geh lơh gơrề uă tus kâp sàh, lơh geh bè hơ̆ den bol he lơh geh cồng dờng”.