Bơh àng drim, ală mpồl ling neh tơrgùm toah wàs tiah kis, tơrgùm ù bŏ, lơh niam wơl ală gơl gùng lòt tàm ală ƀòn, dong kờl pơn diang phan ngui phan sa ai ală hìu gam gơtìp kơrian is; dong kờl làng bol lơh niam wơl ală broă tàm ƀòn lơgar neh gơtìp aniai, rơndăp wơl hìu đam, rơhời kơl jăp rài kis tơnơ̆ mờ dà lìu dà cò.

Tus tŭ do, bàr tiah gơtìp kòl tàm gùng càr sồ 1 neh geh ai rơndeh lòt wơl. Gah lơh sơnơm tàm sàh do neh kham mờ pà sơnơm ờ sa priă ai làng bol ntrờn in, mờ dờp niam dùl nă cau kòp là kòn dềt jun bơh tiah gơtìp dà kơrian nàng cèng rê tus hìu sơnơm sơm kòp. Ồng Nguyễn Cảnh Tùng, Củ tịc Anih duh broă Làng bol sàh Buôn Đôn pà git, gơnoar atbồ gam càn ing lài priă nàng dong kờl tàm ală tiah ntrờn, rơcang tơl ồi, ào, phan ngui bal mờ sơnơm ai làng bol in. Kờp dŭ tàm 2, 3 ngai tus, tŭ dà neh soăt jơh, làng bol hơ̆ sồng gơtùi rẹ nàng toah wàs mờ kơl jăp rài kis.