Pơrjum dơ̆ do tơrgùm tàm 2 tơngume dờng, hơ̆ là mpồl bơta bè broă lơh Pơrjum dờng dơ̆ 14 bơh Đảng dê mờ mpồl broă bơt bơtàu Đảng mờ ală anih lơh broă Cíñ trị. Đơs mut pơrjum, Tổng Ƀí thư ồng Tô Lâm đơs sùm, tàm pơrjum do, Mpồl duh broă Đảng dà lơgar rơp ai jơnau đơs bè khà kwang geh jơng Ƀộ Cíñ trị, kwang geh jơng Mpồl Đơng lam Đảng Dà lơgar tơngai lơh broă Pơrjum dờng dơ̆ 14 mờ sac rơ wah kwang bàng yal tơnggit mut tàm Ƀộ Cíñ trị,  Mpồl Đơng lam Đảng Dà lơgar khoă XIV. Do là broă kuơmàng ngan, là broă tờm bơh broă tờm dê tài tơl broă ndrờm lơh nền bơh kòn bơnus. Sac rơ wah, yal tơnggit kwang bàng ai Mpồl đơng lam dờng ngan rlau jơh bơh Đảng dê nàng đơng lam lam lơh ală jơnau kờñ uă ngan, kràñ cê ngan bơh bơtàu tơnguh dà lơgar dê tàm tŭ tơngai pa den tàng pal sơlơ nền nòn, di pal. Tổng Ƀí thư đơs là, bơdìh mờ ală jơnau pal jat sac rơ wah jat jơnau sồr bè gơ wèt mờ ală kwang geh jơng Đảng dà lơgar mờ bol he đơs tàm Pơrjum Đảng dà lơgar dơ̆ 12 mờ dơ̆ 13 pa do, broă rơ wah yal tơnggit kwang bàng mut tàm Ƀộ Cíñ trị, Mpồl Đơng lam Đảng Dà lơgar khoă XIV kờñ pal đơs sùm tai bàr pe jơnau sồr kuơmàng dipal mờ tŭ tơngai tam gơl pa bơh Đảng mờ dà lơgar he dê.