Là dùl tàm ală sàh pa geh tơnggơs tơnơ̆ tŭ tơmŭt bal bơh 3 sàh yau: Mỹ Chánh, Mỹ Thành mờ Mỹ Cát, sàh An Lương, càr Gia Lai tŭ do geh bă ù ơnàng 54 kơi sồ vuông mờ khà kờp làng bol rlau 6 rơbô nă cau. Bulah ù tiah ơnàng, làng bol gal ngan, gơnoar atbồ sàh An Lương neh mhar ngan mut lơh broă bè ờs mpồl lơh broă sră pơ àr gơnoar atbồ mờ lam lơh ală kơnòl broă drơng làng bol. Tàm Anih tờm drơng broă sră pơ àr gơnoar atbồ Dà lơgar sàh, 3 mpồl lơh broă sră pơ àr gơnoar atbồ kwơ màng neh geh ai lơh lài mờ tam gơl sồ mờ bơsong tàm điện tử. Ală sră pơ àr geh gơrềng tơn tus rài kis làng bol dê bè sră sơnđan mat kòn pa deh, yal cau chơ̆t, sră dờp bơta geh ngan... ndrờm geh dờp mờ bơsong mhar ngan. Mìng tàm nhai sơnrờp mut lơh broă, sàh neh bơsong mờr 700 sră pơ àr gơnoar atbồ điện tử, jơh ală ndrờm di mờ tơngai pơr gon lơm.

Dùl bơta pal sền gròi tàm broă lơh bơh sàh dê là sùm sền gròi ngan tus sền gŏ bơh làng bol dê tŭ tus lơh broă. Ồng Võ Thanh Hoàng, Củ tịc Anih duh broă Làng bol sàh An Lương, pà gĭt: “Bơh 1 nhai mut lơh broă, bol añ sền gŏ là mờ kơnòl broă bơh kwang bàng dê sùm gĭt loh bơta gĭt wă drơng niam ngan ai làng bol in, lơh geh bơta kơ̆p kờñ làng bol. Sàh sền gròi ngan mờ bơcri priă blơi phan bơna măi mok. Ală  tiah ndai ờ hềt blơi măi ai sồ mơya mpồl lơh broă geh làng bol gal den tàng sàh neh blơi măi ai sồ jat rơndăp tăp sèng, geh tơngŏ tàm măi mok. Làng bol lơi lòt lài rơ̆p lĭp sồ lài, lòt tơnơ̆ lĭp ai sồ tơnơ̆ lơh geh dùl rơndăp tăp sèng niam ngan”.

Bơta tam gơl do geh làng bol jờng rơ uă ngan. Ồng  Lê Ngọc Trọng, làng bol sàh An Lương mờ 2 dơ̆ tus lơh sră pơ àr gơnoar atbồ tàm nhai pà gĭt: “Kwang bàng anih lơh broă bơto pơlam lơh mhar, di pal, sră nggal bơsong ai añ in tàm ngai tơn”. Tàm sàh tiah kơh bơnơm Canh Vinh, tơnơ̆ tŭ tơmŭt bal geh bă ù ơnàng mờr 260 kơi sồ vuông, ù tiah kal ke, uă ƀòn tiah làng bol jơi bơtiàn dồ ết nă cau, tiah sar lơgar ngài, broă lơh lơh kwèng mờ sră pơ àr gơnoar atbồ jài mờ rềp làng bol tai là bơta kơlôi rcang dờng ngan bơh gơnoar atbồ ƀòn lơgar dê. Ồng Dương Hiệp Hòa, Củ tịc Anih duh broă Làng bol sàh Canh Vinh, pà gĭt, sàh neh lơh broă lơh tơrlòng lài ală “tiah bơsong sră pơ àr gơnoar atbồ” tàm tiah ngài anih lơh broă nàng drơng broă làng bol:“Bơh kal ke mờ gơnoar atbồ bơceh lơh, lơh ală tiah bơsong sră nggal gơnoar atbồ ai làng bol in. Lài ngan là tơlik mat dùl tiah dờp tàm thôn Canh Hiển nàng drơng broă ai ală thôn tàm tiah ngài in bè thôn Canh Hiệp, ƀòn Canh Tiến. Lơh tus lơh ală tiah dong kờl làng bol. Lơh broă ờs mờng mờ ală phan bơna bè măi mok rơ̆p dong kờl ală ƀòn tàm tiah ngài lơh bè lơi nàng làng bol in tus rềp rlau, gờñ bơsong ală jơnau kờñ”.

Bơta rềp mềl do gam geh tơngŏ loh làng bơh mpồl lơh broă dê. Bi La Thị Huyền Giang, Kwang bàng Anih tờm drơng broă Dà kơgar sàh Canh Vinh, pà gĭt:“Tŭ lam lơh gơnoar atbồ ƀòn lơgar 2 kấp, añ gơ lơh gŏ bơta rềp mềl mờ làng bol mờ cau jơi bơtiàn dồ ết nă cau bơh sàh dê. Tŭ tus lơh broă, bàr pe nă làng bol tus lơh sră pơ àr gơnoar atbồ mờ ờ hềt gĭt loh den he sơñio loh, tơm bơh bơr mờ làng bol jat dà đơs kòn cau bơh he dê den ƀuơn wă rlau, broă lơh kung ƀuơn rlau tai sơl”.

Mìng tơnơ̆ 1 nhai lơh broă sră pơ àr gơnoar atbồ ƀòn lơgar 2 kấp, càr Gia Lai neh cih dờp lơh broă niam tàm broă lơh tam gơl pa wơl sră pơ àr gơnoar atbồ, tam gơl sồ, is ồn là cồng nha bơsong sră pơ àr gơnoar atbồ bơh drơng broă dà lơgar tàm internet. Jat Mpồng drơng broă Dà lơgar, Gia Lai tŭ do ơm dơ̆ 6 tàm 34 càr, ƀòn dờng bè khà sơñio sồ drơng broă làng bol mờ mpồl lơh sa kă bro. Ồng Hồ Quốc Dũng, Kwang bàng Đảng Dà lơgar, Ƀí thư Tỉñ ủy càr Gia Lai, pà gĭt:“Tus ndo jat jơnau bơto pơlam dê rơ̆p tam pà ai kấp sàh in. Ală kơnòl broă Dà lơgar ai gơnăp gơnoar bơh kấp càr mơya gŏ kấp sàh bơsong niam rlau den kung gơtùi dờp gơnoar ai kấp sàh in bơsong. Bơdìh mờ hơ̆ kung geh uă bơta ờ niam, kwang bàng kấp sàh tŭ do geh 3 tăp kwang bàng, kwang bàng bơh càr jun rê, kơnhoàl tơmù, kwang bàng tàm sàh. Kwang bàng tàm sàh lài do geh uă kwang bàng ờ geh tơl mờng chài lơh broă, den tàng nàng lơh kwèng mờ broă do pal geh tŭ tơngai bơto pơlam, tề lam nàng kwang bàng in tàm tơngai tus dờp lơh jơh broă lơh”.

Bơta tam gơl pa, tơrmù dipal, rềp làng bol bơh gơnoar atbồ kấp sàh tàm càr Gia Lai tơnơ̆ 1 nhai lam lơh broă lơh gơnoar atbồ ƀòn lơgar 2 kấp pà gŏ cồng nha loh làng bơh gùng dà broă lơh dờng bơh Đảng dê. Kung gam uă broă pal lơh, uă bơta kòl yan kờñ pal bơsong, mơya mờ nùs nhơm “mìng bơyai lơh lơm” bal mờ bơta đơng lam sồr lơh bơh Tỉñ ủy càr mờ Anih duh broă Làng bol càr Gia Lai dê, gơnoar atbồ sàh tàm broă lơh pa rơ̆p ngai sơlơ pràn kơl dang kơ̆ kơl jăp, ndrờm pal mờ kơnòl broă tàm tơngai tus.