Lòt tàm gùng dă mờ bê tông ơnàng, kloh niam, ồng Y Lisa Niê, Ƀí thư Ci ƀộ ƀòn Tung Krăk, sàh Ea Drông, càr Dăk Lăk pà git, do là cồng nha bơh nùs nhơm ring bal mờ dùl nùs bal bơh kwang bàng, đảng viên bal mờ làng bol dê. Gơl gùng dă mờ bê tông jòng 130 thơ̆k, Dà lơgar dong kờl lŭ, sơmăng, làng bol blơi is bràs, pơn ring gùng mờ tă pơgồp rơlao 100 ngai lơh broă nàng lơh gơs, ƀuơn tàm broă lòt rê, pơn diang phan geh lơh bơh broă lơh sa suơn sre mờ pơgồp bal tàm broă lơh tam gơl muh măt ƀòn lơgar tàm ƀòn. “Mờ gơnoar broă là Ƀí thư Ci ƀộ, añ neh cri bơyai mờ làng bol nàng lơh gùng lòt tus tàm suơn sre, do kung là gơnoar kwơ nàng làng bol geh dờp, dong kờl broă lòt rê ƀuơn rơlao. Añ bơyai lơh pơrjum ƀòn, mblàng yal mờ geh làng bol dờp bal, tă tơl hìu 600 rơbô đong, mờ 80 hìu tus bal tă. Kơnờm mờ broă geh tai priă dong kờl bơh dà lơgar dê, den tàng gùng do neh lơh gơs”.

Gơl gùng dă mờ bê tông tàm ƀòn Tung Krăk là dùl tàm ală broă lơh pơnrơ ngan tàm broă bơsram mờ đờm jăt Wa Hồ dê tàm sàh Ea Drông, càr Dăk Lăk, ai tơngŏ gơnoar lam lài, lơh lài bơh kwang bàng, đảng viên dê tàm broă bơ̆t bơtàu ƀòn lơgar pa tàm ƀòn. Mờ broă ai ù lơh gùng mờ pơlam làng bol tus bal lơh, kwang bàng tàm ƀòn neh lơh geh nùs nhơm pin dờn mờ ring bal bơh làng bol dê, dong kờl broă lơh gùng lòt tờm ngan tàm ƀòn geh tơrbŏ bal.

Ờ mìng tàm broă bơ̆t bơtàu ƀòn lơgar pa, broă bơsram mờ đờm jăt Wa Hồ tàm sàh Ea Drông gam geh ai tơngŏ bơh broă drơng gàr cau rơƀah. Lơh jăt ală broă lơh jăt jơnau kờñ dà lơgar dê bè tơrmù rơƀah, sàh Ea Drông neh geh ală broă dong kờl sơntìl phan tam, lơh hìu ơm, ai càn priă bơh Anih priă jền dong kờl mpồl bơtiàn. Ală broă dong kờl do neh lơh geh bơta niam nàng làng bol bơtàu tơnguh lơh sa, tơnguh priă geh. Kơnờm mờ hơ̆, khà hìu rơƀah tàm sàh neh gơmù bơh 280 hìu tàm nam 2024 gơmù gam 214 hìu tàm nam do.

Ồng Y San Niê Kdăm, Kwang atbồ ƀòn Ea Kjoh A, sàh Ea Drông, càr Dăk Lăk pà git: “Ală hìu gơwèt hìu rơƀah ndrờm geh dờp broă sền gròi, dong kờl bơh gơnoar atbồ ƀòn lơgar nàng bơtàu tơnguh ròng phan, tam phan. Bơh nam 2023 tàm ƀòn Ea Kjoh A geh 16 hìu geh dong kờl be nàng ròng, tơl hìu geh 8 nơm. Làng bol geh lơh ngan ròng niam. Tŭ be dờng mờ geh priă tă den làng bol tăc, ngui priă hơ̆ drơng tàm rài kis, prăp priă nàng lơh hìu, ròng oh kòn lòt bơsram. Rài kis kơl jăp, làng bol iang nùs lơh sa, lơh jăt ală gùng dà, broă lơh bơh Dà lơgar dê”.

Sàh Ea Drông tŭ do geh crơng gơs tàm tơngu me tơrgùm bal bơh bàr sàh Ea Drông lài do mờ Ea Siên, geh 21 thôn, ƀòn, mờr 24 rơbô nă làng bol, tàm hơ̆ geh rơlao 70% là làng bol jơi bơtiàn ờ gal cau. Đảng ƀộ sàh geh mờr 900 nă đảng viên pơrjum tàm 52 mpồl gơwèt bal. Mờ nùs nhơm pràn pa, kơnòl broă pa, broă bơsram mờ đờm jăt bồ tơngoh, nùs nhơm niam, broă lơh bơh Hồ Chí Minh dê neh gơs là gùng dà broă lơh tàm broă đơng lam, sồr lơh, ai tơngŏ tàm tơl broă lơh mùl màl bơh tơl kwang bàng, đảng viên dê.

Bi Hoàng Văn Dụng, kòn cau Nùng, kwang bàng lơh broă tàm jơdŭ lơh broă Mpồl duh broă làng bol sàh, Anih duh broă Làng bol sàh Ea Drông, càr Dăk Lăk pà git: “Bơsram mờ đờm jăt ơnà jăk, nùs nhơm niam Hồ Chí Minh dê ờ mìng là jơnau sồr mờ pal lơh jăt mờ broă lơh mùl màl pah ngai bơh broă lơh să tờm dê. Là dùl nă đảng viên kơnòm să, bơh broă lơh, añ kung tus bal ngui bơta chài măi mok pa tàm broă lơh, sùm tơrgùm jơnau git wă, jơnau tơngit pah gai nàng lơh jăt broă lơh, tus bal lơh gơs kơnòl broă geh jào”.

Mò H’ Thúy Mlô, Phó Ƀí thư Đảng ủy sàh Ea Drông pà git, broă bơsram mờ đờm jăt bồ tơngoh, nùs nhơm niam, broă lơh Hồ Chí Minh dê tàm sàh neh gơs bơta niam mùl màl, lơh geh tam gơl niam tàm broă bơ̆t bơtàu Đảng. “Broă bơsram, đờm jăt jơnau Wa Hồ den kung dong kờl tơnguh uă nùs nhơm geh kơnòl, jơnau git wă tàm broă sền is, tam gơl is tàm kấp ủy Đảng. Uă Ci ƀộ kung geh tơnguh uă ngan nùs nhơm sền tìs di, nàng ai tơngŏ loh nùs nhơm tam dră bơh mpồl Đảng dê, bơh tŭ hơ̆ geh pơgồp bal tàm broă bơ̆t bơtàu ci ƀộ ngai sơlơ kloh niam, pràn kơl dang rơlao. Gơwèt mờ Đảng ủy sàh den tàm broă lơh mờ geh ală broă lơh lam lài tàm broă bơsram, đờm jăt bồ tơngoh, nùs nhơm niam, broă lơh bơh Hồ Chí Minh dê den kung geh uă ngan broă lơh niam. Ală bơta geh pơnrơ do den kung neh pơgồp bal lơh geh ală bơta tam gơl niam tàm gùt Đảng ƀộ sàh dê”.

Mờ ală broă lơh mùl màl, ngan ngồn, broă lơh bơceh pa, broă bơsram mờ đờm jăt bồ tơngoh, nùs nhơm niam, broă lơh Hồ Chí Minh dê tàm sàh Ea Drông neh pơgồp bal tàm broă bơ̆t bơtàu mpồl Đảng kloh niam, pràn kơl dang, ai tơngŏ nùs nhơm bơh gơnoar atbồ ƀòn lơgar rềp làng bol, tài làng bol. Mờ pơlam geh nùs nhơm brồ guh, nùs nhơm tam klăc mờ bồ tơngoh bơ̆t bơtàu ƀòn lơgar ngai sơlơ bơtàu tơnguh, gơguh jăk, pas gơs.