Mìng 2, 3 broă lơh ƀuơn tàm điện thoại ngăc ngar, bŭ lah gam tàm hìu ha là tàm suơn kơphe, ồng Y Minh Niê, tàm ƀòn H’ Đing, sàh Ea Tul, càr Dăk Lăk kung gam ƀuơn ngan tơm priă phơng sih, sơnơm sền gàr phan tam ha là priă ồs đèng, priă dà. Jăt ồng Y Minh đơs, mờ phần mềm anih priă jền geh crăp tàm điện thoại ngăc ngar, mìng geh tơrbŏ mờ internet den ờ mìng geh tơm priă ƀuơn mờ gam geh tus bal mờ uă broă lơh drơng ala priă jền mờ priă tă ờ uă, geh tŭ ờ sa priă tơn. “Lài do ờ hềt geh app den he tus tơn tàm anih priă jền, gam tơnơ̆ do den tơm priă tàm điện thoại ngăc ngar ƀuơn rơlao. Geh app anih priă jền he tềm pềr tŭ jơ mờ ờ roh tơngai lòt rê, ơm tàm hìu kung gơtùi tơm priă sơl”.

Gam gơwèt mờ mò Nguyễn Thị Mỹ, cau tờm hìu kă bro phan lơh hìu, broă lơh drơng ala pơrài bồ tơngoh tàm thôn 5, sàh Ea Tul đơs, kơnờm mờ broă geh phần mềm anih priă jền sồ, broă tơm priă ƀuơn rơlao, sền gròi broă tă tơm priă loh làng, tàm hơ̆ uă ngan là tàm broă ờ cèng bal priă ngan mờ kung gam gơtùi tơmŭt priă tàm anih priă jền mờ sền hơ̆ bè dùl nơm ƀŏp priă dềt. Mò Nguyễn Thị Mỹ kung là “cau năc đềt mềr” bơh anih priă jền dê mờ khà priă càn rơlao 4 tơmàn đong. “Càn priă anih priă jền neh 10 nam do bloh, Agribank dong kờl, ai tơl bơta niam càn priă nàng bơtàu tơnguh lơh sa. Sră nggal den ƀuơn, mhar, niam, tă priă tơn tàm ƀŏp priă điện tử. Lài do gam pal lòt tơm priă cồng tàm anih priă jền, tŭ do den tơm priă cồng mìng geh tơm tơn tàm ƀŏp priă điện tử, bè tàm ngai 30 tơm priă cồng den tàm pơgăp ngai 25 là añ neh tơm bloh”.

Ờ mìng cau năc să tờm, ală mpồl lơh broă bal, mpồl lơh sa kă bro lơh sa suơn sre kung geh dờp bơta kwơ bơh ală bơta kwơ sồ dê. Broă pơgồp bal đah anih priă jền mờ anih lơh broă dia, anih atbồ sền gròi phan kă bro, rơndeh, anih prăp priă dong kờl mpồl lơh sa kă bro lơh jăt kơnòl priă jền mhar, loh làng mờ tềm pềr priă tă. Lŏ Triệu Thị Hạnh, lơh broă tàm mpồl lơh broă bal lơh sa suơn sre mờ broă lơh drơng ala Bình Minh, sàh Cư̆ Mgar pà git: “Đah broă lơh gah priă jền bol añ dê gŏ app do ƀuơn niam ngan, bol añ ờ di pal lòt tus anih priă jền nàng lơh broă sùm mờ gơtùi lơh jơh ală bơta tàm app do tơn, nggui tàm kông ty kung gơtùi lơh sơl”.

Git bơta tam gơl sồ là kơnòl tờm nàng tơnguh uă bơta pràn tàm pơrlòng, ală anih priă jền tàm càr Dăk Lăk gam lơh pràn broă bơto sồr làng bol, mpồl lơh sa kă bro ngui broă lơh drơng ala sồ, mờ lơh di jơh jơnau yal tơngit cau năc pơgồp bal mờ anih yal tơngit dà lơgar bè ƀòn lơgar. Ồng Huỳnh Công Sự, Phó Kwang lam bồ anih priă jền Agribank tàm sàh Cư̆ Mgar pà git: “Agribank tàm sàh Cư̆ Mgar mblàng yal tus mờ cau năc in lơh jăt broă ai càn priă mờ tơm dồs is mờ phần mềm E-banking, dong kờl cau năc in tềm pềr priă tă, tơngai, rơcang lài tàm broă tơm priă dồs càn priă. Mờ anih priă jền den tềm pềr ală priă tă bè sră pơ-àr, broă lòt rê bal mờ ờ uă khà priă tă ndai, tơnguh uă cồng nha lơh broă, dong kờl anih priă jền tă di mờ tă tơl, di tŭ”.

Bal mờ broă ai măi mok tàm broă lơh, ală anih priă jền gam sền kwơ broă bơto nàng git măi mok sồ ai kwang bàng in, pơgồp bal mờ ală anih lơh broă geh gơnoar nàng lơh geh bơta niam sồ ndrờm bal tàm càr. Mò Vũ Mai Sa, Phó Kwang lam bồ anih priă jền Agribank Đah tô càr Dăk Lăk pà git: “Bol añ tus bal lơh ală phan broă lơh drơng ala măi mok pa, rơcang lơh pràn phan lơh broă CDM/ATM tus tàm ală ƀòn, tiah ngài. Lơh di jăt jơnau tơngit cau năc, tơrgùm phan da9l git di pal mờ anih yal tơngit dà lơgar dê bè ƀòn lơgar. Tam gơl broă tơrlòng lơh, anih lơh broă drơng broă lơh tềng anih lơh broă tus mờ broă lơh is mờ ngui ală bơta phan, broă lơh drơng ala tàm ală gah sồ, cau năc ờ gơtìp kơrian bè broă lơh, tơngai lơh broă”.

Tam gơl sồ gam gơs bơta pràn kwơ màng nàng mpồl lơh broă anih priă jền càr Dăk Lăk rề ơnàng broă lơh đah priă jền, dong kờl làng bol tàm tiah ƀòn lơgar geh tìp mờ priă, tơm priă mờ atbồ priă jền ƀuơn rơlao. Ờ mìng “tus tàm tê” làng bol, anih priă jền sồ gam lơh broă bal mờ làng bol lơh broă sa wèt tus lơh sa pa, pơgồp bal tàm broă lơh jăt mùl màl jơnau kờñ tam gơl sồ dà lơgar dê, bơtàu tơnguh lơh sa sồ tus tơl ƀòn.