Phó Thủ tướng sồr mpồl lơh broă geh gơnoar mờ tơl broă lơh, tàm klo ngai mơ, pal ntrờn jơh làng bol ơm tàm thôn 1, thôn 2, mờ thôn 3, tus tiah ơm lơngăp lơngai; rcang lài rơndeh rơndồ măi mok rcang tŭ mìu dờng pơn jat tai gơlik geh kal ke. Ồng đơs sùm, ờ gŏ di lời làng bol gơtìp gơ wềl tŭ dà tih mhar; mơkung sồr ală tiah hòi jà tơrgùm tai kanô, ơhò, pơlung dong kờl rềs àr.

Tềng đăp jơnau kờp dŭ lài mìu dờng gam gơlik geh kal ke tàm Khánh Hoà, Dăk Lăk mờ Gia Lai, Phó Thủ tướng pà gĭt, Dà lơgar neh sồr ală tiah bơt bơtàu gùng dà broă lơh drơng, gàr niam lơngăp lơngai tiah làng bol ơm kis; mơkung sồr Ling tiah 5 dong kờl uă ngan rlau jơh bè phan ngui, phan sa, tàm hơ̆ geh phan sa rañ.

Tus klo ngai, ngai 19/11, dà tih dà lìu dờng ngan tàm tiah tàm gùl lơgar, Tây Nguyên neh lơh 15 nă cau chơt mờ roh thit ờ hềt jòi bàn, 19 nă cau gơtìp sồt să. Bơta dà tih dà lìu  gam tàm khà đơs lài jal mhar. Ală càr Gia Lai mờ Dăk Lăk kong mờ mìu dờng ngan, geh tiah khà mìu gơguh tus 660mm. Hòac huơr bè hìu đam dờng ngan mờ rlau 20 rbô 400 nơm hìu gơtìp dà bam, uă ngan tơrgùm tàm càr Gia Lai mờ Khánh Hòa. Broă lơh drơng wơl gam geh lam lơh jal mhar. Tus tŭ do, kờp jơh geh 5 rbô 634 hìu bơnhă bal mờ mờr 16 rbô nă cau neh geh ntrờn jal mhar tus anih ơm pleh niam ờdo ờdă. Anih lơh broă geh gơnoar neh yal tơnggit jơnau dà tih jal mhar (hơ̆ là dà tih dờng ngan) tàm dà dờng Ba tàm càr Dăk Lăk mờ dà dờng Kôn tàm càr Gia Lai, mờ khà dà tus tŭ do ndrờm sơrlèt rlau Jơnau đơs lài 3 ngài ngan. Kờp dŭ lài tus mang ngai 20/11, bơh Đà Nẵng tus Khánh Hòa mờ Tây Nguyên kung gam pơn jat tai geh mìu sơr, geh tiah mìu rlau 400mm. Làng bol pal lơh jat jơnau pơlam ntrờn dô pleh bơh gơnoar atbồ tàm ƀòn lơgar dê.

Tàm tiah đah mat tơngai lik càr Dăk Lăk gơlik geh mìu dờng ngan bơh ngai 15 tus ngai 19/11, tài gơrềng bơh bơta tam gơl càl đah mat tơngai lik dê. Tŭ do 34 sàh, sơnah ƀòn tiah đah mat tơngai lik bal mờ uă sàh tiah thòng lơyah gơwèt tiah M’Drắk, Krông Bông, Ea Súp, Krông Ana… gam ngơr jrô bơh 1 tus 1 thơk nggùl, uă tiah dà wềl jơh, tam cah is. Rlau 1 rơbô lồ phan tam gơtìp ngơr bam dà, rlau 300 nơm phan poan jơng mờ pơgăp 5 rơbô nơm iar ada gơtìp dà pơr dô; bàr pe gơl gùng lòt gơtìp ngơr bam dà, tơrlah ù, ờ diơng uă tiah. Gơnoar atbồ tiah do neh ntrờn làng bol lik bơh tiah geh pơhìn tơrlah ù, dà kŏ dà cò.

Drim ngai 19/11, tàm sơnah ƀòn Sông Cầu, gơlik geh dơ̆ tơrlah bơnơm lơh tơrlah 2 nơm hìu mờ lơh bi V.T.U (33 sơnam), Ƀí thư Ci đoàn tiah drà Dân Phú 2, chơ̆t. Ală mpồl lơh broă ơm gak gùt càr pơn jat tai jat sền bơta gơlik geh bơh mìu dờng dà kŏ dà cò mờ lam lơh ală broă lơh sền gàr tiah làng bol ơm kis tàm ală tiah ờ pràn; mpồl ling lơh broă geh gơnoar bal mờ làng bol ai bồc cau chơ̆t tàm dà dờng Cầu lik bơh tiah tơrlah ù.

Mìu dờng jŏ jòng neh lơh gơbàn ngơr bam tàm uă tiah, sồr 38 hìu bơsram mờ rlau 26 rbô nă kơnòm bơsram tàm càr Gia Lai pal rlô bơsram ing nàng gàr niam ờdo ờdă. Lài hơ̆, tàm dơ̆ pơrjum pờ tơlik tơn tàm internet mờ ală sờh, gah broă lơh mờ 135 sàh, sơnah ƀòn nàng kờñ lam lơh ală broă lơh drơng mờ mìu dờng, dà tih mờ tơrlah ù, Phó Củ tịc Anih duh broă Làng bol càr ồng Nguyễn Tuấn Thanh sồr gah bơto bơsram jat tàm bơta gơlik geh trồ tiah dê nàng crăp rơcang ai kơnòm bơsram in rlô bơsram.

Tơnơ̆ jơnau sồr do, Sờh Bơto bơtê mờ Bơsram càr Gia Lai neh ai tơlik sră nggal sồr ală mpồl lơh broă go wèt Sờh ờ gŏ di sền ờ sơp, crăp rơcang mờ bơta digơlan mìu sơrlèt rlau jơnau đơs lài, dà gơguh tih mhar, pleh gơtìp rơmơp ndơl, nisơna. Ală hìu bơsram geh sồr jat sền nền nòn jơnau yal tơnggit tơngkah lài, jơnau đơs lài; yal jơnau pơhìn ngơr bam, dà kŏ dà cò, tơrlah ù, yal di tŭ ai pơgru, kơnòm bơsram in nàng rơcang lài pleh.